فتوكاتي الحلوين
هقدم لكم النهارده طبقي في التحدي الثاني
من مسابقه
والحمد لله حصلت علي المركز الاول في المسابقه بعد خمس تحديات صعبه وممتعه
واحب اشكر كل اللي صوتوا لي في المسابقه وان شاء الله اكون عند حسن ظنهم
واحب كمان اشكر المشرفه الجميله حجابي
علي تعبها معانا في المسابقه
وكمان القمر نوسه الملحوسه صاحبه المسابقه
بجد تعبوا معانا كتير
جعله الله في ميزان حسناتهم
التحدي التاني كان طبق من اللحم المفروم وده كان طبقي
سويسرول اللحمه بالخضارمع وردات البطاطس البيوريه
دي اكله لذيذه وصحيه وشكلها جميل في التقديم
وكمان سهله وسريعه
لحمه مفرومه ناعم مش خشن ونضيف عليها بصل مبشور وملح وفلفل وبهارات وحبهان مطحون وبيضه ونعجنهم كويس
خضار مشكل مسلوق جزر وبسله وحمص او حسب رغبتك
هنخلط الخضار مع اللحمه انا هنا خلطه مع كل كميه اللحم انت ممكن تخلطيه مع نصفها بس وتحطيه في النصف علشان مفيش حاجه تقع في التقطيع النهائي من الخضار
ونحطهم علي ورقه الومونيوم ونلفهم رول
ونقفله كويس من الجوانب
ونحطه جوا الفرن في صنيه بها قليل من الماء علشان يستوي
ولما يستوي نتركه يبرد خالص وبعدين نفكه ونقطعه شرايح
ويقدم مع وردات بطاطس بيوريه ملونه طريقتها في المشاركه الجايه
