ازيكم يافتوكاتي يارب تكونوا بخير
النهارده جايبه ليكم محشي الكرنب من مطبخي المتواضع صورته من كام يوم ومتردده انزله عشان عارفه هنا ماشاء الله شيفات درجه اولي وانا علي قدي يعني بس اتشجعت النهارده وقلت انزله وان شاء الله يعجب الفتوكات ..
دي شكل الكرنبه بتاعتي
نبتدي نشيل الراس بتاعتها اللي فوق بالسكينه نعمل زي الدايره لحد ماتتشال معايا ..
هنا خلاص بعد ما شلتها ..
نيجي بقه للسلق
ودي مايه السلق وفيها فص توم وشويه ملح وكمون ..
انا عندي طريقتين للسلق الكرنب
الاولي انك تفككي الورق بتاعها وتبتدي تسلقي ورقه ورقه زي كده ..
اما الطريقه التانيه دي اتعلمتها من امي ربنا يخليهالي وبتكون اسهل واسرع كمان : وهي اني اسلق الكرنب كلها مره واحده في الحله بس احطها بالمقلوب زي كده ..
ولما احس انها خلاص استويت من تحت اعدلها تاني زي كده ..
وانا هلاقيها اتفكت لوحدها وبسهوله كمان واشيل ورقه ورقه ..
هنا خلاص سلقتها كلها اهي ..
نجي للتقطع بقه
نجيب ورقه ورقه وبالسكين اشيل العرق التخين اللي في النص ده ..
ونبتدي نلفها زي الرول بالطول ..
ونقطعها بالطول اللي تحبيه ..
ونقطعه بالحجم المناسب علي قد الحشي علي طول ..
انا هنا خلاص قطعته ورصيته عشان يكون سهل عليا وانا بحشي ..
تاني حاجه الخلطه ..
وهي عباره عن رز ، خضره ( شبت بقدونس وكزبره خضره ) ، بصله كبيره او اتنين وسط ، وطماطم ومعلقتين تلاته صلصه وتوابل مشكله ملح فلفل اسود كمون ..
اول حاجه نبشر البصله ناعم وبشويه زيت او سمن زي ما تحبي انا بفضل السمن بصراحه ونخلي البصل يدوب بس يدبل معايا بالشكل ده ..
انا هنا ضربت الطماطم بتاعتي ومعاها الصلصه في الخلاط ..
وبعد ما البصل دبل انزل بالطماطم عليها واضيف التوبل بتاعتي كلها
واسيبها تتسبك خالص ..
هنا بقيت جاهزه اهي ..
ودي الخضره بتاعتي غسلتها كويس وقطعتها صغير ..
يتبع ياقمرات واوعوا تنسوا التقييم..
مواضيع هذا القسم برعاية
الداعيه ربها الداعيه ربها 465656_61.gif اللهم اشف امي شفاءا عاجلا Fatakat 465656 تبــــــوك – السعوديه