السلام عليكم ورحمة الله وبركاته …
جيبالكم النهارده يا بنات طريقة البطاطس الفارم فريتس عن تجربة والله اكثر من 15 سنه اصل اختكم مدمنه بطاطس وصعب اعيش من غير ما اكلها فى الوقت ايلى بتكون بتتحرق ومسكرة علشان كدة بعمل الطريقة دى من زماااااان وكمان كنت بشوف مرة فى قناه لبنانية ولقيت شيف مخضرم فى القناه الارضى بتاعتهم عملها بنفس طريقتى
يلا نقول بسم الله وهشرح لكم كل شئ بالتفصيل الملل :-
بدايتا انا عملت لكم كمية صغيرة بس اعرفكم بيها الطريقة لان صعب حد دلوقتى يعمل فارم فريتس وكيلو البطاطس بـ6ج وايلى ارخص من كدة لسة مش حلوة فى التحمير
طيب امتى اعمل الفارم فريتس واخزنه فى الديب فريزر ؟
اول لما البطاطس الحلوة فى التحمير ترخص وحتى تبقى بـ2ج الكيلو اهو ممكن وقتها نشترى كمية كبيرة ونخلص عمايلهم فى يومين بالظبط ونخزن فى الفريزر لحدددددد لما تختفى البطاطس الحلوة من السوق وقتها نطلع ونحمر ونغيط بيها ايلى مخزنتش زينا
المطلوب منك اية بالظبط :
1- كيلوات من البطاطس قد الكمية المطلوب تخزنيها
2- زيت للتحمير ويكون كمية وفيرة
3- طاسة للتحمير ولو هتعملى كمية بطاطس كبيرة انا بستخدم صنية الكيك مقاس 28 علشان البطاطس تبقى براحتها ومش تتهرى من ضيق الطاسة
4- لو مزاجك عالى هاتى القطاعة ايلى بتخلى شكلة كرينكل زجزاج يعنى ولو العيال بيشدوا فيكى وسى السيد عايز الشاى والكيك يبقى بالسكينه علطول لالا مش سى السيد ايلى هاتنولية بالسكينه اقصد هتقطعيها صوابع بالسكينه العادى
وادى البطاطس اشتريناها
وقشرناها وقطعناها صوابع عادى زى ما الحجم الطبيعى بتاعنا خالص بس خلى الصباع مش رفيع قوى علشان ميتكسرش منك لانه هيعدى على مراحل متعدده
يبقى ايه قشرنا البطاطس وعملناها صوابع وهتغسليها كويس قوى وتحطيها فى مية تغطيها من الحنفية عادى علشان لون البطاطس ميتغيرش و بدوووون ملح ها مركزين ولا نمتوا دا لسة بدررررى
وبعدين هحمر فى صينية واسعة لية علشان البطاطس مش عايزاها تطرى فى زيت غزيررر هتملى نص الصينية مثلا وخلى بالك علشان لما بتحطى البطاطس الزيت بيرتفع ويزيد مش عايزين كوارث بالله عليكى وزى ما قولتلك الصور ايلى انا عملاها فى كمية صغيره علشان اعرفك الطريقة فقط
هنا نزلت البطاطس تتحمر فى زيت سخن زى التحمير العادى
لاحظى لسة البطاطس نازلة الزيت ولسة طرية
طيب المطلوب بقى يا فتوكة منك ليها انك هتقلية نص قلية يبقى هسيبة لحد امتى ؟؟؟
هخلى البطاطس فى الزيت الغزير يتحمر لحد
…
..
..
..
..
..
صاحيين ولا ايييييية طيب بلاااااش ضرب
لحد لما البطاطس تبىق لونها ذهبى فااااتح وتلاقيها شدت من برة مبقتش طرية يعنى داخلة فى التحمير بس فاااااااتح
وهتبقى كدة
شايفين شكلها اختلف اصفرت اكتر والبطاطساية شدت عن الصورة ايلى قبلها يعنى مش بقت طرية يبقى كدة تمام وحصل المراد يبقى لازم ارفع البطاطس من الزيت
وطبعا بين كل طاسة وطاسة لو الزيت قل هتزودى تقريبا ال5كيلو بطاطس بتاخد زجاجه زيت لــ 1.5 زيت تحمير
وبعديييين اعمل اية :
للكميات الكبيره : بشوف عندى ملاية قديمة مش هستعملها تانى تكون نضيفة ومغسولة وزى الفل وافرشها على رخامة المطبخ واطلع عليها البطاطس لانى مش عايزاها شاربة زيت وطبعا هى متحمرة نص تحميرة يعنى مليانه زيت
للكميات الصغيرة : يا ورق كراسة ابيض يا ورق مناديل مطبخ الموضوع سهل لو على قد كيلو ولا اتنين مثلا وهيكون شكلة كدة
هسيبة يتصفى زيته على الورق او القماش النضيف ولازم يبرد خالص
وبعد كدة الخطوة المهمة الشنيعة الفظيعة بقى وهى هتحطى البطاطس ليلة فى الثلاجة مش الفريزر من بالليل للصبح مثلا لو الكمية كبيرة هتفضى رف فى الثلاجة وتحطية فى صينية عشاء مستطيلة وتغطية باى حاجة علشان ميكرفش اى روائح من الثلاجة وخلى بالك البطاطساية نص سواء يعنى تعامليها باحترام شوية بلاش تديها الكف المتين تلاقيها اتهرت منك ولو الكمية صغيرة هتحطى فى علب بغطاء او اطباق وتغطيها زى كدة انا مغطتش علشان اعرفك الطريقة
وتصحى الصبح باذن الرحمن خلاص كدة كلة بقى تمام ترصى فى الاطباق الفوم الابيض دى او الاطباق الفويل او حتى اطباق اعياد الميلاد وتعبى على قد الاكلة ايلى هتطلعيها وتغطى باكياس نضيفة او البلاستيك الرول وعلى الفريرز او الديب فريزر علطووول وانسية هيقعد معاكى شهور متخزن مفيش اى مشكلة خالص وادى صورته
وقت لما تحبى تطلعى وتحمرى يكون الزيت سخن وتاخدى من الطبق البطاطس المثلجة على الطاسة علطول بس لازم اول ما تنزلى البطاطس فى الطاسة تغطى باى غطاء علشان البطاطس طبعا فيها ذرات ثلج هترتش برة الطاسة مش هياخد وقت يادوب ياخد لون دهبى جميل ماهو اصلا نص مقلى من قبل كدة وتطلعية ترشى ملح لانه لو انتى فاكرة محطناش ملح خالص من الاول وده الشكل النهائى رشى انتى التوابل والشطة ايلى بتحبيها عليها
الخلاصة : قشرنا البطاطس عملناها صوابع حمرناها نص تحمير صفينها من الزيت بردناها وبيتناها فى الثلاجة لتانى يوم وبعدين حطيناها فى الاطباق وفرزناها فى الفريزر للتخزين
ياريب اكون عرفت اوصلكم الطريقة حاسة انى رغيت كتيررر بالرغم انى مش رغاية خاااالص
مش هوصيكم فى الدعوات ولكن بالمثل
وكمان التقييييييم
ايلى هتقيم هبعت لها
وايلى هتدخل تقرأ وتجرى بدون تقييم هعملها
ههههههه يلا استودعكن الله يا احلى فتوكات
مواضيع هذا القسم برعاية
marwa maro marwa maro 351178_7.gif سوبر فتكات Fatakat 351178 القاهرة – مصر