سالخير عليكى ياختشى
بصى بقى هقولك : أول حاجة هتجيبى أوراق الملوخية اليانعة
( حلوة اليانعة دى ) وهتغسليها كويس وتسيبيها لحد ما تنشف
وبعدين هتخرطيها بالمخرطة وإوعى تحطيها فى الخلاط لإنة بخليها
زي العصير – خليكى ست شاطرة وخدى الأمور بحنكة
تانى حاجة هتحطى الشوربة ع النار ولو معندكيش شوربة حطى
مكعبين مرقة دجاج فى الماء النقى واول ما يغلى افركيهم
بإديكى اللوز وإظبطى الملح والتوابل حسب الرغبة
تالت حاجة هتجيبى حبة طماطم ودى بقى اللمسة السحرية
وتخرطيها حتت صغيرة وتحطيها ع الشوربة بتدى للملوخية طعم جنان
وأول ما المية تغلى تنزلى علطول بالملوخية ومتحطيهاش كتير ع
النار عشان متسودش يعنى هي غلوة واحدة وتقليبة واحدة واطفى
النار علطول وقومى بقى محمرة شوية توم وإنزلى بيهم ع الملوخية
ملحوظة : إوعى تنسى الشهقة
طب واحدة مبتعرفش تشهق خلاص كدة الدنيا خربت
لأ طبعا – مبتعرفيش تشهقى يبقى تصوتى كدة :
يا لهوااااااااااااااااي يا لهواااااااي يا لهواااااااااااااااي
ولاحظى الفرق بين يا لهوى و يا لهوااااااااااااااي
سر الشهقة بقى :
بيقولك فى القرن التسعتاشر كان فى واحدة بتعمل ملوخية وهي
بتطش الطشة فسمعت صوت تششششششششش فقامت
خبطة إيديها على صدرها وشهقت وقال إلحقنى يا سعيييييييييد
فدخل سعيد وقالها فى إية قالتلة معلش إتخضيت وقام دايق
الملوخية لقى طعمها روعة – ومن يوميها وكل ما الست دى تعمل
ملوخية تنادى على سعيد جوزها هو يشهق وهي تصوت
وبالهنا والشفا ومطرح ما يسرى يجرى
يارب اللى ما تقيم الشاشة تفرقع فى وشها – بس مايحصلهاش
حاكة – ماهى طيبة قلبى دهى اللى موديانى فى داهية
روحى يا شيخة ربنا يسترك دنيا وآخرة
ويفرح قلبك ويسعدك يارب
————————————-
————————————- مواضيع هذا القسم برعاية
مي النجار مي النجار ممنوعة من المشاركة Fatakat 940078 كايرو – مصر