السلام عليككم .. ورحمة الله وبركاته ..
ازيك يا حلوة ؟؟ يا فتوكة ..
الموضوع دا هيفيد اي عروسة .. او ست بيت .. في انها قبل ما تسافر تتاكد من شقتها ..
انها تمام ومتقفلة كويس ..
يلااا نخش ع الموضوع ..
لو استفدتي من المعلومه ياريت تدعيلي دعوة حلوة ..
وتقيمي لو شايفة انه يستاهل
===============
ازاي تجهزي شقتك قبل ماتسافري ..للسفر
===============
لو مضطرة تسافري او تغيبي عن البيت فترة ففي خطوات هامه لازم تعمليها قبل ماتغلقي الباب بالمفتاح ..
1. هتكنسي السجاد كله بالمكنسة الكهربائية او تنفضيه في البلكونة مهم انك تتخلصي من اكبر قدر تراب فيه .. لو السفر لمده طويلة سنة او اكتر يفضل انك تغسلي السجاد ده لو متسخ خاصه لو فيه بقع اكل او ماشابه لان دي ممكن تعمل عفن بعدين . .مهم برضه لو غسلتيه انك تتاكدي من جفافه تماما قبل تخزينة . .
هنلف السجاده ( رول ) ونركنها تحت السرير او تحت كنبة الصالون ..
كزياده في الاحتياط وهو الافضل مفروض اننا هنغلف السجاد ده .. الافضل اننا نغلفة بقماش يعني لو عندك ( جلابية ) قديمه مثلا او اثنين خيطيهم في بعض واعملي منهم اكياس كبيرة تحطي فيها السجاد ( هتكون فكره عملية لو بتسافري كتير مثلا عايشين في الخارج اصلا لكن لو سفرة مؤقته ولمده بسيطه وعاده بتستخدمي السجاد ده مش بتخزنيه يبقى ممكن تستغني عن تفصيل اكياس خاصه للسجاد )
لو السجاد مغسول ممكن تغلفية باكياس القمامه الكبيرة وتلفي حواليها شرائط لاصقة سوليتيب بحيث تمنعي دخول التراب والحشرات ليه .. هترجعي من السفر باذن الله تلاقيه جديد ونظيف زي ماهو .. بس مهم اوي انك لو هتغلفيه ببلاستيك متكونش الشقة حر بزياده عشان الحراره مع البلاستيك ممكن تتلف لك السجاد ..
البعض بينصح اننا نحط حبات من الفلفل الاسود الصحيح الغير مطحون داخل السجاده واحنا بنلفها لطرد الحشرات .. بس بصراحة مجربتش الفكرة دي . .
===============
2.جهزي ملايات سرير وغطي بيها كل الكنب الموجود في البيت قدر الامكان .. الملايات دي خليها نظيفة ومطوية وجاهزه على الفرد هنحطها قبل ماتطلعوا من الشقة بشويه ..
===============
3. تاكدي انك غسلتي كل الاطباق والصحون فيا لمطبخ متسيبش اي شيء متسخ لان ده ممكن يعمل روائح غير مستحبه فيما بعد . . لو الوقت ضيق اغسليها تحت الحنفية بليفة سلك للتخلص من بقايا الاكل العالق فيها ومش مهم صابون دلوقت .
متتركيش صحون في الصفاية جنب الحوض او ملاعق وماشابه في مكانها المعتاد .. كله مفروض يدخل الادراج ولو مفيش ادراج كافيه ففي فكرة ظريفة بعملها لما اكون مسافرة اني بجمع كل الادوات الي بستخدمها عاده وبتكون معلقة على الحائط او مش في دولاب مغلق بحطها في كرتون عادي بجيبه من اي بقالة قريبة .. بغلق الكرتون ومش مهم ببلاستر او ماشابه .. الفكره اني امنع ان التراب يوصل للحاجات دي عشان لما ارجع باذن الله استخدمها على طول مش لسه هقعد اغسل واحده واحده ..
بعد ماتخلصي غسل الصحون كلها تأكدي ان مفيش حاجه فيها مية نسيتيها على جنب .. الحشرات بتقتات على المياه دي مفروض انك اثناء سفرك ميلاقوش اي شيء يقتاتوا عليه . .
يفضل تحطي كمية من الكلوركس في حوض المطبخ بحيث تطهر لك ماسورة الصرف فيه اثناء فترة غيابك ..
===============
4. بنتأكد من اغلاق كافة البالوعات اكرمكم الله غلق محكم .. كمان بنغطي قاعدة التواليت ويفضل نحط عليها حاجه ثقيلة قارورة مياه كبيرة مثلا عشان نضمن ان الفئران مش تطلع منها خاصه والبعض منها قادر على تحريك غطاء التواليت بالفعل . .
شفاط التهوية في المطبخ هو كمان تأكدي انك قافلة الريش بتاعته كويس ..
لو مسافرة مده طويلة ممكن تلصقي اكياس كبيرة او مشمع او مفرش سفرة حول الشبابيك ببلاستر عريض .. ده بيمنع ان الاتربة تتسرب منها اثناء فترة غيابك ويحافظ لك على الشقة .. كل ماكنتي ساكنة في دور مرتفع كل مااحتجتي لاكياس اكثر سماكه عشان الهواء بيكون اقوى بس عاده سمك كيس القمامه المعتاد مناسب فاي اكياس حجمها كبير هتوفي الغرض ..
نفس الشيء بنعمله في التكييفات لو هي شباك بنحط حواليها اكياس لو هنغيب كتير . .
===============
5. النجف والمراوح المثبته في الحائط وماشابه .. تحطيها كلها زي ماهي في اكياس سوليفان كبيرة او اكياس قمامه وهي معلقة وتلفي حواليها سوليتيب . .وعلى فكره مفروض اننا في الشتاء بنعمل كده في المراوح وفي الصيف بنعمل كده في الدفايات حتى لو مش مسافرين . .
===============
6. متتركيش ملابس متسخه اغسليها كلها قبل ماتمشي .. اي حاجه هتقعد متسخه شهور من شبه المستحيل انها تنظف بعدين هتفضل فيها البقع ولونها هيروح ده غير انها ممكن تتعفن او تتمزق ( تشيط )
===============
7. قبل سفرك بفترة احرصي على عدم شراء خزين جديد في المطبخ واستهلكي قدر الامكان الموجود في الثلاجه والدواليب .. قبل سفرك بيوم او يوم السفر هاتي كيس كبير وجمعي فيه كل الي في الثلاجه وكيس تاني حطي فيه كل الزوائد في دولاب المطبخ من دقيق ورز ومكرونة .. الخ ان وجد واديهم لاي حد قريب منك او حد محتاج المهم متتركيش اي من الاشياء دي في مطبخك هترجعي كده كده تلاقيها باظت او الحشرات اكلتها ..
بس مهم برضه لو مش هتطولي انك تتركي حاجه تاكلوها باذن الله لما ترجعوا يعني مش تبقى الشقة فاضية خالص .. علبتين تونة .. خبز في الفريزر .. برجر .. الخ
===============
8. لما تكوني مسافرة لشهر مثلا اعملي حسابك انهم ممكن يكونوا شهر ونص . . لو مسافرة سنة اعملي حسابك انها ممكن تدخل ف سنة ونص او اثنين وهكذا .. يعني متسيبيش اي شيء معلق بزعم انك راجعه بسرعه لان محدش عارف الظروف فيها ايه او ممكن يحصل ايه فظبطي امورك دايما انك ممكن تغيبي ورتبيها على كده ..
9. لو مش مضطره تفصلي الكهرباء عن الشقة فيفضل تتركي الثلاجه شغاله عشان متبوظش او تعمل رائحه .. لو هتغيبي سنة او اكتر اعتقد ممكن تفصلي الكهرباء وتفصليها بس هو الافضل دئما نتركها شغاله لكن فاضية مفيهاش حاجه ..
===============
10. يوم السفر وانتي بتحزمي امتعتك جهزي شنطه تكون عميقة بعض الشيء ودي تكون فاضية متحطيش فيها حاجه .. احزمي بقية الشنط لازم هتحتاجي الشنطه دي هيتبقى شيء ملوش مكان هتحطيها فيه .. ده غير اشياء بتظهر في اللحظه الاخيره وانتي قفلتي الشنط خلاص زي فرشاة الشعر واللعب الي الاطفال متمسكين بيها والكتب وو و .. كل ده بنحطه في شنطه اللحظات الاخيره دي بصراحه مبستغناش عنها . . الشنطه دي اقفليها في اخر دقائق وانتم طالعين . .
===============
هتعدي كام شنطه معاكم بما فيها شنطه ايدك بما فيها المحفظه الصغيره الي مع زوجك الي فيها التذاكر وجوازات السفر وغيره .. كل واحد هيبقى عارف هو هيمسك اي شنطه ومسؤول عن اي مجموعه .. حتى الاطفال كل واحد يبقى عارف هيكون ماسك في ايد مين ومهمته يعتني بمين ..
11. شخص واحد هتكون مسؤوليته يغلق الشبابيك كلها ويتأكد من اغلاقها .. هيكون مهمته يتاكد من اغلاق كافة محابس المياه ومقابس الكهرباء ويتمم على مفاتيح الغاز .. بعد مايتأكد من كل ده شخص ثاني غيره ويفضل انتي او زوجك يرجع يلف على الاشياء دي كلها ويتأكد انها اغلقت خاصه لو هتغيبوا فترة طويلة .. لو حد منكم ( موسوس ) لازم يكون هو الشخص الي هيتأكد بنفسه عشان يفضل باله مرتاح طول فترة السفر ..
فيشة المكواه بالذات تاكدي انك شلتيها لان كتير بيجهزوا ملابسهم في اللحظه الاخيره وبيفضلوا طول الرحله قلقانين ياترى شالوا الفيشه ولا لاه . .
تاكدي انكم اغلقتم كل التكييفات ومصابيح كل الغرف . .متسافريش ابدا وكهرباء الشقة مقطوعه .. لان ممكن تكوني ناسيه حاجه ومش هتعرفي انها شغاله غير لما ترجعي ..
===============
12 . يفضل تغلقي ابواب الغرف قبل سفرك لتقليل التيارات الهوائية فيها وبالتالي تقليل التراب .. ممكن برضه تحطي ملابس قديمه او فوط وماشابه تحت عقب الباب عشان تمنع الاتربه قدر الامكان ..
===============
13. تاكدي من اخراج القمامه ـ اكرمكم الله ـ ودي جهزيها قبل السفر بيوم واتركيها عند باب الشقة واخرجيها معاكم وانتم ماشيين ..
===============
14. بعد التاكد من ان كل شيء تمام كله يخرج من الشقة والشخص الي هيعيد التأكد يدخل ياخذ لفته على كل شيء بعدين نغلق باب الشقة بالمفتاح ومهم جدا نغلقة مرتين او اكثر ان كان القفل يسمح بذلك .. اي لص مبتديء او معدوم الخبره يقدر يفتح الباب المغلق بدون مفتاح لكن بتحتاج مهارة اكتر وضجه وادوات قد لاتتوافر لكثيرين عشان يفتحوا الباب المغلق مرتين او اكتر . .
مهم جدا تلقي نظرة على الشقة من الخارج وتتاكدي انك مش سايبه حاجه في البلكونة ايا كانت ولو فرده شراب على الحبل .. اي شيء هتتركيه هيلفت النظر لشقتك ان دي شقة مفيهاش حد واصحابها مسافرين ومتستهونيش بالملاحظه دي فكثيرين بيبحثوا عن مثلها لسرقة الشقق في غياب اصحابها . .
واخيرا دائما وانتي بتغلقي باب شقتك بتستودعي الله نفسك ومالك وبيتك وزوجك واطفالك وباذن الله مش بيضركم شيء وتروحوا وترجعوا باذن الله بالف سلامة . .
===============
بنت خير أمة بنت خير أمة 370968_1.gif سوبر فتكات Fatakat 370968 تبوك – السعودية