لعبتنا انهاردة اسمها اصوات متشابهة
اهم حاجة ف اللعبة دي اننا نجمع شوية علب فاضية حوالي عشرة مثلا
وعاوزين كمان زراير وملح وحبوب مختلفة
هنحط كميات متساوية من كل الحاجات دي يعني مش هنحطهم على بعض احنا هنحط كل حاجة ف علبتين متساويين ويعني هنحط حبات الارز ف علبتين وحبات الملح ف علبتين والزراير ف علبتين والذرة ف علبتين المهم يكونوا متساويين وممكن فول او رمل او زلط او قطع نقود من الكوينز
هنبتدي اللعبة ازاي ؟؟؟؟؟
هنلعبها بشخصين ….. هنقسم العلب على الاتنين زي بعض …
رج العلبة الاولانية واطلب من الطفل اللي قدامك انه يتعرف على العلبة اللي صوتها زي العلبة اللي انت رجتهامن العلب اللي قدامه
وبعدين ييجي دوره هو انه يرج العلبة وانت تتعرف على الصوت المشابه ليه
ازاي بقى ننوع اللعبة دي ونستخدمها اكتر ؟؟؟
ممكن اننا نرج العلبة مرتين وهو يرجها مرتين
او ترجها بايقاع معين وهو يكررها بايقاع معين زيها
ونقدر نسهلها او نعقدها على حسب مستوى الطفل
خلوا بالكم ان اللعبة دي مهمة جدا عشان الأدراك السمعي وده مهم جدا لاطفال التوحد وتشتت الانتباه وفرط الحركة وهيحبوها اوي لانهم بيحبوا الالعاب الايقاعية وغير كده ممكن نعمل منها ايقاع حركي مع ايقاع الصوت ونغير فيها كتير
وكمان اللعبة دي مهمة في الاعداد لجلسة التخاطب وجلسة تنمية المهارات مهمة جدا
والاهم من كده انها مهمة جدا للاخصائيين الاكاديمي لانها من المهارات المهمة قبل تعليم القراءة والكتابة
طيب تعالوا بقى نتعرف على المشاكل اللى ممكن تقابلنا وده مهم جدا
احنا عندنا اطفال ممكن متتعرفش على الاصوات الضعيفة من الاول زي الملح والرمل وده طبيعي فممكن نأخرهم شوية لغاية ما يحصل تركيز سمعي كويس ف العلب التانية لان مهارة التمييز السمعي من المهارات اللي بتحتاج وقت
حاجة كمان الاطفال اللي مش هتهتم باللعبة وهتسيبها وتقوم نعمل معاهم ايه ؟ …. ممكن اننا نجذبهم بالحاسة اللي بتشدهم اكتر زي مثلا نعمل الوان مميزة ف العلب دي او اننا نعمل ملمس مميز ليها عشان تشدهم اونحط روائح مميزة ليهم وده مهم جدا ومع الوقت نسحبها عشان التركيز يكون على الصوت ومحدش يقول تشتت انتباه لاننا هنسحبها مع الوقت
koko bskota koko bskota فتكات جديدة Fatakat 1054503 cairo – egypt