السلام عليكم يا احلى بنات
كتبت حاجة صغيرة على ادي كدة اشجع بيها نفسي واشجع اخواتي في فتكات اننا نخس شوية
يا رب تعجبكم
لازم اخس وابقى جميلة
ايوة بقيت شبه الدرفيلة
طب رسوني اوام ع الليلة
اهدي شوية يا اخت نعيمة
دة التخسيس محتاجله عزيمة
لازم أقلل اكلي كمان
بس براحة بدون حرمان
أكل جميل كل الآلوان
بس يفيدني وعالي القيمة
دة التخسيس محتاجله عزيمة
طيب اعمل ايه يا بنات
هاشمي و آكل لقيـــــــمات
بروتين بس ولا سلطات
انا محتارة حيرة أليمة
دي التخسيس محتاجله عزيمة
بس يا ريتها كمان ع الاكل
لسة رياضة وجري و ركل
عايزة يا ستي انسب شكل
طب خليكي معانا كريمة
دة التخسيس محتاجله عزيمة
مش مشكلة لو زدت شوية
يلا هزود سلطة ومية
واظبط في الاكل الكمية
مش قاعدة كإني عاملة وليمة
التخسيس محتاجله عزيمة
يبقى خلاص انا ويا جروب
ويا اللمة الدهن يدوب
هيتابعوني ودة المطلوب
وفي تقاريري نتيجة عظيمة
دة الريجيم محتاجله عزيمة
مع فتكات لقيت الحل
لمة وصحبة وفل الفل
عمري في يوم منهم ما هـ امِّل
جروباتنا وصفاتها سليمة
دة التخسيس محتاجله عزيمة
انا خارجة من الشتا وحاسة اني زايدة خمسة عشرة كيلو كدة
ولما سألت قالولي الشتا بتعمل اكتر من كدة
فقلت لازم اشجع نفسي انا واللي حاله حالياننا نرجع تاني لوزننا
وخاصة ان اللبس الصيفي ما بيرحمش وما بيسيبش ديفو في الجسم الا وعليه مية فوكس
مش معنى اننا بنخرج بجلباب او اسدال ان في البيت مانلبسش اللبس الصيفي الجميل
بس يا فرحة ما تمت اللبس بين الاومبلايزات
لكن قلت احنا طول عمرنا رجالة ولازم نقف وقفة رجالة
~~~~~~~~~~~~~~~~~~~~~~~~
بحاول اخس من غير ما احسس نفسي اني بخس
لاني اول ما باخد بالي اني بخس ..بيبقى كل تركيزي على الاكل
ودي حاجة نفسيا معروفة اللي بنركز على منعه بيبقى هو اكتر حاجة ملحة
علشان كدة بحاول اقلل شوية شوية من كميات اكل الشتا
وازود شوية في حركتي
واتابع اجمل مدونة للرشاقة هنا بجد بتعلم منكم ومن ملاحظاتكم حاجات كتير
وقلت بما اني بحب الخواطر ..اشجع نفسي واشجعكم بقصيدة متينة من بناتيت افكاري
و انتوا ما تبخلوش عليا بتشجيعكم ومساندتكم .. احسن اعيط واقعدلهم في البيت شلبية
وقولولي يا بنات اعمل ايه كمان لمنطقة البطن اللي مخلية اللبس شكله توحفة فنية بس بالعكس
سعيدة-بايجابيتي سعيدة-بايجابيتي 1246146_4.gif فتكات متميزة Fatakat 1246146 القاهرة – مصر