بسم الله الرحمن الرحيم
السلام عليكم ورحمة الله وبركاته
انا اتجوزت وانا عندي 19 سنة وحملت بفضل الله بعد جوازي بشهرين وربنا كرمني بابني عمرو
هو دلوقتي في اولي اعدادي،، وبعديه حملت تاني والحمل مكملش شهرين ونزل
مرحتش لدكاترة ولا حاجة ،، وبعد فترة حملت تاني وبردو مكملش شهرين ونزل
ورحت للدكتور وملقاش سبب معين للإجهاض ،، واداني منشط كلوميد اخدته شهرين
وربنا كرمني وحملت واخدت مثبتات حمل وكنت باخد بالي من نفسي في شغل البيت
وربنا تممه على خير ورزقني ببنتي الامورة دعاء الفرق بينها وبين اخوها 4 سنين و4 شهور
وهي دلوقتي في تانية ابتدائي وقبل ما افطمها حملت تاني لأني مخدتش ابداً وسيلة لمنع الحمل
عشان عارفة ان حملي صعب ،، والحمل كمل على خير وربنا كرمني بابني زياد هيدخل المدرسة
السنة الجاية ، وبعد زياد ما اتفطم حملت تاني والحمل مكملش شهرين ونزل والمرة دي كان
الموت اهون من العذاب اللي شفته لدرجة اني مكنتش بتحرك من قدام الحمام وجالي ضعف شديد
وبعد المرة دي بردو مخدتش وسيلة ومحصلش حمل تاني من ساعتها .
هتقولولي كدا تمام وربنا يباركلك ولدين وبنوتة زي الفل .
هقولكم انا مبسوطة والحمد لله وماصدقت انهم كبروا بس المشكلة ان جوزي معندوش اخوات
خالص وهو عايز عيال تاني وحماتي كمان نفسها ف بيبي تاني ولد او بنت بس هي بتطلب من ربنا ولد
المهم انا عارفة اني طولت عليكم رحت كشفت والدكتور اداني برشام شبه حبوب منع الحمل
مش فاكرة اسمه وكان الدورة ملخبطة وانتظمت ورحت بعدها في اليوم الـ11 من الدورة
وشاف البويضة قال البويضة حجمها كويس اوي 18 مللي فجوزي قاله مش هتكتبلها منشط
ولا أي حاجة؟ قاله لا مش مستاهلة ،
وبعدين الدورة جات الشهر اللي بعدها قبل يومين من معادها
يعني كانت يوم 21 ديسمبر جات يوم 19 يناير
والمفروض انها تيجي يوم 19 أو 18 فبراير عشان بيفرق معايا الشهر لما يكون 31 يوم
المهم انها مجاتش والنهاردة 23 فبراير بعد نص ساعة هيبقي 24
ومن ساعة ما أتأخرت يوم وانا مليش شهية شهية للأكل وكمان حاسة اني همدانة
وبحس بهبوط حتى وانا باكل ،، مش عارفة بئا بوهم نفسي ولا ايه الحكاية
بتمنى يكون مش وهم عشان افرح حماتي وجوزي لأنهم بيفرحو بكل مولود كأنه اول مرة
هستني كام يوم لو مجاتش الدورة هعمل تحليل واشوف
وهقولكم النتيجة سواء ايوة او لا
معلش طولت عليكم
ربنا يخليكم ليا وما يحرمنيش منكم ابداً حبيباتي
بحبكم كتيييييييييييييييييييييييييييييييييييير
$ زهرة الوادى $ $ زهرة الوادى $ 567124_1.gif فتكات نشيطة Fatakat 567124 القاهرة – مصر