صباح الخيرات على اجمد فتوكات
انا قولت انقلكم تجربتى مع القشطة { اللى هى وش اللبن المغلى }
اصل انا لظروف زوجى الصحية لازم اغلى اللبن الحليب واحطه فى التلاجة يوم علشان يكوِن طبقة
سميكة على الوجه فبشيلها
وبقيت احوشها فى علبه او فى كيس واحطها فى الفريزر
لما بقت عندى كمية مهولة منها فقولت اسيحها واعملها سمنة فى الاول كنت باطلعها تفك وبعدين
ارفعها على نار هادية فكانت بتطلع مورتة كتيرة اوى
فوالدتى قالتلى ايه قالتلى قلبيها باديكِ لغاية ما تتكون معاكِ زبدة وبتفصل الماية منها مع الرب
وبتتكون كورة زبدة وبكدة بقت تسيح اسهل واسرع
والمورتة بتبقا اقل بكتير من الاول ودة اول استخدام للقشطة
وادى صورة المورتة ولونها الدهبى الرائع ماشاء الله اللهم بارك
https://files2.fatakat.com/2016/4/13352631943006.jpg
كنت باسخنها علشان الولاد بيحبوها مع الجبنة فى السندوتشات وممكن كمان مع الجبنة القديمة تحفففة
شوفتى لون السمنة تحفة ازاى ولا ريحتها ما اقولكمش
https://files2.fatakat.com/2016/4/13352633329629.jpg
وتانى استخدام فى الرز طبعا الكل بيعمل الرز المعمر بيها
طبعا بيدهنو بيها البرام كويس وممكن يحطو كمان معلقة على الوش ودى الطريقة العادية
فانا بقا كنت باعمل بيها الرز بنفس الطريقة بس فى الحله لكن كان عيبها ان الرز بيطلع مش بيلمع
فانا بقا قولت هاقدح شوية زيت صغيرين الاول
وبعدين احط الرز وباقى المكونات
وفى مرة روحت عاملة ايه
ودى بقا طريقة لبرام الحلة وااااااااااااااو تحفة كل اللى بياكلها من ايدى بيشيد بيها
انا طبعا حطيت شوية الزيت كالعادة بس مانزلتش بالرز لالالا روحت نازلة بالقشطة ولان الزيت
كان قدح راحت القشطة متحمرة فى ثوانى
فانا الاول اتخضيت
وروحت مقلباها بسرعة ونزلت بالرز وبصلاية نية صغيرة مقطعاها صغير وكلامى واضح مقطاعها
مش بشراها لان عصارة البصل بتغير طعم الرز
وبيبقا طعمه مش حلو خالص ولو فى لحمة ممكن احمرها مع شوية ملح وفلفل الاول واضيفها مع
البصلة المقطعة صغير او كبد وقوانص مسلوقة ومحمرة برضو
او فراخ مسلوقة ومحمرة مع الملح والفلفل وبعدين انزل بباقى الرز واحط كوباية لبن واحدة والباقى
ماية وشوية ملح وفلفل ومعلقة قشطة او اكتر على حسب
كمية الرز اللى بتعمليها يعنى وزنى المقادير بخبرتك وارفعي الحلة على النار
سوى الرز وسيبيه ينضج واغرفى وقدمى احلى رز معمر و فى الحلة ومن غير دوشة
ملحوظة يا فتوكات
لما بتسيحى القشطة وبتبقى سمنة طبعا بتصفى السمنة وبيبقى في المورتة
دى بقا خديها دايركت على الرز فى برام الحلة بعد ما تقدحى الزيت ما تحطيش قشطة بقا لالالا
حطى الرز على الزيت المقدوح وضيفى كل المكونات عادى وحطى بقا معلقة سمنة وحطى المورتة
اللى هى بديلة
لتحمير القشطة فى الزيت وبالف هنا وشفا
لو عجبتك الوصفة ادعيلي ربنا يفك كربى وييسرلى امرى
وماتنسيش التقييم بقا دة اختكم لسة جديدة ومحتاجة اتشجع ولو معجبتكيش الوصفة بلاش ضرب ولا
شتيمة
وخليها
دعوة حلوة منك بفك الكرب
مواضيع هذا القسم برعاية
cry of pain cry of pain 659746_4.gif ممنوعة من المشاركة Fatakat 659746 Alex – Egypt