اذيكم يافتوكات ياحوامل يارب يقومنا كلنا بالسلامه ونحضن بيبيهاتنا وهما بصحه كويسه كده وسالمين وتكون الولاده سهله يااااااااااااااارب
انا بقا فضيتلكم اخيرا اول مابدات التاسع سبت الشغل وكده هتلاقونى قعدالكو بقا على طول فاضيه ادعو الشهر ده بقا يعدى على خير انا اهو فالاسبوع التانى منه
المهم كنت عند الدكتوره بتاعتى وقالتلى كم معلومه كده قلت اقولهالكم لان اكيد فى كتير منكم ميعرفش وخصوصا الحوامل البكريات ذيى
قالتلى امتى اعرف انها ولاده ؟؟؟ امتى اروح المستشفى ؟؟
1) لما تلاقى ميه نزلت منك وغرقتك تعرفى انها ولاده ومتجريش عالمستشفى عادى لمى حاجتك براحتك وروحى لان المفروض تولدى خلال 24 ساعه (يعنى مش شويه ميه تجرى لا )
2)لو جالك مغص بيروح ويجى بفترات بتقرب مش بتبعد يبقى ده طلق ولاده يعنى لو هو فالاول بيجى كل ساعه بعد كده نص ساعه بعد كده ربع ساعه كده ده طلق وتروحى المستشفى لما تبقى مده صغيره ربع ساعه مثلا بين الطلقه والتانيه متروحيش بدرى بهدله عالفاضى
3) لو نزل عليكى افرازات بنى او مخاط بدم بسيط تعرفى انك هتولدى قريب خلال يومين ثلاثه
4) لكن بقا المهم لو نزل عليكى دم كتير ذى البيريود مثلا فى الحاله دى تجرى عالمستشفى جرى لان ممكن يكون لا قدر الله انفصال فى المشيمه وده خطر جدا عليكى وعالبيبى
وقالتلى كلى تمر حلو بيمنع النزيف بعد الولاده وبيقويكى
وقالتلى اتمشى كل يوم نص ساعه او ساعه
يارب اكون افدتكم لانى عارفه ان فى كتير ذيى اول حمل وميعرفوش حاجه
المهم ادعولى يابنات يسهل ولادتى لاحسن انا خايفه اووووووووى اووووووووى ويارب يارب يكرم كل واحده منتظره حمل اااااااااامين
semona20 semona20 172361_1.gif فتكات رائعة Fatakat 172361 القاهره – مصر