سلامي لكل الفتوكات
حبيت احكلكم تجربتي عشان ربنا يرزقني منكم بدعوة حلوة ان ربنا يثبتيلي الأجنة ويرزقني بطفل سليم معافى من غير زيادة ولا نقصان ياااااااااااااااااااااارب
قبل ماتكلم عن الحقن في كام نصيحة عايزة اقولهم:
1- اي فتوكة عندها تكيس (من اعراضه غزارة الشعر وظهوره في الوجه والصدر) وتحليل جوزها سليم (زي حالتي ) باقولها ما تستعجلش
اول حاجة تعملها تروح للدكتور وتعمل التحاليل المطلوبة منها وخصوصا هرمون التستيرون و البرولاكتين وبعد كدة تمشي على نظام غذائي و تحاول تخسس (منطقة البطن بالذات ) ولو كان في اي لخبطة في الهرمونات تحاول تظبطها
2- ما تفكريش تاخدي منشطات قبل سنة من جوازك
3-عيشي حياتك وماتفكريش ابدا في الموضوع ده عشان العامل النفسي مهم جدا
4-الكلوميد الكتير بيأثر على عنق الرحم
5- قبل الحقن اعملي عملية تلقيح صناعي العملية دي بتدي الدكتور خبرة في نوعية المنشطات اللي بيدهالك (لاني انا مثلا مبستجبش للفوستيمون)وممكن ربنا يكتبلك الحمل بعدها
6-ما تعمليش الحقن وفي اجازة بعدها (زي اجازة العيد مثلا )لان متابعة التبويض مهمة جدا جدا جدا … وياريت تكون متابعة التبويض كل يوم.
7- اللي عندهم التبويض ضعيف ياريت ياخدو معلقة او اتنين عسل نحل مع غذا ء ملكات النحل مع حبوب اللقاح مع طلع النخل على الريق.. مفيدة جدا جدا جدا
8-في ستات بيكون عندها فرصة حدوث استجابة زايدة للمبايض دي لازم تاكد على الدكتور ان هي تاخد الحقن التحضيرية او تتابع التبويض بشكل مستمر و في حالات مش مهم ليها الحقن دي(وطبعا كل المراكز الخاصة بتكتبها لانهم اهم حاجة عندهم المكسب (سعر الحقن دي غالية من 500: 700 جنيه ))
نبدا بقى في المفيد
انا كتبت الموضوع دة بالذات لاني قريت مواضيع كتيرة ان العمليات بتكلف 15 و 20 الف دة طبعا غير المصاريف النثرية وفي ناس بيكونوا من الأقاليم وبيعملوها في القاهرة واحنا عارفين ان السفر خطر جدا وخصوصا في اول اسبوع. والاقي مثلا كاتبين ادوية ب 160 جنيه مع انها شوية فيتامينات وبدايلها ب7وب10 جنيه … المهم
اول حاجة تعملوها تدوروا على مكان في نفس البلد اللي انتوا منها عشان الراحة
تاني حاجة في فرع في المستشفيات العامة اسمه الاقتصادي يعني كشف مقابل اجر و دة في كل فروع الطب والكشف دة تمنه 20 جنية وبتلاقوا اساتذةمعروفين بيكشفوا فيه
تالت حاجة اي تحاليل او دوا دوري في المستشفى الأول او في التامين الصحي(اذا كان عندك ) لو ملقتيش في معامل بتبقى عاملة تخفيضات للنقابات (نقابة التجاريين مثلا)
رابع حاجة حاولي تتفقي مع صيدلية انهم يعملولك خصم (اقل خصم هاتخديه 5% وانتي وشطارتك )
معلش طولت عليكم هبدأ بقى في حكايتي
انا رحت مركز الخصوبة بمستشفى الاسماعيلية العام ودة رئيسه الدكتور حسين مصطفى وكتبلي على البروتوكول اللي هامشي عليه وكان بعدها اجازة عيد(على فكرة انا معملتش تلقيح صناعي دخلت على الحقن على طول ؟؟)فطبعا مارحتلوش الا قبل عمية السحب بكام يوم وعرفت بعد عملية السحب اني حصلي استجابة زايدة للمبايض (ودي بتسبب وجود ميه في البطن وهي اللي بتعمل المشاكل دي) و كتبلي علي ادوية ومشيت وانا مش قادرة وبعد كدة حسيت اني مش قادرة اتنفس وبطني منفوخة اتصلت بيه قالي روحي على المستشفى ورحت المستشفى قعدت هناك اكتر من اسبوع والحمد لله خفيت بس كانت تجربة صعبة عشان كدة اي واحدة تحس بالأعراض دية تروح المستشفى على طول لان هناك بيتابعوها وبيصرفولها محاليل وادوية لوراحت في مستشفى خاص هاتكلف بالميت5 الاف جنيه والحمد لله
وفي ملحوظة كمان حبيت اديهالكم ان في مراكز بطنش حكاية المية دي وبتعمل عملية الترجيع عادي ودة عشان انهم لو اجلوا هايجمدوا الأجنة ودي بتكلفهم فلوس زيادة انما في المستشفى العام التجميد اول مرة بيكون ببلاش
نيجي للمهم سعر عملية التلقيح الصناعي 200 جنيه سعر عملية الحقن المجهري 4000 جنيه واعادة العملية ب 3500 جنية
وكمان خدي بالك قبل ما تعملي عملية الترجيع تعملي تحاليل الاجهاض علشان لو في حاجة تتعالجي منها……
و احسن حاجة في بلدي ان الكثافة السكانية مش عالية عشان كدة المركز هناك هادي ودة من حظي يعني اكتر حاجة شفتها هناك كانت 4 عمليات
و في النهاية دعوة حلوة من الفتوكات ان ربنا يثبت جنيني و يرزقني بحمل سليم معافى ان شاء الله امانة عليكم ادعووووووووووووووووولي واي استفسار انا في الخدمة
(
نفسي اخلف نفسي اخلف فتكات حبوبة Fatakat 571467 اسماعيلية – مصر
سبحان الله و بحمده