فتوكاتى حبايبى ازيكم عاملين ايه
جيبالكم وصفتين النهارده احلى من بعض
الناجتس البيتى الاصلى الاشكال الجميله للاطفال
ورز حبه وحبه بالكبد والقوانص جميل جدااا
بنحبه والله اكتر من الرز بالخلطه كمان
نشوف كده الصوره التشويقيه
مقادير الناجتس
كيلوا صدور فراخ
2بطاطس وسط مسلوقه
نصف معلقه صغيره من كل من
ملح
فلفل اسمر
كارى او كركم
بابريكا
توم بودر
بصل بودر او مجفف
ريحان بودر
بيضه (اختيارى)
كيس فيجيتار للعجن
للتغطيه
معلقتين لبن
بيضتين
عيش او توست مطحون
الطريقه
نفرم الفراخ فى المفرمه او الكبه
ونهرس البطاطس بالهراسه او الشوكه بلاش
الكبه لانها بتنعمها اووى وهتتعبك فى التشكيل
نخلط المكونات كلها مع بعض ونتبلهم بالتوابل
هتتكون معانا عجينه لينه نوعا ما
نفرش كيس تلاجه على صنيه ونفرد عجينه الناجتس على الصنيه
وممكن نفرد بجوانتى او باستخدام كيس لان العجينه بتكون بتلزق شويه
وبعد الفرد ندخلها التلاجه ساعتين او الفريزر نصف ساعه اسرع
وبعدين نبتدى نشكلها باستخدام القطاعات اللى عندنا نعمل اشكال
على قد مانقدر علشان الاطفال ينبسطوا وياكلوها
وممكن تشكليها كور او صوابع زى ماتحبى
واللى بيفضل من العجينه برجع افرده تانى وادخله تانى
الفريزر واطلعه اشكله لغايه مايتبقى جزء صغير بعمله اى شكل بايدى وخلاص
وبعدين نحط الناجتس فى خليط اللبن والبيض المتبل ملح وفلفل
وبعدين نحطه فى العيش او التوست المطحون
لازم على فكره تطحنى عيش او توست ولو توست بيبقى الناجتس نفس
طعم الجاهز بالظبط على فكره الاحسن تطحنى توست
وممكن لو عامله كميه تخزنيها فى الفريزر عادى خالص
وتحمرى بالطلب ومتخافيش خالص انا بعملها بالشهر والله
وبخليها جاهزه على التحمير زى الجاهزه بالظبط
يعنى تخلصيها خالص وتحطيها فى اللبن والبيض والتوست
وترصيها فى اطباق فويل وتفصلى بينهم باكياس بلاستيك
وعلى الفريزر على طووووول
ولو هتحمريها تسخنى زيت غزير لازم وتحطى الناجتس
وتحمريه وبالهنا والشفا نشوف الصور
وده شكلها بعد التحمير عملت اشكال كتير للعيال
ندخل على الرز بالكبد والقوانص وبعدين نكمل الصور
مقادير الرز بالكبد والقوانص
رز بعدد الفراد
كبد وقوانص فراخ بعدد الافراد
بصله كبيره مفرومه
2فلفل اخضر مفروم
نصف معلقه توم بودر او مفروم
نصف معلقه بصل مجفف (اختيارى)
ملح وفلفل
معلقه سمن او زبده
الطريقه
نقطع الكبد والقوانص ونخلى كل نوع لوحده
انا بحط القوانص مع القلوب الاول نصف ساعه وبعدين
اضيف الكبد علشان متتهريش لو حطتيها من الاول لان
القوانص والقلوب تاخد وقت اطول فى السوا
نقدح نصف معلقه السمنه ونشوح فيها القوانص ونضيف التوابل كلها
ماعدا الملح خليه لما تدخل فى السوا ونحط عليها كوب ماء
وممكن نضيف كوب تانى عادى جدا
الكبد قبل ما نحطها على القوانص اشوحها فى طاسه بنصف معلقه
السمنه التانيه تاخد صدمه وبعدين اضيفها على القوانص بعد نصف ساعه
بالنسبه للرز نغسله كويس ونصفيه من المياه
وناخد نصفه نحطه فى مصفاه ينشف خالص احسن واريح
ليكى علشان يتحمر بسرعه لو حمرتيه وهو لسه مغسول ومندى
هياخد وقت طويل اووى فى التحمير
نحمر نصف الكميه لغايه ماتاخد لون كويس ونضيف الباقى من الرز
وعليه الميه بتاعته كل كبايه رز ليها كبايه ميه والكلام طبعا للمبتدئات
ولما يستوى بنقدمه وبالهنا والشفا
نشوف الصور
انا كده خلصت الحمد لله يارب موضوعى المتواضع يعجبكم
ومتنسونيش من صالح دعائكم انا واولادى
ومتنسووووووش التقييييييييييييم
مواضيع هذا القسم برعاية
سيسو زيزو سيسو زيزو 822446_8.gif فتكات غالية قوي Fatakat 822446 المنصوره – مصر