فتكواتى حبيباتى اخيرااااااااا وبعد طول انتظار وقعدة فى القسم دة ليل ونهار فرحى اللهم لك الحمد بعد بكرة اسمع احلى زغروطة
وبالرغم انى بلف حوالين نفسى ومش فاضية خالص الا انى لازم اقلكوا على كل حاجة لانكوا تستاهلوا كل خير
بصوا بقى موضوع العفش دة كان محيرنى اوووى وانا ضد فكرة السفر ودمياط وطنان والكلام دة لان اللى بتوفرية فى الحاجة بيدفع مواصلات ونقل وغيرة دة غير التهب والهدة ولو فى حاجة جت مش مظبوطة لاقدر الله صعب ترجعيها او تتغير عشان المشوار يعنى انا مثلا اكتشفت ان النيش لما جة جة منغير المفتاح فكان عادى انى اروح اجيبة لان المكان كان قريب تخيلوا بقى لو كنت جيبة من دمياط طبعا دى حاجة بسيطة ومش قضية المفتاح بس قيسى بقى على حاجة اكبر لاقدر الله
اوضة النوم جبتها من معرض جنب البيت وهو اساسا تبع دمياط وحجتة تحفة ماشاء الله واللى يشوف الاوضة يديها اكتر من سعرها
الانترية والنيش جبتهم من التوحيد والنور ااااااة والله عندة حاجات جميلة بس فروع فروع اكتر فرعين حلوين فرع المنيل وفرع رمسيس عندهم تشكيلة موبيليا وباسعار رووووعة
مجبتش اوضة اطفال عشان الفلوس وبصراحة مش وقتها دلوقتى جبت بس سرير صغير شيك برضو من التوحيدوالنور
الاجهزة الكهربائية التلاجة والغسالة تشويبا والبوتجاز يونيفرسال
المطبخ عملتة الموتال لانة انضف بكتيير من الخشب واشيك
السجاد جبت سجادة الرسبشن بس من النساجون والباقى من معارض عادية
النجف برضو جبتة من جنبى لانى ضد البعد والازهر والعتبة والكلام الفاضى دة واساسا بتلاقى الراجل يقولك اسعار فلكية عشان عامل حسابة انك هتفصلى
الستاير جبتها من الازهر للاسف مش عشان وحشة بالعكس عندهم تشكيلات روعة بس البياعين هناك حاجة بشعة واللى يمسك مقص او متر عشان يقصلك الستارة عاوز بقشيش وكلة بيستغل انك عروسة ويطلب اكرامية عينى عينك كدة والله فعلا فظاااااااااع
المراتب جبتها جاهزة طبعا لان التنجيد بطل بس نجدت المخدات والخدديات الصغيرة عشان السفنج منهم بيتبهدل
المفروشات كلها ملايات وبطاطين والحفة من سنتر شاهين اللى فى السيدة زينب عندة حاجات روووعة
طبعا حاجة المطبخ كنت بلقطها كل شهر حاجة هى وهدومى وبرفناتى
ونصيحتى فى هدوم الخروج والله عليكى وعلى الوكالة عندهم كل اللى بيتباع برة باقل من نص التمن انا لبسى صيفى وشتوى من هناك البالطو اللى برة ب200 هناك ب 50 والله واشيك واحسن ناس اللى بتشترى من عندهم خسارة بدل متجيبى طقم واحد هاتى من هناك تلاتة اربعة
فستاااااااان الفرح حجزتة من ناجية سنتر اللى ف شارع الهرم
الكوافير حيرنى اووى ورحت ولفيت كتييييييير وكنت ناوية اروح عند محى اللى ف الهرم بس شفت عندة عروستين ابشع من بعض
والحمد لله استقريت على اسراء الزناتى ميكب ارتست هتجيلى البيت وانا شفت شغلها كتير ومتبعاها حاجة نضيفة بجد
الفرح ان شاء الله فى المنيل فى نادى العاملين المدنيين نادى شيك اووى واسعارة معقولة ومحترم
مش هعمل حنة عشان اكون مرتاحة يوم الفرح ومبقاش مرهقة
كتبت الكتاب ف البيت وهيصنا وكان يوم جميل
نصيحة لوجة الله اوعى تعملى السويت او الحمام المغربى برة البيت حرررررام والله حرام تنكشفى على حد وحرام الفلوس لو عملتى سيرش هنا هتلاقى مليون طريقة للحمام المغربى ملكيش حجة ولا هى الحاجة متنفعش الا لو دفعنا فيها دم قلبنا
نصيحة كمان افرشى بدرى عشان ترتاحى وتبقى مستعدة لاى حاجة يعنى انا مثلا وانا بفرش طع مقاس الستاير مش مظبوط فالحمد لله ودته يتظبطوا عشان عندى وقت تخيلى بقى لو كنت علقتهم يوم الحنة مثلا ؟ كنت مش هلحق
واهم حاجة الفترة دى الهدوء والصبر والرضا والله العظيم ارضى بكل حاجة هتلاقى نفسك عملتى احسن حاجة
انا كتبت اللى انا افتكرتة واللى ليها سؤال انا تحت امرها وخصوصا فتكوات الهرم لو عايزين اى حاجة
هتوحشونى اووووى ومتنسوش تدعولى
بغض النظر بغض النظر 769247_1.gif فتكات رائعة Fatakat 769247 الجيزة – مصر