السلام عليكم ورحمة الله وبركاته
الحمد لله ولدت يوم 28-3 من حوالي 3 أسابيع
وكانت ولاده قيصري ببنج كلي
وكانت اول ولاده ليا وطبعا كنت مرعوووووووووبه موت زي كل واحدة بتولد لاول مرة
وقلق الولاده دة كان من الشهر التامن لما حسيت اني قربت علي نهاية الحمل
المهم رحت للدكتورة ال متابعه معاها عيادتها الساعه 8 مساء وكنت صايمة من الساعه 2 الظهر
وطبعا ماما كانت معايا كالعاده
كشفت عليا نسا وسونار ولقيت الرحم لسه مقفول مافتحش ولا سنتي بس البيبي تمام وتقدري تولدي
قالت لي روحي عالمستشفي وانا ساعة وهحصلك
طبعا كنت مجهزة الشنطه وكله فالبيت
كلمت بابا واختي جابوا الشنطه وجم وطلعنا عالمستشفي
اخدوني ولبسوني روب العمليات وطبعا قلعت كل هدومي حتي توكة شعري حتي النقاب هههههههههههه يادي الفضايح
ودخلت اوضة العمليات الساعه 12 إلا ربع وحسيت برهبة فظيعه وخوف مايتوصفش
وقعدت اقول الدعاء دة من وانا عالباب لحد مارحت فالبنج " بسم الله الذي لايضر مع اسمه شئٌ في الارض ولا في السماء وهو السميع العليم " … اول مادخلت طلعوني عالسرير وركبولي كانيولا في ظهر كف ايدي الشمال
وحطوا لي محلول واختكم داخت
فسألت دكتور البنج هو البنج فالمحلول ؟
قالي لأ
قولت له اصل انا دخت فضحك هههههههههههه وقالي دة من الخوف اتبنجتي لوحدك هههههههههه
لما اجي احط البنج هقولك قولت اشطه
وشوية وقالي اهو البنج اهو وحطه وانا بقول الدعاء ورحت فالنوم وماحستش بحاجة
طبعا البنج الكلي احسن عشان الناس ال سألوني لان النصفي بيعمل ألم في الضهر بيستمر أسابيع بعد الولاده وعشان كمان صعب قوي الواحده تشوف نفسها وهي بطنها بتتفتح وبتنزل دم وبيخرجوا البيبي وبيخيطوا مشهد صعب ومرعب …
واختي حكتلي قالت بعد تلت ساعه بالظبط سمعنا صوت سيف وهو بيعيط واحنا قاعدين قدام اوضة العمليات
وخرجوا خدوا هدومه وادوه لماما لابس ومتأنتك هههههههههه
وانا فضلت فالعمليات كملت ساعة بالظبط من اول مادخلت لحد ماخرجت
خرجوني علي تروللي وحطوني فأوضتي فالمستشفي عالسرير
عندها حسيت بوجع وقولت اه وسمعت صوت سيف بيعيط
قعدوا ينادوا عليا صفاء قومي قومي
طبعا مش قادة اتكلم قولت لهم سيبوني انام شوية
نسيت اني كنت بولد وفكرت نفسي فالبيت ونايمة وماما بتصحيني عشان أكل هههههههههههه
قالوا لي انتي ولدتي الحمد لله ساعتها افتكررررررررت اني اخر مرة كنت فأوضة العمليات هههههههههههه
والله زي ما بحكيلكوا كدة بالظبط
قولت لهم عاوزة اشرب مية الدكتورة قالت لا مش دلوقتي
قولت لهم هاتوا لي الولد اشوفه
هو ولد صحيح زي ما كان فالسونار ؟
ماما قالت اه
وشالته وجابته جمبي وقربته وعشان عنيا كانت مزغللة مطرح البنج مش شوفته بوضوح
وقولت لماما مش شايفاه استني شوية وهاتيه لما افوق زياده
وقولت لاختي ابعتي رسالة لجوزي قولي له اني ولدت الحمد لله وسيف بخير وبعتت له الرسالة
وكل الوقت دة انا مش قومت مالسرير لاني دايخة وكل شوية يجيبولي الولد اشوفة ويرجعوه والرؤية عندي مش وضحت إلا عالساعة 6 ونص الصبح راحت زغللة عنيا وشوفت ابني اخيرااااااااااااااااا
كانت فرحة ماتتوصفش والله … ربنا يرزق كل مشتاقة ويتمم لكل الحوامل ويفرحهم.
وشوية وجت الدكتورة قالت مافيش اكل ولا شرب غير بكرة
وخلتني رضعت الولد بس كان اجمل احساس انك ترضعي طفلك لأول مرة
اما النهاردة كل نص ساعة بق عصير مش اكتر عشان المعده تشتغل ولازم تقومي تتمشي عشان القولون يشتغل
وقوموني الممرضات وماما عشان اروح الحمام مش قدرت وقعدت أعيط من ألم الجرح ومش قدرت اقوم ورجعت فالسرير تاني
وبعدها بكام ساعة استجمعت قوايا وقومت مالسرير ورحت الحمام بالعافية مع ان الحمام كان في نفس الاوضة وكل شوية اقوم واجي علي نفسي لحد ما ربنا كرمني وبقيت احسن الحمد لله
وخرجت مالمستشفي عالساعة 6 المغرب وروحت عالبيت
وطبعا كنت بتحرك بصعوبة من شدة الالم وهما 3 أيام بفضل الله ووقفت علي رجلي وبقيت اروح الحمام من غير ماحد يسندني وفكيت السلك تامن يوم الولاده…
ونسيت كل الالم كل ما ابص لوش ابني حبيبي انسي تعب الولاده وتعب الجرح وتعب الحمل وقول فداه تعب الدنيا كلها ربنا يحفظك ليا يا حبيبي
والحمد لله وعقبال اخواته هههههههههههههههههههه
ربنا يرزق كل مشتاقة ويتمم لكل حامل علي ألف خير وسلامه
دعيت لهم كلهم فالولاده وربنا استجاب جيت لقيت ناس منهم حملوا وربنا استجاب
أي استفسار انا تحت أمركوا
سيف حبيب مامته سيف حبيب مامته 203800_22.gif سوبر فتكات Fatakat 203800 الفروانيه – الكويت