السلام عليكم ورحمه الله وبركاته
طبعا كلنا بيفضل مننا بواقى اكل ومش بنعرف نعمل بيهم ايه وخصوصا فى العزومات …صح ؟
ونظرا للحاله الاقتصاديه الراهنه وكمان عشان حرام نرمى الاكل ده يبقى لازم نفتكس بما اننا ستات بيوت شاطرين واهو كمان يبقى تغيير فى نوعيه الاكل بتاعنا
واى حد عندها اضافه اهلا وسهلا
نبدأ :
بواقى المكرونة
كملي عليها بكشري
لو عندك شوربة كريمة بالماشروم بواقي حطيهم
عل بعض ف الفرن بدل ما تعملي باشميل
لو باقي عندك مكرونة مسلوقة حطى عليها حبنة رومى وقلبي فى الحلة هتسيح وتبقي تحفة وممكن تقطعى عليها فلفل اخضر كمان بتكون جميلة
وبالهنا
بواقى البفتيك او البانيه
قطعيهم و اضربيهم فى الكبة بيبقوا مفرفتين افرديهم على البيتزا بدل البسطرمة او السجق
ممكن كمان تفرميهم و تحشى بيهم سمبوسك او اى فطائر مع فلفل كوبى مقطع صغير و زتون
الطماطم
لو كان عندك شوية مستويين وخايفة يبوظو
اضربهم فى الخلاط ……… وحطي شوية زيت صغيرييييييييييييين فى حلة على النار
وأول مايسخن الزيت شوية ضيفي عليه عصير الطماطم اللى عملتة
وسيبي الخليط ياخد غلوتين ع النار
وبعدين أطفى عليه من غير ما تحطي عليه أى حاجة تانية
وبعد ما يبرد حطية فى أكياس حسب الإستعمال بتاعك بعد كدا
ودى بتكون صلصة طماطم جاهزة للمكرونة والطبيخ بعد كدا
وبتبقى ريحتها رووووووووووووووووووووووووعة فوق ما تتصورى
ولو كنتي عاوزة تستعملها للمكرونة
حطيها فى حلة تفك على النار فى دقايق
وضيفلها شطة وكمون وملح
وببالهنا
اللحم العصاج
ده كنز لا يفني خدي عندك
مسقعة
مكرونة بشمل
بيتزا_سمبوسة
بطاطس بيوريه
ممكن ابشري بصل وتوم وصفريهم بشوية زيت_ملح_فلفل_بهارات_شطة_
كمون
عليهم جزر مبشور _مكعبات فلفل اخضر
لحد ما يتشربوا ثم ضيفي اللحمة ووطي النار ربع ساعة
هتبطلي تشتري شاورما
وهتلاقي طعم الجزر جميل جدا_دي تنفع مع بواقي الفراخ لما تخليها_فراخ مفرومة_لحمة مفرومة نية
بواقى الجمبرى والسبيط اوالماكولات البحرية
خديها واعملها اعادة تدوير وضعيها فى الرز مع البصل والبقدونس والكمون بيقى تحفة
واهو تغيير عن المقلي والمشوي
وبالهنا
والجبنة البيضا
لما تبقى قعدت عندك فترة وخلاص زهقتي منها انتي واولادك
قطعى فلفل رومى عليها و ممكن زيتون مقطع صغير كمان و رشة زعتر وممكن مستطرده وبقدونس ونعناع ناشف
و احشى بيها الفطاير او السمبوسة
بواقي كبدة – فراخ – شاورما – لحمة
اي حاجة تنفع حشوة سمبوسة او بيتزا تشيلي كيس ف الفريزر تجمعي الحاجات الي تنفع
حشوات ويوم السمبوسة تبقي جاهزة ومنوعة كمان
الفطير
اللى بينشف شيليه فى الفريزر
واعملي بيه ام على والله بيبقى روعه عن تجربه واحيانا بعملها كمان ببواقى الالباتيه بس الساده طبعا والكرواسون
وبالهنا
الكورن فليكس
لو عندك بواقي كورن فلكس مكسر يعني الولاد مش هاتعرف تاكله اطحنيه شوية وزودي بيه بقسماط البانيه بيبقي احلي بكتير
بواقى السمك
لما بيفضل عندى سمكة او اتنين من السمك المقلى بحطه فى كيس فى الفريزر وبجمعه وفى يوم بجيب بصل وطماطم وفلفل وبقدونس واعمله فى الفرن مع الكمون والنعناع الناشف والتوم والريحان بتبقى ريحتها روووووووووووعة
بواقى الارز
الرز باعمله فتة
حمريله شوية شعرية ويبقي رز بشعرية
او حمري شوية رز ويبقي رز حبة وحبة
1) بشيله فى الفريزر و لما اجمع حبه مناسبين اضيف له مكرونة مسلوقة و عدس بجبة و يبقى كشرى
وطبعا اعمل دقة و حمص الشام و بصل محمر
2)افضل اجمعه لغايه لما يبقى عندى كمية و افرد نصه فى الصينية و احط فوقهم شوية جزر و بسلة مستوين و 3 او اربع معالق عصاج و افرد باقى الرز فوقهم
وعلى الوش شوية بشاميل و ادخلهم الفرن لغاية لما الوش يحمر و دى صينية الرز بالبشاميل
3) ازوده على كفتة السمك
بواقي صينية البطاطس بالصلصة
كفته البطاطس بالصلصه
تاخدى البطاطس بالطماطم وتهرسيها كويس جدا
وبعدين تحطى عليها شويه بقسماط عشان يمسكها
وتعجنيها وبعدين تعمليها صوابع كده
وبعدين تقلبيها بشويه دقيق وتحمريها فى الزيت وحطيها فى الصلصله الى هتعملها وهى
عبارة عن شويه ثوم على زيت فى حله صغيرة وشويه عصير الطماطم و وملح
وفلفل وكمون وخلاص
ملحوظه….
اول ماتحطى الكفته اقفلى النار على طول عشان مش تفك منك
وبالهنا
يارب الوصفات تكون عجبتكم
مواضيع هذا القسم برعاية
ستراديفاريوس ستراديفاريوس سوبر فتكات Fatakat 168896 بلاد الله -أرض الله – السعوديه