مساء الخير يا فتوكات
وحشتونى جدا ووحشتنى نصايحكم وموضوعاتكم
بس اليوم صار لازم ودعكم بعد ما ولدت الحمد لله
وطبعا قبل ما امشى هكيلكم عن ولدتى عشان افيدكم ….. عارفة انا اى موضوع عن الولادة الكل بيهتم بيه
عشان هى دى اللحظة الحاسمة بعد رحلة الحمل 9 شهور
مش هرغى بقى وهدخل فى التفاصيل
المفروض انى كنت اولد فى شهر يناير طبقا للسونار
لكن البيبى مرضيش يلف ومن الشهر السادس راسه لفوق
والدكتورة قالت لو ملفش نولد أول السنة ان شاء الله
ورحت لها يوم الخميس 26 ديسبر
كشفت وقالت خلاص مفيش داعى للانتظار لأن البيبى اكتمل الحمد لله وبدل ما يجى طلق ورجليه تحت
نولد ان شاء الله الثلاثاء ليلة رأس السنة
فى اليوم ده من الصبح من قبل ما روح للدكتورة كان عندى ألم فى ظهرى شديد جدا
كأن مغص فى ضهرى بس من غير مغص خالص
يوم الجمعة صحيت الصبح لقيت دم وردى اتخضيت كلمت الدكتورة قبل الصلاة كتير مرديتش
مفيش نص ساعة جالى مغصة جامدة اوى قعدت دقيقة واحدة بس فظيعة .. انا من اول التاسع بيجلى مغص اللى هى تفاسيح الولادة
بس مش بتيجى ورا بعض يعنى ممكن مرة الصبح الضهر ترجع بالليل .. فترات متباعدة يعنى
لكن المرة دى مفيش نص ساعة ومغصة تانية شديدة
ولسة الدم الوردى بينزل بس لما امسح بالمنديل
كلمت ماما قالت لى احسبى بين المغصة والتانية قد ايه وخليكى ورا الدكتورة
لسة بنكملكلام جات مغصة تانية وكان عدى نص ساعة تانية
امى قالت لى انا قايمة احضر نفسى وجيالك دى ولادة
كلمت الدكتورة تانى ردت عليا قلت لها على اللى حصل قالت لى خدى حباية بنادول وشوفى ايه اللى هيحصل لو المغص استمر كلمينى
ووقفى اكل الساعة 2
انا كنت شربت كوباية لبن اول ما صحيت
جيت افطر مقدرتش من المغص كلت برتقانة
المهم خدت البنادول على 1 ونص الظهر
واستنيت الساعى 2 جت مغصة بس اخف من الأول
والدم رجع تانى بعد ما كان افتح خالص للون الأصفر
طبعا انا مكنتش محضرة هدومى ولا عاملة سويت .. بس كنت مجهزة الكريم قلت اعمل احتياطى محدش عارف الظروف
واحضر شنتطى ..
الدكتورة اتصلت بيا على الساعة 2 قالت لى ايه الاخبار قلت لها على اللى حصل قالت لى لو نزل عليكى دم أو مغصة تانية على المستشفى على طول
حسيت ان الموضوع جد وشكلى هولد خلاص وطبعا كنت بعيط علشان قاعدة لوحدى
جوزى فى الشغل وامى لسة موصلتش
قلت ادخل اعمل الكريم قبل ما الدنيا تتعك
وانا بعمل الكريم البيبى كان بيتحرك بعنف اوى وفجأةخبط جامد أوى حسيت فى حاجة نزلت
رحت مسحت بالمندب لقيت قطعة دم سوداء
عرفت انها ولادة وكلمت جوزى يجى ياخدنى وامى كانت فى الطريق
طبعا كنت مرعوبة الولادة على غفلة وعندى طلق والبيبى برجله
المهم خلصت الكريم ودخلت اخد شاور دافى وجهزت هدومى وكانت المغصة بدأت تيجى كل 20 دقيقة
ماما وصلت وجوزى فى نفس الوقت واتحركنا على المستشفى وانا فى العربية كنت عاملة اقرى قرآن من المصحف
والمغصة كانت بتيجة شديدة جدا وبقت كل 10 دقايق وكنت بعيط جامد من الألم
وصلنا المستشفى (دمشق اللى فى المهندسين)
كلموا الدكتورة وهى جت على ما حضرونى للعملية
لبسونى وعلقولى محلول وركبوا الكانولا
الدكتورة جت سمعت نبض البيبى وكشفت على بطنى وقالت يلا على اوضة العمليات
كنت لسة محتارة بين البنج النصفى والكلى
ونزلت اوضة العمليات لوحدى وماما وجوزى واخواتى برة
قلت التشهد وفضلت ادعى لكل الناس بس الرهبة صعبة اوى
دكتور البنج دخل الوضة سألنى كلى ولا نصفى فضلنا نتكلم شوية اقتنعت اكتر بالنصفى وطبعا كنت عارفة من فتكات عن الوضع الصحيح للحقنة ومشنكش ضهرى علشان الحقنة متتعبنيش
ومشح ضهرى بالبتادين وحقنة مخدر للضهر وبعدين ادانى الحقنة
وفورا رجلى بدأت تنمل
مش هكدب عليكم كنت حاسة بالمشرط وهو ماشى على بطنى بس من غير ألم
ودكتور التخدير قاعد جنبى وقالى هتحسى باللمس وبأديهم بس من غير ألم
اول ما الدكتورة بدأت تمد اديها جوة بطنى وهى بتخرج البيبى حسيت بألم جامد اوى وقعدت اقول يارب بصوت عالىجدا
وفجأة ضغطة على البطن وحسيت ان بتنفس بسهولة
اتاريهم خرجوا البيبى اللى راسه كانت راشقة فى ضلوعى
الدكتورة قالت البيبى خرج اهو عمل صوت عياط صغير وجه دكتور الأطفال خدوا وكان جشمه متغطى بمادة بيضاء كتير اوى
فضلت ابص عليه وطلبت من الدكتور يقربوا منى علشان اشوفه
وفعلا جابوا وكان بيعيط
بعد كده بدأت احس بألم جامد اوى كنت حاسة بأيد الدكتورة جوه بطنى ومش قادرة من الالم
دكتور التخدير قالى مش عايز انيمك علشان تشوفى البيبى .. بس فعلا الالم كان غير محتمل الدكتورة قالت له نيمها عشان اعرف اشتغل
وفعلا حط فى الكانولا حقنة ولقيت نفسى بدوخ وانا عمالة ازعق بطنى بتوجعنى
وشوية حسيت انهم صغيرين جدا ولقيت الدكتورة بتاعتى بتفوقنى وبتقولى حمد الله ع السلامة
واول كلمة قلتها لما فوقت بطنى بتوجعنى مش قادرة
قبل ما خرج من اوضة العمليات خدت حقنتين مسكن
لكن دول ممنعوش الالم وفضلت حاسة بألم الجرح لحد ميعاد حقنة المسكن بعد 8 ساعات
الساعة 2 بالليل الممرضة دخلت عشان تقومنى وفعلا بدأت اتحرك طبعا اول مرة تقومى مش بالساهل
وكنت عارفة ده من فتكات بس الحقيقة غير الكلام
وطبعا عايزة اقولكم متخليش حد يشدك او يسندك انتى امسكى فيهم واتحركى على قد طاقتك
حتى لو هتقومى فى ساعتين مش مهم
تقريبا قعدت 20 دقيقة لحد ما وقفت اول وقفة
وبمجرد ما وقفت وانا باصة لفوق زى ما الممرضة قالت حسيت انى دايخة جدا واغمى عليا
وطبعا فضلوا يفوقونى ويشربونى عصير وماية بسكر وكنت عايزة ادخل الحمام من اللبوس اللى اخدته
واخدت من السري للحمام اللى هما اقل من مترين حوالى ساعتين
عشان اغمى عليا 5 مرات
رجعت نمت ع السرير ومعرفتش انام خالص
وع الساعة 6 الصبح حسيت ان عايزة ادخل الحمام وساعدونى وقمت ومدوختش الحمد لله وقمت بصعوبة بس احسن من اول مرة
وامى قالت لى تعالى اتمشى فى الطرقة بقى علشان انتى ممشتيش خالص
وفعلا خرجت برة مشيت 3 خطوات وقلت عايزة ارجع حسيت انى تعبانة جدا
ولفيت عشان ارجع بس دوخت واغمى عليا تانى
الصراحة متحسنتش غير لما كلت
طبعا الجرح مؤلموخصوصا انك بتفضل تشيلى البيبى ولازم تحاولى ترضعيه وبتبدأ بقى رحلة الأمومة والسهر وانتى اصلا تعبانة
عشان تتأكدوا ليه الجنة تحت اقدام الأمهات .. ربنا عالم بحالنا
تانى يوم المغرب خرجت من المستشفى ورجعت البيت
ومعايا تيم حبيب قلبى بس بعد يومين الصفراء عليت عليه 18.5 ودخل الحضانة وانهارت ارجوكم ادعوله يخف ويقوم بالسلامة
ربنا يكرم كل حامل وتقوم بالسلامة ونصيحة حاولوا تولدوا طبيعى
ويارب يرزق كل مشتاقة بطفل سليم معافى عاجل غير أجلا
جاهزة لأى استفسار
بحكم فى الله
مرامية مرامية فتكات نشيطة Fatakat 1023939 القاهرة – مصر