بصوا بقى يا جماعة هوجروب للحوامل بالذات اللي عندهم زيادة وزن من قبل الحمل ده مش هيبقى ريجيم بالمعنى المتعارف عليه بس هو هيبقى انه هنعمل لنفسنا نظام بحيث انه ناكل الحاجات اللي تفيدنا بس ماتزودش وزننا و نحاول منزدش اكتر من الرنج الطبيعي اللي مفروض نزيده اثناء الحمل و النظام ده هيبقى فيه ثوابت مهمه جدا
1) 2 كوب لبن + 2 كوب زبادي يوميا ( يستحسن يكون قليل الدسم ) طبعا غير مشتقات الالبان التانية بس احسن تكون قليلة الدسم و الملح
2) 2 بيضة يوميا ( مسلوقة أو أومليت بنقطة زيت زيتون )
3) قطعة بروتين في الغدا ( فراخ أو لحمة أو سمك أو تونة
4) الفاكهة و الخضار طبعا حاجة اساسية يوميا على قد ما تقدري (بس الطاماطم واحدة بس في اليوم عشان الاملاح و الجزر برضه منزودش منه عشان فيتامين A )
5) تقليل النشويات و لكن ليس منعها ( يعني العيش يبقى اسمر بدل ابيض و الرز يكون مسلوق بدل ما يكون معمول بسمنة و المكرونة نعملها بيضة و عليها مثلا صوص زبادي (سلطة زبادي ) بدل الصلصة العادية )
6)منع الاطعمة التي تحتوي على نسبة عالية من الدهون و من السكريات أو نسبة عالية من الملح ( يعني الحلويات و المخللات و الرنجة و الكلام ده )
7) شرب كمية كبيرة من الميه و العصائر بس طبعا ميكونش بليل عشان نعرف ننام و مانقضيش اليوم في الحمام
9) ليكي يوم في الاسبوع تكسري النظام يعني نفسك في حاجة كليها يعني مثلا شوكولاته أو حاجة حلوة او أكله معينة فيها دهون كتير و ممكن يبقى مثلا يوم أجازة الزوج لانه غالبا بيكون يوم الفسحة .
10) الأكل يكون على 6 وجبات صغيرة عشان نتفادى الحموضة و الانتفاخ و الكلام ده
11) حاولي انك تاكلي كل 3 ساعات اي حاجة حتى لو مثلا مرة كام معلقة زبادي و مرة تفاحة و مرة نص برتقالة مرة وحدة توست و لبن يعني ماتقعديش فترة طويلة من غير أكل
طبعا انا لحد دلوقتي مش قادرة انفذ النظام الهايل ده عشان كده نفسي حد يشجعني عليه ها هلاقي حد معايه ولا ايه ؟؟؟؟؟
انا أول واحده هقول بياناتي اهو :
السن : 25 سنة
الوزن : 76 كيلو
الطول : 164 سم
شهور الحمل : التالت ( الاسبوع ال 11)
و ده اول حمل ليا و متجوزة بقالي 3 شهور
Dr_limo Dr_limo 171847_1.gif سوبر فتكات Fatakat 171847 دبي – الامارات