السلام عليكم ورحمة الله وبركاته
اخباركم ايه وحشتوووووووووووووووووووونى بجد وبقالى كتير ما عملتش مواضيع
انا من اسبوعين كده قررت اعمل شوية معجنات واعينها فى الفريزر تبقى لفطار او عشا ف عملت كمية عملت منها مينى بيتزا وكرواسون وبيتزا وفطاير بالجبنة والزعتر
المقادير
5 كوب دقيق (المج الزجاج بتاع الشاى)
1ونصف ملعقة كبيرة خميرة فورية
2 ملعقة سكر كبيرة انا بحب العجينة مسكرة شوية
نصف ملعقة ملح صغيرة
1 ملعقة صغيرة بيكنج باودر
4 ملاعق زيت زيتون او درة
2 ملعقة كبيرة زبادى
ماء مخلوط باللبن ويكونوا دافيين او ممكن ماية بس
الطريقة
بنحط الخميرة مع السكر وشوية ماية دافية ونغطيها لحد مانجهز باقى المكونات
ننخل الدقيق مع البيكنج باودر والملح
نضيف الخميرة بعد التخمير ونقلبها كويس فى الدقيق
نحط الزبادى والماء بالتدريج
ونعجنها كويس وفى الاخر نفك العجين بالزيت
ونفضل نعجنها كويس لحد ماتبقى عجينة لينة ما تلتصقش بالايد وملساء
نغطيها بكيس وفوقه قماش نضيف وندفى الفرن ونحطها ساعة او ساعة الا ربع
لحد مانجهز باقى المكونات
الحشوات طبعا زى مانحب
انا كان عندى شوية لحم مفروم صغيرين عملت بيتزا باللحم المفروم والجبن الرومى
عملت مينى بيتزا بالجبنة
عملت كرواسون وفطاير بالجبنة البيضا والزعتر وممكن كمان تحشيه بالشوكولا او السبانخ زى ماتحبى
وبعد التشكيل بنسيبها تخمر فى مكان دافى نصف ساعة او اكتر زى ما نحب
ولما تطلع من الفرن بنسيبها تبرد ونكيسها ونحطها فى الفريزر وبنطلع منها زى ما نحب ونحطها تدفى فى الفرن او الميكروويف وبتبقى زى الطازة وممكن كمان نديها لاولادنا فى المدرسة
ودى النتيجة
والصينية الحلوة دى للى ترد وتقيم
وبعديها هتحلى بطبق الرز بلبن الجامد ده
اتمنى انها تكون عجبتكم ولا تنسونى بالدعاء مواضيع هذا القسم برعاية
hopeless_87 hopeless_87 فتكات رائعة Fatakat 46977 المنصورة – مصر