سلام عليكم ياقمرات
حيث انى اسكندرانية فبفضل الله بنعمل في الاسبوع الواحد اكلتين سي فوود ع الاقل
و باذن الله كل مرة هنزلكو طريقة حاجة شكل ^_^
و يارب تعجبكم
النهاردة بقي ان شاء الله هقولكو علي الجندوفلي الاسكندرانى
طبعا هو فيه منه انواع كتيييييييييييير
هنعمل النهاردة الابيض ف اسود
مش غالي الكيلو بحوالي 10 – 15 جنيه
ندخل بقي ع المهم
ده شكل الجندوفلي بتاعنا
سبحان الله بيبقي نااااشف جدا شبه الحجارة
ولو اتشقلبتى ووقفتى علي ايديكى ورجليكي مش هتعرفي تفتحيه بايدك
علشان كده بعون الله بتحطيه ف حلة وتحطى عليه ماية مغلية وتسيبيه دقيقة
باذن الله هتلاقيه كله بيتفتح من غير ماتلمسيه
و الصورة توضح كلامى
الحمد لله اتفتح كله معاكى خلاص وبقي تمام
هتيجي بقي بمعلقة تطلعى نالجندوفلاية فسها من جوه
سبحان الله بتبقي شبه ام الخلول بس علي كبيير طبعا
واعذرونى انى مصورتش الحتة دى
وبعد كده ان شاء الله
هنعمل دقة زى دقة السمك بالظبط
توم وكمون ولمون وملح وفلفل اسمر وفلفل حلقات
ونهرسهم مع بعض كويس
ونقلب فيهم الجندوفلي كله علشان ياخد طعم التوم
ودى شكل الدقة
الحمد لله قلبناهم تمام ؟
بفضل الله دلوقتى عندك طريقتين تعملي بيهم الجندوفلي
الاولى انك تقليه زى السمك
و التانية انك تعمليه بطريقة الكبدة الاسكندرانى
و بعون الله هوريكم الاتنين
هنا جبت الدقيق وحطيتهم فيه
وبعد كده نحطهم في زيت غزير علي نار عالية
وبمجرد الحمد لله لونهم بقي دهبي تشيليهم علي مناديل المطبخ
وبقي بالشكل ده بعد ما قليته
او انك تعمليه زى الكبدة الاسكندرانى
يعنى باذن الله تجيبي تومة وتشوحيها في حبة زيت ولما تتشوح تحطى يجى معلقة صغيرة خل وتحطى الجندوفلي مع حبة ملح وفلفل وشطة
وبفضل الله بقي بالشكل ده
تمت بحمد الله
نيجى بقي لصور التقديم
ما شاء الله
نقول بقي بفضل الله اهم التكات
ــــــــــــــــــــــــــــــــــــــــــــــــــ ـ
1- النوع بتاع النهاردة ده لاااااااااازم تبقي باذن الله متاكده انه طاااازة
وحيث ان سبحان الله عمرك ماهتعرفي الفرق بين الطازة و البايت
يبقي لازم يكون لكي بياع معين عارفاه وواثقة منه
وهتلاقيه ان شاء الله من نفسه بيقولك ع الحلو و الوحش
وده طبعا علشان مايخسركيش كزبونة
و الكلام ده في كل انواع السي فوود سواء سمك او غيره
2- السي فوود المقلي بشكل عام سواء سمك او غيره باذن الله تحطيه في زيت غزيييير و على نار عاليه
لانك لو وطيتى النار لا قدر الله هيتهري منك كانه مسلوق ومش هيبقي حلو خااالص
3- القلي بفضل الله يكون بدقيق متفكريش ابدا تقلي اى سي فود من غير دقيق
4- باذن الله اول ما الحاجة تطلع من الزيت رشي عليها ليمون بيبقي الحمد لله طعمها جميل بعد كده وحاجات معينه بنرش عليها ليمون وكمون
5- واهم حاجة تحطى نص ليمونة في الزيت قبل مايقدح يعنى بمجرد ماتفتحى عليه النار تحطى نص ليمونة علشان تمتص ريحة القلي ومتبقاش ريحة الشقة جامده مهما كنتى مشغلة الشفاط
وبمجرد ان الليمونة لونها يغمق تطلعيها وتحطى غيرها
الحمد لله خلصت
ماتنسيش تدعيلي ان ربنا يجمعنى بحبيبي في الحلال عاجلا غير اجلا
وماتنسيش التقييم
مواضيع هذا القسم برعاية
Rana Sokar Rana Sokar 1004433_3.gif سوبر فتكات Fatakat 1004433 alex – egypt