ازيكوا يا فتوكات
انا عندي استفسار بس مش عايزة حد يفهمني غلط أو يتريق
انا من الناس الرفيعة اوي اتجوزت وخلفت وزي ما انا بالعكس احيانا باحس اني خسيت من كتر الضغوط والمجهود وشيل الهم ومعنديش وقت للأكل ومعنديش شهية من كتر التوتر
ما علينا بصرف النظر عن الاسباب المهم اني رفيعة طولي 165 ووزني بيتراوح بين الـ50 والـ55
الموضوع بقى اني الفترة اللي فاتت زاد عليا الاكتئاب اوي (انا عندي توأم عندهم سنة ومعنديش حد بيساعدني خالص) وشهيتي اتأثرت بشكل كبير جدا
وده أثر على صحتي وخلاني اضعف وادوخ ومش قادرة على المجهود
السؤال بقى اللي عايزة أسأله للناس اللي بتحب الأكل والناس اللي بتاكل طول النهار (اللي انا مش منهم) هو انتوا بتعملوا كده ازاي؟ يعني اللي بتاكل طول النهار دي بتاكل ايه اديني أفكار للأكل
وجبات جاهزة مثلا ولا بتقفي طول النهار تطبخي ولا ايه بالظبط؟ يمكن من الحاجات اللي بتسد نفسي عن الاكل اني لسه هاقوم اقف اعمل أكل لنفسي انا باختصر وقت حاجات كتير اوي بالاقي نفسي مش متحمسة وانا أصلا مش متحمسة للأكل بطبيعتي ودي من الحاجات اللي بتخليني ما اكلش كتير
للعلم انا مش عايزة اتخن ولا عايزة اخس انا قصة الوزن دي مش هي موضوعي
انا واحدة نفسها مسدودة عن الاكل وعايزة افكار لاكلات شهية من ناس بتحب الاكل يمكن تفتح نفسي على الحياة علشان صحتي بقت في النازل
bluebirds bluebirds فتكات رائعة Fatakat 395546 القاهرة – مصر
سبحان الله و بحمده