السلام عليكم ورحمة الله وبركاته
والصلاة والسلام علي الحبيب محمد الرحمة المهداة للعالمين وعلي أله وصحبه وسلم
حبايب قلبي واخواتي في القسم هنا
احبائي ممن يحملون شارة لن نيأس ابدا ولنا رب اسمه الكريم العاطي الوهاب
امهات المستقبل القريب بإذن الله
,,,
قررت اخيرا ان اكتب تجربتي لكم وانقلها بكل أمانه عسي الله ان ينفع بها اخوتي
ممن يعانون مثلي من كابوس العصر الحديث داء تكيس المبايض
وليس لي رجاء سوي ان يجازيني الله خيرا
ولست طالبة منكم سوي الدعوات الطيبة بالصحة وسعة الرزق
لن اطيل في المقدمة اكثر وسننطلق سويا لتتابعوا معي رحلتي
من البداية وتراقبوا اخطائي وخطواتي الناجحة بالتفصيل
…….
مع الاخذ في الاعتبار ان التكيس مرض علاجة بأمر الله ليس مستحيلا هو
حالة ارتجال واضطراب في الهرمونات عندما يتم
السيطرة عليها مع طبيب ماهر بشكل او بأخر تكون النتائج ايجابية
هنا هكتب باللغة الدارجة العامية عشان نفهم بعض وتكون الامور اوضح اتفقنا …؟
أولا: أعراض تكيس المبايض
اللي حصل ان من وانا في مطلع العشرينات من عمري وبدأت تظهر الاعراض بتاعة المرض ده وانا
طبعا مش واخدة بالي ومش فاهمة وبالطبع ساهم في زيادة جهلي الاطباء اللي كنت بزورهم ساعتها
كانت دورتي تتأخر بالشهر والشهرين استغربت وخصوصا انها كانت مظبوطة بالساعة
وطبعا اي دكتورة بلدياتي تشوفني او دكتور يفحص بالسونار الخارجي الرحم من علي البطن
خوفا من ان يكون في ورم او عيب معين في الرحم او شئ طارئ وكانت دايما النتيجة
انه بيقعد او بتقعد ع المكتب مشكور ويكتب ادوية تنزل الدورة بالعافية
زي سيكلو بريجونوفا وده مصيبة المصايب وعلاج ملوش لازمة
بينزل دورة صناعية ملهاش لازمة وبياخدوه الستات اللي في سن اليأس يعني مش علاج لحالتي خالص
ومرت السنين
وانا اخد الحبوب دي 3 شهور تنزل الدورة لونها بني وصناعية وبعدها اسيب الحبوب
تنتظم من سنة ل 6 شهور بالكتير قوي
وده لاني كنت صغيرة والتكيس كان في بدايته
وبعدين بدأت تظهر عليا الأعراض التانية بقي اللي تدل بما لايدع مجال للشك
اني متكيسة وطبعا انا مكنتش اعرف حاجة عن المرض ده
وبالطبع الدكاترة اللي كنت بروحلهم شفاهم الله من البلاهه
,,,,,
ظهر عندي زيادة وزن وخصوصا في البطن
ظهر شعر زائد في اماكن غير مرغوبة زي الذقن والشارب
وكمان زادت الشعيرات في كل حتة في جسمي
وظهرت المصيبة الاكبر شعر في اوراكي وظهري وبطني
ثانيا : اكتشاف وتشخيص المرض
للأسف المرحلة دي انا اتأخرت فيها كتتتتتتتتتتتتتتتتتتتييييييير قوي
هتقولوا كتير قد ايه هقولكم 10 سنين ايوة متتخضيش ياحبيبتي
10 سنين معاناة ووزني طالع مش نازل وتعبانة ودورتي تنقطع بال 5 شهور وال 4 شهور
وتنزل بالعلاج وانا ولا انا هنا وتعبت قوي قوي وبدأت اشوف اي طريقة اشيل بيها الشعر الزائد
اللي عندي لاني كنت قرفت منه وداخلة علي جواز وارتباط
وساعتها مكنتش اعرف ان الشعر الزائد ده عرض لمرض مستشري جوايا وانا مش حاسه
ومكنتش اعرف اني المفروض ابدأ من جوة مش من برة
ومكنتش اعرف اني طول ما وزني زايد وعندي شعر كتير ودورتي متلخبطة
يبقي بدور في دائرة مفرغة اسمها مرض التكيس
ملحوظة:" في بنات ونساء معندهمش شعر كتير بنفس الدرجة اللي عندي ودورتهم مظبوطة
الي حد ما وممكن تكون مظبوطة فعليا ووزنهم برضوا مش تخين ولكن متكيسات
الفكرة ان التكيس درجات وانا كان عندي الدرجة الأسواء نتيجة سوء التشخيص من البداية
وكمان حابة اضيف ان علاج التكيس للنساء البدينات اسهل بكتير لانها مجرد ما تخس بتقطع نص الطريق
للعلاج غير الرفيعة اللي الدكتور غالبا بيديها سيستم مختلف من العلاج واحيانا في حالات
مستعصية بيلجأ لتثقيب المبيض
نكمل كلامنا
وساعتها كنت اشتركت في منتدي فتكات حبيب قلبي وبحثت عن طرق ازالة الشعر
ولقيت موضوع لعضوة رحمها الله اسمها الفتوكة شوكة
ودي كانت الشمعة اللي نورت حياتي ,,اسألكم الدعاء لها بالرحمة
المهم
لقيتها بتقول قبل العلاج بالليزر للشعر الزايد او اي طريقة المفروض نحلل تحاليل معينه
ممكن يكون في اضطراب هرموني او تكيس مبايض وكتبت اعراض التكيس ده وطلعت اللي عندي بالظبط
انا طبعا ساعتها روحت كشفت عند دكتورة طلعت بتفهم بنسبة 30% مثلا عملت سونار بطن
ووزنتني وقالتلي خسسي وزنك وكتبت دواء سيدوفاج فقط وشخصت ان انا متكيسة
لغاية هنا وانا لسه ممسكتش بطرف الخيط وكمان كنت لسه باخد حبوب السيكلوبريجونوفا
وهي كتبتها برضوا للاسف…. وكنت لسه بدور وألف في نفس الدائرة المفرغة
اللي كسبته فقط من المرحلة دي وطلعت بيه ان انا مريضة تكيس لامحالة
وبدأت رحلة البحث والتنقيب عن دكتور ماهر ومتميز يريحني من كل الخزعبلات دي
وكمان بدأت اقرأ باستفاضة عن المرض وعرفت كل حاجة عنه تقريبا
ومش هكتب هنا كل حاجة لانك ببساطه تقدري تكتبي علي جوجل تكيس مبايض هيديكي تعريفة
واعراضه انا هدفي هنا اوضح علاجي انا وخطواتي اللي اتبعتها وبس
ثالثا: العلاج
يااااااااااااااااااه اخيرا قدرت اوصل اخير ا ربنا اكرمني وقدرت احط ايدي علي الطريق بعد تحريات
وترشيحات لأطباء وطبيبات قدرت اوصل للعبقري الراااااااااااائع
دكتور / عادل فاروق البيجاوي
احسن طبيب في مصر والعالم العربي في علاج التكيس من وجهة نظري
ده مش تحيز ولا اعلان ولا دعاية ويشهد الله هو في غني عني وعن غيري وشهرته تسبقه
,,قررت التوكل علي الله وعزمت واعديت العدة وسافرت للقاهرة
لأني من الاقصر الصعيد الجواني يعني
وده يديكي يا حبيبتي مثال انك متفرطيش في صحتك وحاجة تخص جسمك
وحياتك عشان مشوار بعيد مثلا اطلبي الطب والتداوي ولو في اخر
الدنيا الصعيد مفيهوش طب مع كامل احترامي لأي حد
وكان قدامي ساعتها مهمتين لاني كنت عروسة فاضل علي فرحي 40 يوم بالتمام والكمال
المهمة الاولي اشتري فستان الفرح ولوازم الزفاف والمهمة الثانية والاهم اني ازور دكتور عادل
وفعلا زرته واذكر اني كنت في شهر رمضان المبارك 2024
طلب مني تحليلات اجريتها عنده بالعيادة وساعتها مكنتش اعرف اني المفروض اروحله
تاني او تالت يوم الدورة لأن التحاليل المطلوبة بتتعمل في الايام دي
وهي تحاليل fsh وده هرمون مسؤول عن التبويض
وlh وده هرمون بيفرز من المبيض برضوا وزيادته تعني زيادة هرمون الذكورة
ومعناه الاصابة بالتكيس
وtsh ,وده هرمون الغده الدرقية وزيادته او نقصة تعني ان هناك اضطراب في التبويض
واخيرا هرمون البرولاكتين او هرمون اللبن باللغة الدارجة
وده طبعا مهم لانه بيكون زايد غالبا مع المتكيسات وبيعوق عملية التبويض
انا للاسف مكنتش عاملة حسابي
وروحت في اليوم 21 للدورة
وساعتها اضطر انه يعملي هرمون e2 وده بيدل ان المبيض بينتج بويضات ناضجة أو لا
وهرمون البروجيستيرون وده برضوا بيعمل دلالة علي تمام التبويض وخروجها
البويضة من المبيض كل شهر
يعني الاتنين برضوا يفوا بالغرض ويوضحوا ولو بنسبة معينه اصابتي بالمرض او لا
وعملت هرمون اللبن لانه ينفع برضوا في اي يوم طالما ملحقتش تاني او تالت يوم الدورة
وعملتهم والمفاجأة!!!!!!!!!!!!!!!!!!!!
نكمل المفاجأة المشاركة الجاية
عشان متملوش
ممكن اطلب طلب
متنسوش التقييم
لو عجبكم
أريج وردة أريج وردة 206124_14.gif فتكات ست الكل Fatakat 206124 الاقصر – مصر