السلام عليكم ورحمة الله وبركاته
ازيكم يا فتكات النهاردة بقى قولت بما انه يوم الجمعة..اعمل اكله جديدة….وقد كان والحمد لله طلعت رووووووووعة
وعلى فكرة هي اكلة خفيفة جدا ومفيدة كمان
الاكلة دي من كتاب واحدة صحبتي كانت كاتباه من 3 سنين تقريبا..وماشاء الله أكلاتها جديدة وتجنن بس انا عملت شوية تعديلات على الأكلة عشان مكنش عندي بعض المكونات..بس مغيرتش كتير عموما مش مهم بس قبل ما نبدأ هقولكم حاجة مهمة جدا..لازم دايما قبل مانبدأ نعمل حاجة نحط ليها نية عشان ربنا يبارك فيها فقبل الطبخ حطي نية ادخال السرور على قلب مسلم.. الأكل من عمل يدك لأن ده كان فعل سيدنا داوود عليه السلام اطعام طعام وتاجري ياستي بالحسنات مع ربنا طيب بعد ما اخدنا جرعة الحسنات دي..نبدأ بسم الله
– المقادير زي مانتو شايفين في الصورة:
أربع صدور دجاج..فيليه طبعا بصلة متوسطة او صغيرة مفرومة نص كوباية فريك وتكوني غسلاها ونقعاها لمدة ساعة ملعقة كبيرة سمنة -التوابل بقى:
ملح وفلفل وزبيب وقرفة..ولو مش عايزة زبيب متحطيش.بس بيدي طعم حلو جدا -الطريقة: تحطي نص ملعقة السمنة وتحطي البصل ومعاه الفلفل والملح والقرفة
وعلى نار عالية شوحي البصلة لحد مالونها يصفر
بعدين حطي الزبيب والفريك بعد ماتكوني صفيتيه وقلبيهم 5 دقايق
حطي عليهم حبة مية صغيرين عشان الفريك يستوي بس ياريت تكون المية اللي انتي حطاها بتغلي عشان الفريك يستوي بسرعة ويبقى حلو
طبعا تهدي النار وتغطي الحلة لحد ما يستوي ويبقى شكله كده
تجيبي بقى البانيه وتشقي كل قطعة زي السندويتش بالظبط..وتحطي فيها الفريك..بس مش لازم تخلصي كمية الفريك كلها..لو اتبقى حبة ممكن تبقي تقدميهم جنب الفراخ وده شكلها وفيها الفريك
وبعدين تقفليها كأنك بتقفلي سندويتش
وترصي الصدور في صينية مدهونة بالنص الباقي من ملعقة السمنة
وتحطيها في الفرن لحد ماتستوي واديها وش تحمير تحت الشواية..وادي النتيجة النهائية
انا كنت عاملة جنبها فراخ بالصويا..وحطيتهم في طبق واحد ودي صورة اقرب
وعملت جنبها مكرونة بالصلصة
وسلطة فاصوليا حمراء بالفلفل الأخضر والمايونيز
ايه رأيكم بقى؟؟؟
عارفين اللي مش هترد او تقيم 5 هي حرة..تستحمل بقى اللي هيجرالها
يلا اسيبكم في رعاية الله
مواضيع هذا القسم برعاية
أميرة أندلسية أميرة أندلسية 571894_15.gif سوبر فتكات Fatakat 571894 الدمام – السعودية