في البدايه احب اقولكم اني الحمد لله ولدت من اسبوعين وجبت بنوتي تيا ربنا يحميها و يبارك فيها يارب
انا ولدت الحمد لله طبيعي بس بطلق صناعي مع اني معداش عليا غير اسبوعين في التاسع بس كنت زهقت قوي و تعبت جدا و قولت للدكتوره مش قااااااااااااااااااادره عايزه اولد بقه
المهم بعد تاني كشف نساء في التاسع قالتلي انت الرحم عندك فاتح 2 سم و ده كويس قوي اننا ناخد طلق صناعي … روحي يوم الاربع المستشفى و هاولدك
قولتلها يا دكتوره انا والده ابني المره الاولانيه طبيعي انت ناويه تولديني قيصري ولا ايه !!! قالتلي لا طالما الرحم فتح عندك 2 سم يبقى احنا ممكن ندي طلق صناعي و تاخدي حقنة الضهر و تولدي طبيعي ان شاء الله
قولتلها انا مش عايزه اروح المستشفى تقومي تقوليلي بعد ما اخد الطلق لا ده الميه قلت لا ده النبض قل و لازم نفتح بطنك
قالتلي يا بنتي ماتخافيش وكله بامر ربك
استخرت ربنا و اتكلت على الله و ادتني اسم لبوسة طلق صناعي اخذتها في البيت و قالتلي بعد 4 او 5 ساعات تعالي المستشفى نشوف الرحم اتوسع قد ايه
انا حطيت لبوسة الطلق الصناعي في البيت الساعه 6 الصبح ونمت وصحيت الساعه 9 على مغص خفييييف بدأ يزيد سنه على الساعه 10 و سنه اكتر على 11 و على الساعه 12 كانت بعيط من الوجع و الالم
روحت المستشفى الساعه 11ونص ومن حظي المنيل الدكتوره كانت متعقمه وفي العمليات فضلت اتوجع في الرسيبشن بتاع المستشفى لحد الساعه 12 وربع وكان مغص لا يحتمل
جت الدكتوره كشفت عليا نسا قالت انتي كده الرحم فاتح 4 سم ادخلي على التخدير يالا خدي الابيديورال (حقنة الضهر )
دخلت و كانت اصعب لحظه انك تقعدي بطريقه معينه و ثابته علشان تركبي الحقنه في ضهرك وانت عندك طلق بس الحمد لله ربنا قدرني بالاستغفار والله و الدعاء
المهم الحقنه ديه اخدت في تركيبها بتاع ساعه الا ربع خدت ساعه الا ربع ليه بقه ؟ علشان التعقيم و تجربة الفقرات و تخدير الضهر الاول قبل حقن الابيديورال وبعد كده تركيب الابيدورال و تلزيق القسطره اللي هايحقنولك فيها المخدر كل شويه اثناء العمليه
بس وبعد ما اخذت الحقنه الجزء التحتاني كله مابقتش حاسه بيه نهااااااااائي ورجلي مابتترفعش اصلا وهما اللي بيحركوني من السرير ده لده و هاكذا خلاص طبعا وجع الطلق مش حاسه بيه ولا كشف النساء
وكل شويه تدخل تقيس وتقولي 6 داخلين على 7 سم وعلى 8 سم فتحت كيس المايه بأديها وطبعا كل ده انا شايفه بس مش حاسه باي حاجه ودخلت على العمليات 10 سم
فضلت اضحك و اهزر مع الدكتوره و المساعده و نحكي حكايات
ودكتور التخدير جه في بداية دخولي العمليات زود جرعة المخدر و حقن طلق صناعي في المحلول
وبعدين هما بقه كل ما تيجي طلقه ماعرفش بيعرفوا منين يقولولي احزقي جاااااااااااااااااامد و انا بحزق طبعا اكشن بس انما مش حاسه بحاجه
وعلى كده لحد ما الراس مسكتها الدكتوره وقالتي يالا الراس في ايدي احزقي جااااااااااااااااامد و راحت المساعده و انا بحزق في الحته ديه نامت على بطني وزقت جامد بأديها
بس و شفت بنتي وهيا طالعه و هما بيقصوا الحبل السري و قعدت تخيط بعد كده وتنظف بطني وبعدين خلصت الحمد لله
و بعد ما حموا تيا جابوهالي كنت انا خلاص طالعه من العمليات نازله غرفتي شفتها وخدوها ودوها البيبي كير تدفى وانا نزلت الغرفه اكلت و بعدين نمت شويه و جابوهالي ارضعها و بس كده
طبعا المؤلم بعد كده الخياطه من تحت بس هيا يومين او 3 بالكتير و بتبقى زي الفل و بتعيشي حياتك طبيعي
الخلاصه ان بجد حقنة الظهر ديه حاجه جميله قوي قوي قوي بترحمك من عذاب الطلق و الوجع
والحمد لله لا حسيت بصداع ولا بألم في عمودي الفقري ولا الحاجات اللي بتتقال ديه انا يمكن حسيت بوجع بسيييييط جدا مكان الحقنه لمدة يومين بس
وتوته توته خلصت الحدوته
( انا ولدت مع دكتوره فكريه سلامه وفي مستشفى كوينز في صلاح سالم )
ربنا يكتبلكم كلكم ساعه سهله يارب و يهونها عليكم و تشوفوا ولادكم في احسن صحه و قوموا بالسلامه
واي سؤال انا حاضره و عيوني ليكم
الزوجة الصالحه الزوجة الصالحه 12016_1.gif فتكات ست الكل Fatakat 12016 مدينة نصر – القاهره