ازيكم يا احلي فتوكات …. ربنا يقومكم كلكم بالسلامة وانا معكم ان شاء الله
من واقع خبرتي في الولادة الأولي قولت اقولكم علي اهم الحاجات اللي تشتريها ليكي وللبيبي …. وكمان تحطي اية معاكي في الشنطة اللي هتاخديها المستشفي …. واخيرا تحطي اية في الشنطة اللي تاخديها معاكي وانتي خارجة اي مشوار
نبتدي ونقول بسم الله الرحمن الرحيم
المشتريات للبيبي :
1- 6 فانلات داخلية
2- سالوبيتات النوم او القعاد في البيت ونصيحة بقي السالوبيتات بتاعة البيبي بورن متكتريش عن 6 سالوبيتات بالكتير علشان هما يادوبك اسبوعين وهتلاقي البيبي كبر عليهم وخصوصا لو كانوا مقفلولين من الرجل وحاولي متجبيهمش كلهم مقفولين من الرجلين
3- سالوبيتات الخروج او لبس الخروج بصفة عامة حاولي تجبية من شهر إلي 3 شهور احسن علشان يعيش معاكي فترة اطول لكن لو انتي عارفة انك هتخرجي في الأول كتير ممكن تجيبي طقمين ولا حاجة بيبي بورن
4- 2 او 3 كوفرتات خفيفة
5- بطانية تقيلة شوية
6- بفتات صغيرة للرضاعة وفوط للقشط
7- ببرونات للرضاعة واختاري اصغر حجم وعن تجربة ببرونان AVENT احسن ببرونات لأنها مش بتحبس الهواء اثناء الرضاعة فبتكون حلوة قوي
8- تيتينة واحدة علشان تجربي اذا الطفل هيتقبلها ولا لأ
9- شربات او لكاليك علشان رجليهم بتكون بردانة قوي
10- Changing Pad ودي عبارة عن كفر بلاستيك كدة بتكون معاكي في اي مكان علشان لو حبيبتي تغيري للبيبي في اي حتة
ودي موجودة في كل حتة في our k uds و سيف ستورز و lovely
11- غطاء ليكي تحطية علي صدرك علشان لو حبيتبي ترضعي البيبي في العربية بتلفية كدة عليكي زي الطرحة
12- كريم للتسلخات وبرضة عن تجربة كريم مذركير بتاع التسلخات والترطيب حلو قوي قوي وكمان فية كريم اسمة سودو كريم دة بيبتاع في الصيدليات وفي سيف ستورز والعزبي هو غالي شوية ب 50 جنية بس حلو قوي برضة
13- ايس كاب قطن لراس الطفل
14- برنس الطفل للأستحمام
15- لو حبة بقي تجيبي الكري كوت والشنطة بتاعتة وكدة كدة انتي محتاجة شنطة علشان وانتي خارجة تحطي فيها مستلزمات البيبي وهاقولكم بعدين برضة وانتوا خارجين تحطي فيها اية
16- بوسيت و كار سيت لو عايزاهم
نيجي بقي لمستلزمات الأم :
1- حوالي 4 قمصان او بيجامات بس افضل قمصان نوم يوكونوا بزراير من قدام علشان سهولة الرضاعة
2- ملابس داخلية واسعة
3- برهات الرضاعة اللي بتتفتح علشان سهولة الرضاعة
4- pad علشان دم النفاس
بس كدة شفتوا حاجة الأم غلبانة ازاي قليلة
ترتيب الشنطة للمستشفي للبيبي وليكي :
نبتدي بالبيبي :
1- 3 اطقم كاملين بمعني 3 فانلات داخلية وحاولي الفانلات دي تكون واحدة كات وواحدة نص كم علشان هما بيكونوا نازلين بردنين قوي ومعهم 3 سالوبيتات
ومتقوليش انك مش هتعدي في المستشفي كتير متعرفيش الظروف هتكون اية لازم يكون معاكي لبس بزيادة
يبقي كدة 6 فانلات و3 سالوبيتات
2- آيس كاب لراس الطفل
3- بامبرز بزيادة اللي هو نيو بورن اصغر مقاس خالص
4- ببرونة علشان لقدر الله لو اللبن مكنش لسةنزلك بيدوا للبيبي جلوكوز فية
5- تتينة لو عايزة تعودي البيبي عليها
6- كوفرتة خفيفة وبطانية تقيلة علشان بيكونوا بردانين قوي
7- برنس البيبي والشامبو علشان لما بيحموة متخليهموش يستخدموا حاجة من عندهم حاجتك كلها تبقي معاكي
8- شراب او لكلوك للبيبي
نيجي للأم بقي :
1- قمصين نوم
2- ال pad’s
3- غيارات داخلية
4- روب علشان لو حد جة زارك ولا حاجة
5- كريم وفرشاة الشعر وفرشاة الأسنان ومعجون الأسنان وبرفان
6- شراب علشان عن تجربة بتبقي طالعة من الولادة بردانة قوي
7- كاميرا طبعا علشان الصور ودي اهم حاجة
8-شاحن الموبيل وشاحن الكاميرا
الحاجات اللي تاخديها معاكي في شنطة البيبي وانتي خارجة اي مشوار :
1- حوالي غيارين للبيبي كاملين يعني الفانلة الداخلية والسالوبيت وكل حاجة وعن تجربة اوعي تقولي انا مش هتأخر ولا رايحة مشوار بسيط لأن ياما حصل فيا مواقف مش لطيفة خالص وفية ناس تاخد السالوبيت زيادة معها وخلاص وتقول ماهو الغيار اللي تحت نضيف لأ متفكريش كدة علشان ساعات لما بيعملوا بيبي بيطفح علي الهدوم كلها بما فيها الفانلة الداخلية
2- بفتيتين وفوطة للقشط
3- ال changing pad علشان تغيري للبيبي في اي مكان
4- غطاء الرضاعة ليكي
5- لو هترضعي صناعي يبقي معاكي ترمس فية ماء دافىء واللبن تحطية في علية بلاستيك بتكون متقسمة ل 3 اقسام علشان تعيري اللبن قبل ما تحطية في العلبة وبعدين تحفظية في العلبة دي
واوعي تعملي الرضعة وتخليها معاكي جاهزة علشان اللبن الصناعي دة مينفعش تحتفظي بية لفترة طويلة يعني لازم يتجهز في وقتها ولو البيبي ساب شوية منة يترمي يعني بالكتير قوي 10 دقائق بعدها لو مكملش الرضعة ترمية
6- لو انتي رايحة في بيت او زيارة لحد ممكن تاخدي ليكي طرحة زيادة ولا بلوزة زيادة لأن مواقف القشط والترجيع بتاعة الأطفال مش بتنتهي علشان لو حبيبتي تغيري ولا حاجة
7- wips المناديل المبللة دي ضروري قوي علشانك وعلشان البيبي
8- التيتينة لو الطفل متعود عليها
وان شاء الله كلكم تقوموا بالسلامة ويرزق الجميع بالذرية الصالحة
بس لو سمحتم ممكن تقيموا الموضوع علشان يتثبت وتعم الفائدة علي كل الناس ان شاء الله
وياريت اللي يفتكر حاجة تانية يقولها برضة ممكن اكون نسيت حاجة
neven neven 9332_8.gif سوبر فتكات Fatakat 9332 جدة – السعودية