السلام عليكم ورحمة الله وبركاته
ازيكوا يافتوكات
بعد فترة حرمان شوفتها ربنا رزقنى بالحمل الحمد لله ومع 9شهور رعب
عيشتهم حبيت اقولكم ان كرم ربنا فوق تخيل الكل
كنت مرعوبه ان زوجي يسافر قبل مااحمل وعرفت انى حامل قبل مايمشي بأيام بسيطه
برغم اننا فضلنا فترة كبيرة بدون حمل وعملنا كل الفحوصات وكل شهر نستنى والحمد لله ربنا كرمنا
وده بفضل ربنا والدعاء والاستغفار
ندخل بقى في الرعب من الولاده
فلانه تقولى القيصريه موووووت وعلانه تقولى الطبيعيه مووووووت واحترت
صليت استخارة وطلعت عالدكتور؛ بعد مازهقته من كتر التردد والخوف
والدكتور قالى ان ظروف الطبيعي مهيأه بس الجنين حجمه كويس والحوض ديق شويه
فيه امل في الطبيعي بس هتبقى ولادة متعسره شويه وانا افضلك القيصري
توكلت على الله وحددت الميعاد وقمت يومها فتحت فتكات وسبتلكم موضوع عشان تدعولي
وبحثت عن الأدعيه لتسهيل الولادة وخدتها معايا في ورقه وفضلت اقراها لحد مادخلت العمليات
اتوهمت من المنظر وخفت وانا كمان داخله على شبح تانى اللى هوة " حقنة البنج النصفي"
كلام وأوهام عنها من الناس والحمد لله
فضلت اقول اللهم لا سهل الا جعلته سهلا؛ واللهم يامسهل الشديد وياملين الحديد سهل امري
اللهم يامخلص النفس من النفس خلصنى
ولا حسيت الا بدخول الابرة فقط وعشان متحركتش دخلت من اول مرة ومن غير تعب
وبعدها تنميل في جسمى ومحستش بحاجه
ولانى خايفه وضغطي وطي فجأه حطولى منوم في المحلول او مهدئ نمت وصحيت عالبيبي وهو بيعيط
فتحت شفته وغمضت تانى بدون درايه وفتحت كذا مرة اثناء العمليه بس كانت اعصابي مسترخيه وهاديه
وفوقت والدكتور بيقولى حمد لله عالسلامه وكان بيلزق البلاستر وبيقولى جبتى ولد زي القمر
التعب بقى" ومفيش ولادة من غير تعب"
اول يوم الجرح هيشد برغم وجود مسكنات بس كله يهون لما تشوفي البيبي وفي وسط الالم استغري وادعي لابنك ولكل محرومه
وكل يوم الألم اقل
-رعشه بعد البنج مايطلع؛ بتروح مع المسكنات
بعد 6 ساعات هيقولولك قومى اتمشي ؛ هتبقى صعبه جدا في الاول بس اغصبي على نفسك لان المشي مفيد جداااااااااااا في الشفا والتئام الجرح وكل مرة بتقومى بتبقى اسهل من اللى قبلها
– الصداع 3 ايام او 4 ايام في الاول وبيروح بمسكنات
والرضاعه طبعا لو مستحدمتيش كريم مرطب من الاول هتتعبي زي حالاتي
اما نصايحي
-المشي ثم المشي ثم المشي
– وشرب السوايل كتير عشان الصداع وعشان الامساك وعشان الدم
كمان لما تجي تقومى متقومبش مرة وحده قومى على مراحب عشان الصداع وعشان الجرح
وربنا يزقكم ولادة سهله
والحمد لله فكيت السلك انبارح
ومفيش اثر للخياطه البطن بس مرهله شويه والدكتور قال اربطيها عادى ومارسي حياتك
واعملى تمارين وان شاء الله كله يتحسن بعد كده
وعقبال يارب كل الحوامل مايولدوا ويقوموا بالسلامه وكل الللى لسه ربنا مرزقهاش
واى استفسار تحت امركوا
باحثه عن دنيا النقاء باحثه عن دنيا النقاء 268526_1.gif فتكات رائعة Fatakat 268526 فِي عَالمي الخَاص – مصـــــــ أم الدنياـــــر