السلام عليكم ورحمة الله وبركاته
مبسوطة جدا وقلت اقول للي ميعرفش تجربتى اللي نجحت مع كفتة الارز
لا تقولولي كبة بقي ولا مفرمة ولا حتي جزااااااااااااااار
بصوا بقي يا بنات الحكاية جت معايا ازااااااي
انا طبعا في مصر عندي الكبة واللي طبعا تحفة في عمايل الكفتة
او حتى لو مليش نفس اعملها بنفسي كنت بعملها عند الجزار واريح دماغي
وطبعا بعد ماجيت السعودية كنت عاوزة اشتري كيتشن ماشين كامل لزوم الحاجات اللي زي دي
المهم كنت كتبت موضوع بسأل فيه الفتوكات علي احسن نوع كيتشن ماشين
وبما انى لسة مشتريتهاش وزهقت من كل الاكل بصراحة
وعايزة احس انى في مصر ام الدنيا
قلت اجدد واشتري كفتة رز وطبعا زي ما انتوا عارفين ان مفيش كفتة رز مصري الا
الحاجات المجمدة زي امريكانا وكده
وطبعا اكيد لو روحت لجزار هنا وجبتله المكونات بتاعة الكفتة وقولتله افرمها لي
هيفتح بقه شبرين ويقولي ايش؟؟؟؟؟؟؟
المهم بقي انا كنت اشتريت لحمة مفرومة النهاردة وكانت بصراحة مفرومة ناعمة جداااااااا
وكانت عجبانى
وقلت يا بت يا ام عمر هتعملي ايه بكرة ان شاء الله
لقيت نفسي طلعت كبدة وقلت هاعمل كبدة بانية ومكرونة
وبعدين نفسي اتسدت وقلت ايه الهبل ده هو انا مش ورايا غير المكرونات والطبيخ
والمحاشي
قعدت افكر وافكررر وافكررررررررر
جت في بالي فكرة الكفتة وكان نفسي فيها جدا لانى كنت جيباها معايا من مصر
وجوزى بيموت فيها
بس خلاص ده كان من شهور
طب اعمل ايه يا ربي ……
لقيت نفسي بقول طب ما اجرب اعملها كده في مطحنة الخلاط
المطحنة اللي جابتلي الضغط
لا بتفرم بصل كويس ولا حتى بتعجبنى في طحن التوابل
هتقولولي بصل ؟ هقولوكوا اه بصل امال يعنى اخرطه ولا افرمه بالمبشرة
وهاتك يا عياط وبصراحة ما بصدق الدموع تنزل واعيش بقي
المهم بقي قلت اجرب الاول بنص كيلو لحم مفروم او اقل شوية
عشان لو باظت يبقي كويس انها جت على قد الشوية دول
المهم غسلت اقل من كوب رز وشوية خضرة كده علي قد الشوية دول
وفصين توم وبصلة صغيرة والملح والتوابل
ورحت مخرطة الخضرة وبشرت البصلة للاسف مضطرة ابشرها معنديش خيار تانى عشان تبقي ناعمة جدا
وعندي مبشرة صغيرة خالص بشرت بيها التوم
وجيت علي اخر لحظة قبل ما اقلب كله علي بعضه بصراحة خفت برضه انها تبوظ
وهيبقي حرام علية
قلت اقلب كل حاجة علي بعض ماعدا اللحمة خليها في الاخرررررر
رحت جبت شوية شويه وعلي مطحنة الخلاط وعيشت بقي معاهم
لحد ما الغلبان اشتكي ( موتور الخلاط المسكين )
المهم بعد ما فرمت كل الكمية وبدأت احس انى ممكن انجح
روحت مقلبة اللحم كله علي المكونات اللي طحنتها نص نص لان الرز كان مفتت بس
وبدأت احط شوية صغيرين كل مرة عشان تتطحن كويس
لقيت الكفتة بدأت تظهر وريحتها تظهر كمان وكانت ناعمة والله
وفضلت اعمل جزء جزء ( يا طول بالي يانا)
لحد ما خلصت الكمية كلها والله عشرة علي عشرة
زي اللي بتتعمل عند الجزار او في الكبة
وطبعا الموتور جاله انهيار عصبي منى وكان عايز ينطق بس علي مين كملت برضه
وطبعا كان الله في عون الجيران هيقولوا مين المجنونة اللي مشغلة الخلاط
الساعة 3 الفجر دي هههههههههههه
واخيرااااااااا انا سعيدة بنفسي جدا ع الانجاز ده
لانى كنت عايزة اجرب وجربت
والجيش بيقولك اتصرف هههههههه
المهم حبيت اقول للفتوكات بما اننا في غربة وزهقانين وعايزين نضيع الوقت في اي حاجة
دي طريقة لعمل كفتة الارز الطازة في البيت من غير امكانيات زي الكبة او المفرمة
لا ممكن كمان نعملها بمطحنة الخلاط كمان
وتحيا مصر ام الدنيا………. مواضيع هذا القسم برعاية
ام عمررر ام عمررر 220174_6.gif سوبر فتكات Fatakat 220174 قلب زوجي حبيبي وابني حياتى – و حبي وعشقي لله سبحانه وتعالي