السلام عليكم ورحمة الله وبركاتة
ما تنسيش تردي السلام يا أختي .
زهقنا بقى من الحلويات والتورت والكب كيك وعايزين حاجة دسمة كدة نتغداها . يوم الخميس رجعت البيت لقيت ماماتي قاعدة وما عملتش غدى . قالتلي انا نفسي في برياني الجمبري من إديكي . قلتلها بنت حلال انا كمان نفسي فيه أوي .
امممممممم بصو يا جماعة البرياني والكبسة والمجبوس والفوقة والتحته وال….. الخ وحجات كدة عمرك ماسمعتي عنها غير الكبسة والبرياني دي وصفاتي خليجية . وبصراحة لما بدخل هنا في قسم الأطباق الرئيسية وبلاقي وصفة الكبسة او البرياني بلاحظ انها خطأ جملة وتفصيل يعني فكرة البرياني أو الكبسة الي الفتوكة بتعملها مش موجودة (يعني زي الي بيعمل الملوخية ني في ني من غير ما يسلق لحمة ولا يخرط ملوخية) والناس الي داقو البرياني والكبسة في الخليج يعرفو اني ليها نكهة مميزة جداً وبتحسي انها مليانة نكهات كدة بتفاصيل ممكن تبقى صعب اننا نعملها في البيت .
فالنهاردة بإذن الله حتكون وصفتي هي برياني الجمبري
وممكن يكون باللحمة او الفراخ او حتى السمك وحتلاقي خلال الموضوع بقولك امتى بتضيفهم وإزاي .
حبايب قلبي في حاجة مهمة جدا جدا عايزة أقولها .
ممكن تلاحظي اني الصور كتيرة والتفاصيل والاضافات اكتر و أكتر فعايزة أقولك اني دي هي طريقة البرياني الصحيحة البحتة والإضافات والتكات دي جزء لا يتجزء من الوصفة. يعني لو تحبي تحضري طبق برياني بنكهة أروع من الي بنشترية من برى يبقى لازم تلتزمي بالمقادير والتكات الموجودة في الوصفة دي.والصور الكتيرة تعمدت اني احطها إمعان في الشرح وتوصيل المعلومة لكل مستويات الفتوكات الي هنا بدء من المبتدأت وصولاً بشيفات المدونة المحترفات.
يخربيت اللوك لوك والرغي ياريت تجيبي من الأخر
بإسم الله نبدأ
ده الشكل النهائي لقالب برياني الجمبري
مقادير الرز
رز بسمتي طويل الحبة . ما ينفعش الرز المصري او الامريكي خالص خالص في وصفة البرياني والكبسة
3 معالق زيت نباتي , 2 ورق لورا او روق غار , 4 عيدان قرنفل , 4 حبهان صحيح
ديصورة عائلية لمكونات خلطة الجمبري
ونكهة البرياني ممكن تبقى باللحمة او بالفراخ او بالسمك . لو حتعمليها باللحمة يبقى اللحمة لازم تبقى مسلوقة وجاهزة ولو حتعمليها بالفراخ يبقى الفراخ لازم تكون متقطعة ونيئة مش مسلوقة , ولو حتعمليها بالسمك لازم السمك يبقى مقلي وفي سياق الموضوع حشرح امتى نضيف انواع اللحوم المختلفة . أنا كنوع من التغيير حعمل البرياني بالربيان او الجمبري المثلج . وعلى فكرة طعمهة جميل جدا جدا جدا في البرياني . واستخدمت النوع الصغيرة .
شرح مقادير البرياني:
ده الجمبيري الي استخدمته
كيس صغير وزنه 400 جرام يكفي 4 أشخاص في وصفة البرياني دي
والجمبري المثلج بفضل أحطة في ماية عادية وأغير الماية تقريباً 3 مرات لحد ما الثلج يذوب خالص
وأصفية ويبقى جاهز للإستخدام لأي وصفة
عدد 1 بصلة كبيرة مقطعة جوانح
عدد 1 طمطماية كبيرة مقشرة ومقطعة لشرائح
قرن فلفل حراق لو بتحبي الأكل مولع قطعيه صغير . وحاجة مهمة جدا جدا جدا في البرياني مزيج الثوم والزنجبيل المدقوق .
ده شكل الجنزبيل الفرش يا جماعة
وده شكله من جوه وبنستخدمة كتير جدا جدا في وصفاتنا الخليجية
ولوصفة البرياني خدت الحتة الصغيرة دي وفرمتها مع فصين توم
وحنحتاج لبصلة كبيرة مقلية . وشوية بقدونس مفروم وكام ورقة نعناع طازج
3 معالق زبادي . و3معالق زيت نباتي
مواضيع هذا القسم برعاية
شيف لطيفة مسعود شيف لطيفة مسعود 330245_1.gif فتكات رائعة Fatakat 330245 دبي – الامارات