أهلاً حبيباتي
النهاردة جايبالكم وصفة أنا بعملها كتير و عيلتي كلها بتحبها… هي بسيطة مافيهاش شغل كتير إنما شهية جداً جربيها و انشاءالله مش هتندمي أبداً
مش هطول عليكم و ندخل على المقادير أولاً
ربع كيلو لحمة مفرومة
بصلة كبيرة مفرومة صغيّر
4 حبات بطاطس وسط مسلوقة كويس جداً
جبنة شيدر مبشورة أو أي جبنة بتسيح إنتي عايزاها.. كترّي شوية جبنة عشان بتطلع أحلى بكتير
3 معلقة كبيرة صلصة الطماطم
1 معلقة كبيرة دقيق
ملح و فلفل و أي بهارات إنتي بتحبيها
كوب مياه
زيت للتحمير
و الإختياري ممكن تحطي أي نوع خضار إنتي عايزاه بس تقطعيه صغير جداً ممكن بسلة أو كرفس أو جزر أو كلّه مع بعضه
الطريقة:
تحطي الزيت و تحمري بيه البصلة لدقائق معدودة بعد كدا تزيدي اللحمة المفرومة و تقلبي شوية لغاية مايبقالها شوية و تستوي (هنا ممكن تضيفي الخضار اللي عايزاها لو عايزة خضار) بعد كدا تزيدي البهارات و تقلبي شوية
بعدها على طول تزيدي الصلصة و تقلبي و بعدين تروحي حاطة الدقيق و تقلبي كويس جداً عشان يتوزع في كل الطاسة
بعد كدا على طول تجيبي المية و تضيفيها و تخليها تغلي غلوتين تلاتة لحد ما تحسي إن المية قلّت و الصوص بقة سميك
في هذه الأثناء بتكوني بتسلقي البطاطس، لما يتسلق تهرسيه مع شوية لبن و زبدة و ملح و فلفل و يا ريت لو عندك جوزة الطيب
تجيبي صينية و تحطي عليها خليط اللحمة و فوقيها البطاطس المهروسة و فوقيها الجبنة المبشورة و تدخليها الفرن و مجرد إن السطح يحمر تشيليها يعني تقريباً 15 دقيقة
و بالهنا و الشفا
مواضيع هذا القسم برعاية
زوجة زوجة images/avatars/peppers.jpg فتكات متميزة Fatakat 77848 القاهرة – مصر