طبعا ثقافة مجتمعنا دلوقتى أتاحت لستات كتير إنها تسمع وتعرف عن سرطان الثدى وأعراضه وعلاجه وكيفية الوقاية منه واللى من أهمها الفحص الدورى بانتظام
هنا هنتعلم مع بعض إزاى كل واحدة تفحص نفسها بشكل دورى علشان تتطمن ولو فى أى حاجة لا قدّر الله تكتشفها بدرى
أولاً , الفحص ده بيتعمل بعد الدورة بأسبوع
——————–
ثانياً , بتقلعى هدومك ووانتى عريانة , تقفى قدام المراية وتبتدى تبصى على صدرك فى أوضاع مختلفة ( مرة وانتى إيدك جنبك .. ومرة وانتى إيديكى فى وسطك .. ومرة وانتى إيديكى ورا راسك .. ومرة وانتى موطية لقدام ) , ومن زوايا مختلفة ( مرة من قدام .. ومرة من الجنب .. ومرة من الجنب التانى )
زى كده
ليه ؟!! .. علشان تلاحظى أى ورم أو كلكيعة بدأت تظهر فى صدرك أو تحت الإبط , أى اختلاف فى حجم صدرك وتقارنى الاتنين ببعض , أى اختلاف فى مستوى صدرك ولو واحد اترفع عن التانى , لو الجلد ظهرت فيه حفر أو كلاكيع , لو الحلمة اتحودت على جنب أو دخلت لجوه
خدى بالك ان فى ستات طبيعى عندها ان الحلمة داخلة لجوه إيه اللى يفرق إن دى طبيعتها ولا ده نتيجة ورم ؟ …… حاجة اسمها الأخدود اللى هو حفرة حوالين الحلمة محاوطاها دايرن داير
للتوضيح
ده شكل الحلمة الطبيعية
وده شكل تراجع الحلمة كعيب خلقى وليس ورم
وده شكل تراجع الحلمة نتيجة ورم وبااااااين الأخدود أو الشق اللى قلنا عليه حوالين الحلمة
وأهم حاجة فى الخطوة دى هى مقارنة الناحيتين ببعض
———————
ثالثاً , وانتى قدام المراية تبتدى تفحصى صدرك بإيدك
إزاى ؟! … إرفعى إيد واحدة ورا راسك وحسى بالإيد التانية ( يعنى لو هتفحصى الصدر اليمين يبقى هترفعى إيدك اليمين ورا راسك وتفحصى بالشمال والعكس )
زى كده
وتبتدى تحسى صدرك بصوابعك بالشكل ده ولازم الـ 3 إتجاهات دول
صوابعك لازم تكون مفرودة ومضمومة وتحسى بأطرافها بحركات دائرية مع ضغطة بسيطة
زى كده
——————–
رابعاً , وانتى قدام المراية بردو تبتدى تفحصى منطقة تحت الإبط
ليه ؟! …. علشان تطمنى على الغدد الليمفاوية لأنها هى البوابة اللى بيعدى منها الورم لباقى الجسم فلو فيها حاجة يبقى أكيد فى ورم وعلى أساسها بنحدد مرحلة الورم
طبيعى إنها مبتكونش محسوسة , يبقى لو حسيناها عاملة زى الكلاكيع كده ده معناه إن أكيد فيها مشكلة
فى 6 مجموعات من الغدد الليمفاوية تحت الإبطية
إزاى هنفحصهم ؟! …
1- هترفعى إيدك ورا راسك بنفس الطريقة اللى قولنا عليها وتحسى بالإيد التانية
2- صوابع إيدك مفرودة ومضمومة على بعضها وتبتدى تحسى بأطراف الأصابع
3- هتحطى إيدك تحت الإبط وبحركات دائرية كده تبتدى تحسى ( كأنك عايزة تحسى بلية أو كورة كده فبتعملى بأطراف صوابعك حركات دائرية ) زى ما قولنا قبل كده
4- هتبتدى بمنتصف الإبط الأول علشان تحسى الـ central group وبعدين تزقى إيدك ناحية جوه أكتر (لفوق يعنى ) علشان تجيبى الـ apical group وبعدين تنزلى إيدك فى الإتجاه المعاكس (لتحت يعنى ) علشان تجيبى الـ medial group
5- وانتى رافعة إيدك فوق راسك كده بتلاقى فى خطين بانوا عند الإبط ونازلين لتحت كده .. واحد قدام وواحد ورا
وضعية إيدك بتكون كده علشان تعرفى تمسكى الخطين وتحسيهم
بتبتدى بالخط اللى قدام وبنفس الحركات الدائرية اللى قولنا عليها وده علشان تجيبى الـ Anterior group وبعدين تمسكى الخط اللى ورا بنفس الطريقة علشان تجيبى الـ posterior group
6- بتحسى الجزء من الدراع المرفوع اللى قريب من الإبط علشان تجيبى الـ lateral group
الحتة دى من الدراع يعنى
7- بتحسى الغدد الليمفاوية اللى فوق عظمة الترقوة اللى هى الـ supra-clavicular LN
الخطوات دى أهم وأصعب خطوات فى الفحص كله وعلشان كده طولنا فيها وأتمنى أكون وصلتهالكوا بشكل سهل
——————–
خامساً , وانتى واقفة تعصرى الحلمة بإيدك علشان لو خرج منها أى سائل أو دم أو صديد أو لبن فى واحدة مبترضعش , وتلاحظى كويس الجلد بتاعها لو فيه أى كلاكيع أو لونه متغير أو فيه حاجة مش طبيعية
——————-
سادساً , وانتى قالعة هدومك تنامى على ضهرك وتحطى الإيد اللى ناحية الصدر اللى هتفحصيه تحت راسك ( يعنى لو هتفحصى الصدر اليمين يبقى ترجعى إيدك اليمين تحت راسك وتفحصى بالإيد الشمال وهكذا زى ما قولنا قبل كده ) وصوابعك تبقى مضمومة ومفرودة بردو وتبتدى تحسى صدرك بنفس الطريقة اللى قولناها قبل كده فى الإتجاهات دى
يارب تكونوا استفدتوا واكون قدرت أوصلكوا الطريقة بشكل كويس
دعواتكوا ليا إن ربنا يجعله فى ميزان حسناتى ويهدينى ويسترنى ويباركلى ويتمم جوازى على خير
متنسوش التقييم
Dr_Hend Dr_Hend 188277_1.gif فتكات حبوبة Fatakat 188277 الزقازيق – مصر