السلام عليكم ورحمة الله وبركاته
ازيكم يا فتوكات يارب تكونوا بخير …
حانخسر وزننا ونزود حفظنا للقرآن الكريم "حملة لمدمني الاكل .. استبدلي الشيكولاته والساندوتش بحفظ خمس آيات يوميا"
النهاردة حاتكلم مع كل الفتوكات اللي زي تخان ووزنهم فوق الـ100 كيلو كمان وكل مرة يبدأوا في ريجيم ما يكملوش ويضعفوا ادام الاكل والحلويات والشيكولاتة والبيتزا والجاتوهات
واللي مدمنين للاكل ادام التليفزيون والتسالي
واللي كمان بيفشوا غلهم في الاكل كل ما يتضايقوا ويتخنقوا وبيعتبروا الاكل الصديق الوحيد اللي ممكن يحققلهم سعادة وقتية وسط الضغوط والمشاكل والاعباء اللي بنعشها خصوصا الستات المتجوزين ومش لاقيين وقت يخرجوا او يقابلوا صاحباتهم او يعملوا اي نشاط يخرجهم من مود البيت والعيال والطبيخ والصريخ وميزانية البيت الخربانة دايما والاسعار المولعة …..
المهم ….
انا فكرت اعمل حاجة جديدة تساعدني اني اتخلص من كل اللي فات .. وهي اني اخلق بديل للاكل يساعدني اني ماكلش كتير وفي نفس الوقت اكسب حسنات واقرب اكتر لربنا لاننا مقصرين قوي في حقه "عز وجل".
فكرتي باختصار …
" إيجاد بديل للاكل يحقق لنا السعادة " والبديل ده عبارة عن حفظ 5 آيات يوميا من القرآن الكريم بدءا من سورة الذاريات يعني آخر صفحة في الجزء الستة وعشرين وبداية الجزء سبعة وعشرين لاني كنت حفظة جزء كبير من السور دي وانا صغيرة وللاسف نسيتها ….
وعايزاكم تساعدوني وتشتركوا معايا اننا بدل ما نفكر في الاكل علشان نتغلب بيه على الملل او الضيق والاكتئاب اننا اول ما نحس بالحاجات دي يجي في دماغنا على طول حفظ 5 آيات من القرآن الكريم يوميا وان ده حايحقق لنا السعادة في الدنيا والآخرة ..
– اولا حانخد ثواب حفظ القرآن الكريم بإذن الله
– ثانيا وانتي بتحفظي الخمس آيات احفظيهم من مصحف فيه التفسير واقري تفسير الخمس آيات دول حاتتعملي أكتر في دينك وعلاقتك بربنا حاتقوى.
– ثالثا وانتي بتصلي كل يوم صلي بالايات الجديدة اللي حفظتيها وتدبريها وانتي بتقري وبكدة حاتراجعي حفظك كل يوم وفي نفس الوقت حانتغلب على مشكلة السرحان في الصلاة اللي سببها اننا بنقول نفس السور في الصلوات لسنين طويلة.
– رابعا حاتحسي بسعادة كبيرة اوي انك بتعملي حاجة مفيدة وبتحفظي وبتقري كتاب ربنا تبارك وتعالى كل يوم وبتتقربي منه، ربنا بيقول ((إذا تقرب العبد إلي شبراً تقربت إليه ذراعاً، وإذا تقرب إلي ذراعاً تقربت منه باعاً، وإذا أتاني يمشي أتيته هرولة)) رواه البخاري.
– خامسا حاتلاقي حاجة جديدة بدل الاكل تفرحك وتسعدك وتشغلك على رغبتك المستمرة في الاكل وحاتقدري تلتزمي بالنظام الغذائي بتاعك ان شاء الله.
– حاتلاقي بركة القرآن الكريم في بيتك وفي عيالك ومع جوزك باذن الله ..
فضل قراءة القرآن الكريم وحفظه
قال الله تعالى: ﴿ إِنَّ هَـذَا الْقُرْآنَ يِهْدِي لِلَّتِي هِيَ أَقْوَمُ وَيُبَشِّرُ الْمُؤْمِنِينَ الَّذِينَ يَعْمَلُونَ لصَّالِحَاتِ أَنَّ لَهُمْ أَجْراً كَبِيراً ﴾ {الإسراء 9}
وقال سبحانه :﴿وَنُنَزِّلُ مِنَ الْقُرْآنِ مَا هُوَ شِفَاء وَرَحْمَةٌ لِّلْمُؤْمِنِينَ وَلاَ يَزِيدُ الظَّالِمِينَ إَلاَّ خَسَاراً﴾ {الإسراء 82}
وقال سبحانه : ﴿ إِنَّ الَّذِينَ يَتْلُونَ كِتَابَ اللَّهِ وَأَقَامُوا الصَّلَاةَ وَأَنفَقُوا مِمَّا رَزَقْنَاهُمْ سِرّاً وَعَلَانِيَةً يَرْجُونَ تِجَارَةً لَّن تَبُورَ﴾ {فاطر 29}
عن أَبي أُمامَةَ رضي اللَّه عنهُ قال : سمِعتُ رسولَ اللَّهِ صَلّى اللهُ عَلَيْهِ وسَلَّم يقولُ : « اقْرَؤُا القُرْآنَ فإِنَّهُ يَأْتي يَوْم القيامةِ شَفِيعاً لأصْحابِهِ » رواه مسلم.
وعَن النَّوَّاسِ بنِ سَمعانَ رضيَ اللَّه عنهُ قال : سمِعتُ رسول اللَّهِ صَلّى اللهُ عَلَيْهِ وسَلَّم يقولُ : «يُؤْتى يوْمَ القِيامةِ بالْقُرْآنِ وَأَهْلِهِ الذِين كانُوا يعْمَلُونَ بِهِ في الدُّنيَا تَقدُمهُ سورة البقَرَةِ وَآل عِمرَانَ ، تحَاجَّانِ عَنْ صاحِبِهِمَا » رواه مسلم.
وعن عثمانَ بن عفانَ رضيَ اللَّه عنهُ قال : قالَ رسولُ اللَّهِ صَلّى اللهُ عَلَيْهِ وسَلَّم : « خَيركُم مَنْ تَعَلَّمَ القُرْآنَ وَعلَّمهُ» رواه البخاري.
وعن عائشة رضي اللَّه عنها قالتْ : قال رسولُ اللَّهِ صَلّى اللهُ عَلَيْهِ وسَلَّم : « الَّذِي يَقرَأُ القُرْآنَ وَهُو ماهِرٌ بِهِ معَ السَّفَرةِ الكرَامِ البررَةِ ، والذي يقرَأُ القُرْآنَ ويتَتَعْتَعُ فِيهِ وَهُو عليهِ شَاقٌّ له أجْران » متفقٌ عليه.
وعن أَبي موسى الأشْعريِّ رضي اللَّه عنهُ قال : قال رسولُ اللَّهِ صَلّى اللهُ عَلَيْهِ وسَلَّم : « مثَلُ المؤمنِ الَّذِي يقْرَأُ القرآنَ مثلُ الأُتْرُجَّةِ : ريحهَا طَيِّبٌ وطَعمُهَا حلْوٌ ، ومثَلُ المؤمنِ الَّذي لا يَقْرَأُ القُرْآنَ كَمثَلِ التَّمرةِ : لا رِيح لهَا وطعْمُهَا حلْوٌ ، ومثَلُ المُنَافِق الذي يَقْرَأُ القرْآنَ كَمثَلِ الرِّيحانَةِ : رِيحها طَيّبٌ وطَعْمُهَا مرُّ ، ومَثَلُ المُنَافِقِ الذي لا يَقْرَأُ القرآنَ كَمَثلِ الحَنْظَلَةِ : لَيْسَ لَها رِيحٌ وَطَعمُهَا مُرٌّ » متفقٌ عليه.
وعن عمرَ بن الخطابِ رضي اللَّه عنهُ أَنَّ النَّبِيَّ صَلّى اللهُ عَلَيْهِ وسَلَّم قال : « إِنَّ اللَّه يرفَعُ بِهذَا الكتاب أَقواماً ويضَعُ بِهِ آخَرين » رواه مسلم.
وعنِ ابن عمر رضي اللَّه عنهما عن النَّبِيِّ صَلّى اللهُ عَلَيْهِ وسَلَّم قال : « لا حَسَدَ إلاُّ في اثنَتَيْن : رجُلٌ آتَاهُ اللَّه القُرآنَ ، فهوَ يقومُ بِهِ آناءَ اللَّيلِ وآنَاءَ النَّهَارِ ، وَرجُلٌ آتَاهُ اللَّه مالا ، فهُو يُنْفِقهُ آنَاءَ اللَّيْلِ وَآنَاءَ النهارِ » متفقٌ عليه
وعن ابن مسعودٍ رضيَ اللَّه عنهُ قالَ : قال رسولُ اللَّهِ صَلّى اللهُ عَلَيْهِ وسَلَّم : منْ قرأَ حرْفاً مِنْ كتاب اللَّهِ فلَهُ حسنَةٌ ، والحسنَةُ بِعشرِ أَمثَالِهَا لا أَقول : الم حَرفٌ ، وَلكِن : أَلِفٌ حرْفٌ، ولامٌ حرْفٌ ، ومِيَمٌ حرْفٌ » رواه الترمذي وقال : حديث حسن صحيح.
وعنِ ابنِ عباسٍ رضيَ اللَّه عنهما قال : قال رسولُ اللَّهِ صَلّى اللهُ عَلَيْهِ وسَلَّم : «إنَّ الَّذي لَيس في جَوْفِهِ شَيْءٌ مِنَ القُرآنِ كالبيتِ الخَرِبِ » رواه الترمذي وقال : حديث حسن صحيح .
وعن عبدِ اللَّهِ بنِ عَمْرو بن العاصِ رضي اللَّه عَنهما عنِ النبيِّ صَلّى اللهُ عَلَيْهِ وسَلَّم قال : « يُقَالُ لِصاحبِ الْقُرَآنِ : اقْرأْ وَارْتَقِ وَرَتِّلْ كَما كُنْتَ تُرَتِّلُ في الدُّنْيَا ، فَإنَّ منْزِلَتَكَ عِنْد آخِرِ آيةٍ تَقْرَؤُهَا » رواه أبو داود ، والترْمذي وقال : حديث حسن صحيح.
(الأحاديث مأخوذة من كتاب رياض الصالحين، كتاب الفضائل، باب فضل قراءة القرآن)
حفظ القرآن سبب لحياة القلب ونور العقل
فعن قتادة قال: "أعمروا به قلوبكم, وأعروا به بيوتكم"
وعن كعب رضي الله عنه قال :"عليكم بالقرآن فإنه فهم العقل , ونور الحكمة , وينابيع العلم , وأحدث الكتب بالرحمن عهدا
وبعد ما عرفنا فضل القرآن وحفظه وقراته وتلاوته
حاتكلم معاكم في الفوايد الدنيوية اللي حانجنيها من حملة "حانخسر وزننا ونزود حفظنا للقرآن الكريم" .
– حانقدر ان شاء الله نحفاظ على نظامنا الغذائي ونتغلب على الاكتئاب اللي بيجي بسبب الريجيم والحرمان من الاكل اللي بنحبه.
– حانكون قدوة حسنة لاولادنا لما يشوفونا بنحفظ القرآن الكريم وبنمسك المصحف كل شوية ونقرا ونحفظ الخمس آيات يوميا ونقدر نحببهم في حفظ القرآن ويحفظوا معانا وناخد ثوابهم هما كمان حتى بعد ما نموت.
– حانوفر في فلوسنا كتير لما نبطل نشتري شيكولاته وايس كريم وجاتوه وغيره عمال على بطال
– حانوصل للرشاقة اللي بنحلم بيها
– وجوزك ولا خطيبك ولا اهلك حايبهرهم شكلك الجديد
وماتنسوش تدعوا دايما في كل صلاة وبعدها ان ربنا يشفينا من الشراهة في الاكل ومرض السمنة ويقوينا على حفظ القرآن والحفاظ على صحتنا وعدم الاسراف في الاكل
وبالنسبة للرياضة اللي المفروض تعمليها مع النظام الغذائي .. انا مش حاقولك امشي كل يوم ولا روحي الجيم – مع ان دي حاجات مهمة جدا – لكن حاقولك حاجة تانية
غالبا معظم الستات التخينة كسلانة شوية .. شوية صغيرة مش اوي يعني وبالتالي مش حاقولك اجري او امشي حاقولك كل يوم شوفي في ايه في بيتك عايز يتعمل واعمليه يعني امسكي اوضة واهبديها تنضيف ومسح وترويق
سجادة مش نضيفة ادعكيها بدل ما تغسليها برة ووفري فلوسك واحرقي سعرات حرارية وافقدي دهون.
بطانية محتاجة تتغسل حطيها في البانيو واهبدي فيها برجليكي واغسليها
وهكذا
حاتحرقي سعرات حرارية اكتر وتبذلي مجهود وفي نفس الوقت وفرتي وقتك وخدمتي بيتك وخدي نية ان النضافة من الايمان وانك بتشتغلي في بيتك باحسان علشان تاخدي الثواب على كل نقطة عرق بتعرقيها وكل جرام بتنزليه ..
المطلوب من اللي عايزة تشترك:
تكتب اسمها :
ووزنها في بداية الحملة:
وتعمل لنفسها جدول بالورقة والقلم فيه تاريخ اليوم – الخمس أيات بتوع كل يوم "انا حابدأ زي ما قتلتكم من الذاريات" – مدى اتباع النظام الغذائي بتاعها – الرياضة "اللي هي زي ما اتفاقنا عمل مجهود في البيت يخليكي تعرقي وتحرقي سعرات حرارية " لو بيتك فلة شغلي قناة اطفال وارقصي انتي وولادك واعملي جو بهجة في البيت ولو عندك وقت انزلي امشي او روحي الجيم.
وفي آخر الاسبوع جمعي وشوفي انتي حفظتي اد ايه المفروض (35 آية) وخسيتي آد إيه…
وتابعوني بالنتيجة وانا حادخل باستمرار اكتبلكم وارد عليكم
ملحوظة:
انا ما كتبتش نظام غذائي معين لاننا تقريبا كلنا حافظين يجي 100 ريجيم من تجاربنا السابقة وفي نفس الوقت مش عايزة اقيد حد بنظام معين كل واحدة فينا عارفة هي بتعك في ايه وايه اللي بيتخنها لو اكلتي من اكل البيت العادي بكميات قليلة وتطبخيه بطريقة صحية بقليل من الزيت حاتخسي
وطبعا نشرب مية كتييييييييير
مستنية رأيكم في الموضوع والتقييم
ملحوظة تانية: باين في التوقيع بتاعي محاولاتي الفاشلة في الخسسان لكن باذن الله حاننجح سوا ببركة القرآن الكريم
التاريخ: 25- 9 – 2024
الاسم: ام مريم
الوزن: 105
الحفظ لهذا اليوم: أول خمس آيات من سورة الذاريات والحمد لله
النظام الغذائي:بدأت من النهاردة بعون الله
دعواتكم حبايبي
أحلى أم لأحلى بنوتة أحلى أم لأحلى بنوتة فتكات نشيطة Fatakat 237638 الجيزة – مصر