دايما فى ناس بتقولى "أنا نفسى أعمل ريجيم بس مش عارفة امتنع عن ايه وساعات بتلخبط وبنسى وأكل حاجة المفروض ماكولهاش"
من اللى بسمعه بردو "أنا مش عايزة اتبع الريجيم اللى بيبقى شوربة خضار طول اليوم ده .. أنا عايزة ريجيم يخسسنى حاجة بسيطة, يعنى يا دوب مقاس او اتنين"
______________
المشكلة دى كتير بيعانوا منها, هى انهم عايزين يخسوا حاجه بسيطة, لكن لو روحتى لدكتور هيبقى قاسى شوية عليكى ويمكن يحاول يعمل عليكى شغل كمان وهتمتنعى عن حاجات كتير انتى نفسك فيها وأصلا مانفسكيش تخسى كل ده …
طب هتعملى إيه؟
هيجيلك احباط وتعدى تعيطى؟؟!!
لا يا ماما اومال Daisy Flower بتعمل إيه فى المدونة!
بس يا جميل ولا تزعلى نفسك .. أنا هجبلك الخلاصة:
______________
أنا هكتبلك قايمة فيها كل الحاجات اللى المفروض ماتكليهاش ومتشربيهاش ,,,
عارفة القايمه دى فيها كام حاجة؟
8 حاجات .. اه والله 8 بس
طب هتمشى على النظام ده لحد امتى؟
21 يوم بس … ايوا صدقينى 21 يوم
يعنى اقل من شهر اهه
مش قولتلك سهل
أنا نفسى عملته .. أنا كنت 57 كيلو وكنت عايزة أنزل مقاسى من medium ل small وفعلا نجحت وبقيت 52 كيلو
طيب مش هرغى أكتر من كده وأكتبلكوا القايمة
__________________________________________
*الحلويات الشرقيه (البسبوسة والكنافة والبقلاوة … إلخ)
*الحلويات الغربية (التورتات والجاتوهات والكيكات)
*الشيبسى
*العيش
*الوجبات السريعة
*الشوكولاته
*الأيس كريم
*المشروبات الغازية (البيبسى والسفن أب .. إلخ)
اتبعى النظام ده لمدة 21 يوم هتخسى من 5 ل 7 كيلو
حسب طبيعتك وشكل جسمك
يمكن هتحسوا انها كتير … بس صدقينى لو روحتى لدكتور هتدفعى دم قلبك وهيحرمك من حاجات كتير
وصدقينى نفس النتيجة … جربى وأدعيلى
______________
اتمنى اكون أفدتكم ولو نسيت أقول حاجة أتمنى أتلقى أسألتكم سواء فى التعليقات او على الخاص
ونفسى أشوف تشجيعكوا من خلال التقييمات .. أنا لسه جديدة هنا
هكتب مواضيع أكتر أنشاءالله عن التمرينات الرياضية لمحبى الريا:ضي
وكان هكتب فى قسم البشرة والميكب
أحبكم فى الله
Daisy Flower Daisy Flower 708472_2.gif فتكات حبوبة Fatakat 708472 مدينة 6 أكتوبر – مصر
سبحان الله و بحمده