السلام عليكم ورحمته و بركاته
كل سنة و كلكم طيبين ربنا يعيده علينا و عليكم بالخير يارب ,,, انا بقالى فترة طويلة منزلتش اى مواضيع فى اقسام الطبخ
و حبيت اشارك معاكم بعزومة اول يوم رمضان عندى يارب تعجبكم
هى كانت ل 6 افراد
و الاصناف كانت :
محشى كرنب
فته
ملوخية
شوربة شعرية
لحمة ضانى و فراخ بانيه
سلطة خضرا و سلطة زبادى
سمبوسه و بتنجان وفلفل مقليين
الحلو :
كنافة ملكية
مهلبية
عصاير قمر الدين و تمر هندى
خشاااف
و دى الصور و الطريقة :
طبعا التمر الهندى غليته و صفيته بشاشة و زودته و حليته
و القمر الدين غليته على انار و حليته و بعدين صفيته و شلته يسقع
المهلبية دول معمولين ب لتر لبن مع 5 معالق نشا و 6 معالق سكر بس طبعا بضيف السكر و النشا بعد اللبن ما يغلى
و صبتها فى الاطباق و زوقتها بالزبيب و جوز الهند و البندق
الخشاف : بلح و مشمش و تين مجفف وزبيب و بزوده شوية قمر الدين عشان بيديله طعم احلى
الكنافة الملكية اخدت طريقتها طبعا من مراميرو
تحمرى الكنافة فى سمن على النار و لما تحمر تضيفى عليها علبة لبن مكثف و محلى و تحطى فى القوالب المكسرات بتاعتك و تضيفى عليها الكنافة و تضغطيها كويس و بعدين تطيها فى الفريزر ربع ساعة و تشيليها
ترصيها فى الطبق بعد كده
بعد كده يوم العزومة الصبح حضرت السلطات و غلطتها و حطتها فى التلاجة
و حشيت السمبوسة و تبلت البانيه
و بعد كده سلقت اللحمة و عملت الملوخية و الشوربة
و بدأت اعمل فى المحشى
طريقة المحشى
سلقت الورق وقطعته و عملت خلطة نى فى نى عبارة عن
بصل مفروم ناعم ويتبل بملح وفلفل وكمون
وطماطم مفرومة
وبقدونس وكزبرة و شبت
رشة نعناع ناشف
و 3 كوبايات رز ومعلقة كبيرة سمنة ونقلب ونحشى على طول
و الملوخية طبعا كلكم عارفين بتتعمل ازاى
السمبوسة
انا حشيت نوعين
نوع جبنة ونعناع
والنوع التانى
محشية بطاطس مسلوقة ومهروسة ومعاها خلطة تانية عبارة عن
بسلة وجزر مسلوقين بخرط بصلة وبشوحها على النار وبضيف البسلة والجزر المبشور
واتبلها بملح وفلفل وكركم و كارى واضيفهم على البطاطس واحشى
ودى اسمها سمبوسة هندى
و دى صور لبعض الاطباق بعد الغرف و اعذرونى لانى بصور بسرعة جداااا فى المطبخ و الاذان كان خلاص بقى فاضله دقايق
انا كنت مجهزة التوم و العيش بتاع الفتة من الصبح يدوب بس عملت الرز و بليت العيش و ظبطتها
السلطات و المقبلات
اتمنى عزومتى تكون عجبتكم
ربنا يجعلها ايام مباركة عليكم و ربنا يفك كرب المكروبين و يحقق للمسلمين كل ما يتنمنوه يا رب
و دعواتكم ليا ربنا يصلح حالى انا و جوزى و بناتى
و كل سنة و انتم طيبين
وادعوا لبنتى ربنا يشفيها
فى رعاية الله
مواضيع هذا القسم برعاية
sara 888 sara 888 242899_5.gif فتكات ست الكل Fatakat 242899 القاهرة الدور التانى – مصر