ازيكم ياقمرات
انا مش بحب الريجمات يابنات
لان لما ابدا فيه بحس اني نفسي بتفتح وبحب حاجات مكنتش بحبها قبل ماعمل الرجيم
ماهو الممنوع مرغوب بقي بحب بس الاكل الصحي بدون دهون
تقليل الحلويات والاملاح
الاكل يبقي بكميه بتتعودي عليها
المهم القصه ان جوزي ماشاء الله ابتدي يروح الجيم وناوي يخس والموضوع شكله بجد وانا اتغاظت
واتحديته اني هخس انا كمان السبعه كيلو بامر الله اللي لازقين فيا دول
ولاقيت الراجل يااختي اخد الموضوع جد فشمرت ايديا
وطبخت النهارده كبايه واحده رز ابيض بمعلقه واحده زبده
يدوب هو 5معالق وانا زيهم
وعملت خضار مشكل ع البخار وسلطه وفرخه مشويه كل واحد اخد ربع مع اننا كنا بناكل نص بس بنتحدي بعض بقي
المهم عايزه اربع بنات يبداو معايا
اكل صحي مش ريجيم خالص عشان ماتخافوش
هقولكم ع النظام اللي نويت امشي عليه انا وجوزي
طبعا لازم يبقي عندك خضار كتير وفواكه وعصير فريش
سكر ريجيم للي في مصر سويتال واللي بره تروبيكانا سليم حلو اوي وفيه نيفيللا سكر فاكهه امريكي وسعرهم مش غالي
جبن بقي كلها قليله الدسم وكذلك الالبان
العيش الابيض تنسوه وتيجبي عيش سن او عيش اسمر نخاله او توست بر بجد العيش الابيض والفينو الصومالي مصيبه
هنطبخ اكل من غير سمنه ولا زبده ولا زيت نهائي
اتفقت انا وجوزي الرز هيبقي يوم ويوم مش يوميا وهنكتر بس السلطه
والبروتين قطعتين مسلوقه لحمه حمرا او ربع فراخ مشويه او مسلوقه
او سمكتين مشويتين او علبه تونه متصفيه من الزيت ومشطوفه بخل
هناكل 3 وجبات رئيسيه و3 سناك خفيف لو جعتو
انا قلت لو جعنا لقول رسول الله
نحن قوم لا ناكل حتي نجوع واذا اكلنا لا نشبع
هنوقف اكل بعد الساعه 8 ونحاول ننام بدري ان شالله والله المستعان ربنا يهدي عيالنا وينامو لان السهر والله هو السبب في كتر الاكل لان معظم الجوع بيبقي بالليل والسهره ولب ومكسرات ونفضل نعك
الميه كتير جدا حوالي لترين ان شالله
ها مين معايا
نتحدي الرجال
انا عايزه اربع بنات بس يابنات عشان هنبقي اصحاب ونطمن علي بعض كل يوم يومنا كان ماشي ازاي
وعملنا مجهود ايه سواء رياضه او شغل بيت
وبامر الله هنقول كل وصفات الاكل ازاي تتعمل بدون دهون وتبقي طعمها جميل
وممكن كمان نصور اكلنا ان امكن
مين الاربعه الي هيحجزو مكانهم يرفعو ايديهم ويعرفوني بيهم
وباطوالهم واوزانهم
انوس_مونتي انوس_مونتي 429733_1.gif برنسيسة فتكات Fatakat 429733 المدينة المنورة – السعودية