السلام عليكم ورحمة الله وبركاتة
ازيكم يا احلي قمرات
انا جيالكم النهاردة بموضوعي دة بعد الحمدالله ما ولدت بالسلامة
والنهاردة بقي هقولكم تجربتي كلها مع الولادة ومع البنج الكلى
طبعا انا ولدت قيصري لكذا سبب
اولا انا نفسيا كنت عايزة اولد قيصري مش لانها سهله لكن عشان انا عرفت الولاده ومتاعبها ايه لما اختى ولدت طبيعى وشفتها وهى بتتعذب فى الطلق يوم كامل
ثانيا ان المشيمة نازلة عندى من الخامس وكمان لزقت فى جدار الرحم على اخر الحمل
ثالثاان الضغط عندى عالى· ودى طبعا اسباب كافية
بصي بقي يا ست الكل اول حاجة : مرحلة ما قبل الولادة (سواء طبيعي او قيصري ):-
– طبعا انتي لازم تكوني متابعة كويس مع الدكتور بتاعك يعني علي الاقل مرة كل شهر
– كمان لازم تاخدي الادوية اللي الدكتور قايلك عليها ومتطنشيش
– اهتمي بالنظافة الشخصية واعملي دايما تشطيف بمطهر يكون الدكتور قايلك عليه وبانتظام لان في الاخر بيكون في التهابات كتير وده غلط علي البيبي لانك برضه لسه مش عارفة هتولدي طبيعي ولا قيصري
– كمان اهتمي بالتمارين الرياضية البسيطه علشان لوولدتي طبيعي يبقي الموضوع سهل باذن الله
– خلي بالك من بدايه الشهر التاسع لازم تكون شنطتك وشنطة البيبي جاهزه تحسبا انك تولدي في اول التاسع محدش عارف
– حاولي تشغلي نفسك بقرايه كتب عن الاطفال الرضع والعناية بيهم انا عارفه الفترة دي بتبقي غلسة شوية بس حاولي متقلقيش نفسك وانشغلي بالقراءه المفيدة
– اهم حاجة وعلشان متغلطيش الغلطة اللي انا غلطتها بالله عليكي خلي بالك من موضوع تدليك الحلمة من بداية التاسع علشان ميحصلش فيها تشققات وتتعذبي زي ماانا اتعذبت والتدليك بيكون كريم اسمه بيور لان ممتاز وكريم لجنوكايين مخدر عشان متحسيش بألم بس المهم انك تدليكيها يوميا كذا مرة وتسحبي الحلمه لبرة علشان البيبي يعرف يرضع
– عليكي بقراءة القران الكريم حلو قوي ليكي لانه بيريحك جدا وللبيبي بتاعك لانه بيبقي سامع وبياثر بيه كمان
– اعملي سويت من بداية التاسع هتقوليلي طيب ممكن اعمل وما اولدش هقولك مش مشكله اعملي ولو اعدتي فترة 3 اسابيع مثلا ومولدتيش اعملي تاني وممكن لو لقيتي الشعر طالع قصير ومش هينفع سويت وانتي نازلة رايحة المستشفي يبقي مفيش غير الكريم مع اني مش بحبه بس مضطرين ومرة مش هيحصل حاجة
· هنسيب اللي هتولد طبيعي وندعيها ربنا يقومها بالسلامه نيجي بقي للي هتولد قيصري لاي سبب يستدعي ده :-
– هتاخدي حمام دافئ وتتوكلي علي الله وهتروحي المستشفي
اولا : نتكلم عن المستشفي
بسم الله ماشاء الله بجد المستشفي رعايتها تحفة من اول لحظة دخلت فيها المستشفي علشان يحضروني للولادة نضافة ملهاش مثيل وتعامل الممرضات كلهم بجدعشرة على عشرة و في منتهي الاحترام
ثانيا: الدكتور ضياء
مهما اتكلمت علية مش هجيلة حقة بجد ربنا يكرمة يارب دكتور في منتهي الاحترام وبيراعي ربنا جدا وكان مهون عليا الولادة جدا وواخد الموضوع ببساطة دة غير بقي اني كنت خايفة جدا من موضوع ان المشيمة عندى نازلة ولازقة فى عنق الرحم وان ممكن يحصل نزيف ومضاعفات غير بقاالجرح وتقفيل الجرح والالم اللي هسحة بعد العملية لكن اقسملكم بالله ان مانزلش ولانقطة دم وهما بيخرجوا المشيمة وكمان الجرح في منتهي الجمال وهما بالضبط 3 ايام اللي حسيت بيهم بالالم وبعد كدة قمت زي الفل والجرح معمول بطريقة تجميليلة بجد ربنا يباركلة وبنصح اي واحدة تروح تتابع معاة
ثالثا: البنج الكلى
كنت محتارة جدا بين البنج الكلي والنصفي لاني قريت كتير عن مزايا وعيوبالاتنين ولما سالت الدكتور هو شخصيا كان مرشحلي الكلى
المهم وصلنا المستشفى الساعه 9 الصبح كنت صايمة قبلها ب6 ساعات وبعدين خلصنا الاجراءات وطلبوا منى عينة دم عشان يعملوا شوية تحاليل قبل العملية وطلبوا منى كيسين دم عشان لو لقدر الله حصل نزيف رحت اشتريتهم من بنك الدم طبعا باجراءات معينة وتحليل الفصيلة وعينة الم عشان يعملو توافق وبعدين طلعت على السويت اللى كان الدكتور حاجزهولى وجات الممرضة لبستنى روب العمليات والاوفر هيد والاوفر شوز وبعدين نزلونى على غرفة العمليات و
الدكتور جة وقالي يالا مستعدة قلتلة اةة وطبعا انا عاملة فيها الشجاعة قوي وقلتلة علي فكرة انا شفت علي النت الولادة القيصرية وعارفة انت هتعمل اية قالي طب كويس وقعد يضحك
طبعا هما حاطين ملاية بيني وبين الدكتور وقعد بقي دكتور البنج يرغي معايا شويةونفتح في مواضيع وفجأة محسيتش بنفسى الا وبابا بيفوقنى وبيقوللى
خدي رودى
يالهوووووووي بنتي
انا بقا مش عارفه انا فين اصلا
طبعا احساس مش هقدر اوصفهولكم اول ما حطلي بنتي علي خدى بوستها وراحوا واخدينها منى لانى مش قادرة اشيلها
وبعدين الدكتور جه وقال لماما على التعليمات والنصايح اللى بعد الولادة ،، انا دخلت غرفة العمليات 12 الضهر ومن بعد مافوقت بقي عينكم ماتشوف الا النور ههههه
بعدها بقي بدأت اقوم وطبعا عذذذذذذذذذاااااااااااااااااااااااااااااااااب واللي جرب القيصريه اكيد هيعرف اول مرة يقوم فيها دي يعني ايه…. بس الحمد لله ربنا قواني ابتديت بقي احس بألم العملية بس طبعا الدكتور كان كتبلي علي مسكنات قوية بصراحة دة غير الممرضات بقي مسبونيش اليوم دة لدرجة اني بقيت اقولهم سبوني شوية عاوزة انام كل شوية واحدة تدخل اللي تقسلي الحرارة والضغط وجه تلاته غيرولى وادونى شاور دافى وادوني حقنة ومسكنات وكل حاجة ممكن تتخيلوها
والحمدالله عدت علي خير هو اول يوم بس التعب وتاني وتالت يوم بقيت احسن شوية الالم طبعا كان موجود وخصوصا الالم الضهر من النومة بس مع المسكنات كلة بيعدي
بالنسبة للبيبي بقي :
دكتور الاطفال جه اطمن عليها وقال يرضعوا البنت لبن صناعي لغاية مافقت بقوا كل شوية كانوا يجبهولي ويقولولي حطيها علي صدرك علشان ترضع
والحمدالله ربنا رزقني ب أحلى رودينا فى الدنيا
دي تجربتي بالكامل في مستشفي الشروق مع الدكتور ضياء عجلان
انتوا عارفين انا قعدت اكتب قد ايه.. اي واحده هتخرج من غير ماترد هيه حرة وانا تحت امركم في اي سؤال او استفسار
ادعولي ربنا يبارك لي في بنتى ويخليهالى
وربنا يكملكم علي خير ويرزق كل مشتاقة يارب 
التقييم: 
وئام عبد المجيد وئام عبد المجيد فتكات رائعة Fatakat 286600 كفر الزيات – مصر