السلام عليكم ورحمة الله وبركاته
ازيكم يا قمرات
طبعا انتوا مستغربين من العنوان بس دى الحقيقة انا كنت مولعة امبارح بس ربنا سترها معايا ومحصليش حاجة ::
نيجى للأكل الاول انا طبخت فرخ بلدى وحشيته بالمرتة وهى عبارة عن بصلة و معلقتين رز مغسولين و شوية
زبيب و حبهان وورق لورا وملح و كمون و فلفل اسود و طماطماية و قطعت فيها الكبدة و القنصة و القلب
وده شكلها
وده شكل الفرخة بعد ما حشيتها و كتفتها كويس علشان الحشو ميخرجش منها
وبعدين شوحتها فى الزيت مع بصلة وورق لورا و حبهان و طماطماية صغيرة وفلفل اسود و ملح و طبختها عادى
جدا و ده شكلها و معاها المرتة
انا طبعا فتحتها وخرجت المرتة علشان تشوفوها ودى الشوربة
وعملت المحشى عادى بالخلطة وهى عبارة عن بصلتين كبار و صفرتهم فى الزيت و حطيت عليهم عصير طماطم وعليهم توم مفروم و شبت و كسبرة و ملح و بهارات و لما اتسبكت ضيفت عليها الرز و سقيت المحشى بالشوربة و ده شكله بعد الطبيخ
اعذرونى مصورتش خطوات المحشى بالتفصيل لأنى كنت قاعدة بترعش من اللى حصل واكيد انتوا عايزين تعرفوا ايه اللى حصل
هقولكم
انا بحب اجهز المحشى من بالليل وكنت فى المطبخ ولابسة طرحة بشراشيب و عباية بيتى قطيفة وكنت قريبة من البوتاجاز و فجأة شميت ريحة شياط واقول يا ربى الريحة دى فين وابص حواليا وادور مفيش حاجة وفجأة حسيت بسخونة عند كتفى فرفعت دراعى و لقيت النار مولعة فى طرحتى و عبايتى مسكت فى الشراشيب و طلعت لفوق وبعيد عنكم بقا قعدت اخبطها بإيدى وقلعت هدومى بسرعة ورميتها على الارض وجريت على جوزى الحقنى انا بتحرق والراجل يا عينى قام مفزوع من النوم بس الحمدلله جت سليمة فلازم اى واحدة فى المطبخ تخلى بالها من النار
ومتنسوش التقيم واللى مش هتقيم هبعتلها طرحتى ام شراشيب
ههههههههههههههه
احبكم فى الله
مواضيع هذا القسم برعاية
احلام شام احلام شام 103048_5.gif فتكات غالية قوي Fatakat 103048 دمياط – جوه بيتى الجميل