حبايب قلبى رشيقات المستقبل أنا نويت أعمل ريجيم بجد مش يومين وازهق زى كل مرة
وبإذن الله حاسة أن ربنا هايوفقنى المرة دى
ونفسى اللى ينضم ليا هما اللى فى الغربة زى أسم الجروب ومش قصدى غربة السفر بس
لكن الغربة اللى نتجت عن أجسامنا الكبيرة وأنطوائنا على أنفسنا
يعنى الغريبة فى بيت أهلها عشان دايما بينتقدوا شكلها وجسمها ودايما يقولوا مش هاتتجوزى
والغريبة فى بيت جوزها ومش قادرة تولع النور وهى مع جوزها عشان مكسوفة من شكل جسمها
والغريبة بين أصحابها عشان بيجروا ويضحكوا ويشتروا ملابس تناسبهم وكل ما يخرجوا
تتحجج بأنها مشغولة عشان ماتتسوقش معاهم عشان طبعا مش هاتعرف تشترى موديلات زيهم
والغريبة مع أولادها ومش قادرة تلاعبهم من كاتمة النفس واللحم المتراكم عندها
وطبعا قبل الكل غرباء البلد اللى زيى مسافرين وبعيد عن أهلهم
بصوا بقى يا بنات اللى هاينضم معايا يكون قد الريجيم بمعنى
1_لازم كل يوم تدخلى تقوليلى يومياتك إية وإذا مادخلتيش هأزعل منك أوى
2_الريجيم شىء مقدس لازم نلتزم بية واللخبطة ممنوووووووووووووووووع
3_الرياضة بنفس أهمية الريجيم وهاأنزل لكم لينكات التمارين اللى هانطبقها يومياومفيش أعذار
4_مواعيد لقاءنا فى الجروب ودى مواعيد مقدسة
وصدقونى بعد ماهاتعرفوا بعض مش هاتقدروا تستنوا ساعة
من غير رغى اصلى عارفاكم
5_ الريجيمات لازم تكون صحية عشان نخس بصحة بدون أمراض ومانرجعش تانى
يعنى رجاء خاص من أختكم بلاش كيمائى
6_ كل واحدة ليها الحق فى أختيار ريجيمها عشان المرونة بس أهم شىء النتيجة
وتقولى رجيمها إية عشان أتابعها كويس
7_الوزن أسبوعى يوم السبت الصبح وبقية اليوم فرى
لحد الساعة 8 بس وأستوب
واللى مش عايزة اليوم كلة تاخد واجبة واحدة
8__البداية اليوم 27 /11 /2016
9__منتظرة أشتراككم بفارغ الصبر عشان نشجع بعض
يلا ورونى الهمة
نبتدى بسم الله الرحمن الرحيم
طبعا أنتوا بتقولوا الست دى مالها رغاية وعمالة قوانين وتحكمات
مش تقولنا هانعمل إية يمكن كلامها مايعجبناش
ماشى يا قمرات هأنقول
أولا/ الريجيم
عن نفسى بأفضل ريجيم الهرم الغذائى من بهاء الناجى
ودة أول ريجم للى حابب يمشى معايا علية
الاسبوع الاول
الفطار
كوب شاى او نسكافيه بلبن خالى الدسم
+
شريحة كيك بالبرتقال بحجم 2 توست سن
او
3 معالق فول + رغيف سن
الغدا
اليوم الاول : وجبة مفتوحه
اليوم التانى : 6 معالق بتنجان مشوى +سلطه + رغيف سن
بتنجان مشوى تيجيبى البتنجان تشوية وتفرميه وتحطيلو الثوم الفلفل الاسود و الخل وزيت الزيتون وسحطيه فى صحن وتزينيه بالزيتون الاخضر
اليوم الثالث:علبة تونه + سلطه + رغيف سن
اليوم الرابع :سلطه مكسيكيه بالجمبرى + رغيف سن
اليوم الخامس :8 معالق فول +سلطه +معلفة زيت زيتون + رغيف سن
اليوم السادس:شريحتين صدور مشويه +3 معالق بطاطس + سلطه
اليوم السابع : نص كيلو سمك مشوى + سلطه + رغيف سن
العشاء
علبة زبادى + 2 ثمرة فاكهة
طيب أنت ماجبتيش جديد يعنى إية الميزة
الميزة أن أختى وحبيبتى مى الشرقاوى وأختنا
honhon
عاملين موضوع هايل عن وصفات الريجيم دة لما كان بيقولها الشيف حسن
وأنا مجمعة عندى شوية كمان يبقى هانزل الريجيم ووصفاتة
عشان نتعلم إزاى نعمل أكل دايت
ودى وصفة كيكة البرتقال دايت
السلام عليكم
انا جايبالكم وصفة الشيف حسن لكيك البرتقال الدايت لكن فى الحقيقة انا عملت بالكوب مش بالجرام وطلع كويس والحمد لله
دى الوصفة اللى عملها بعد برنامج العيادة للدكتور بهاء ناجى يعنى اللى ناوية تمشى على رجيم الدكتور بهاء هحاول اذا قدرت اجيب لكم الوصفات بتاعة النظام باذن الله وربنا يقدرنى
المقادير
كوب الا ربع سكر دى انا عملتها سكر عادى لكن الوصفة الاصلية مائة جرام سكر دايت بس انا مش بحب طعمه فبدلته اللى تحب سكر الدايت تحط
– واحد وربع كوب دقيق
-خمسة صفار بيض
-خمسة بياض بيض
-اتنين ملعقة كبيرة نشا
-كوب عصير برتقال
– ملعقة كبيرة بشر برتقال الاصفر فقط دون القشرة البيضة
-نصف ملعقة صغيرة ملح
—الطريقة —
يضرب البياض ويكون المضرب والطبق نضاف جدا وجافين ومفيش اى جزء من الصفار واقع فى البياض وفى نصف الضرب نضيف عليه الملح وبعد شوية نضيف نصف السكر ونضرب على السرعة العالية لحد ما يعلى ويمسك زى الكريمة
-فى وعاء اخر نضرب الصفار مع بشر البرتقال ونضيف عليهم السكر الباقى
–نضيف على الصفار والسكر العصير ثم نقلب الدقيق والنشا ونكون نخلناهم بعد العيار
ونضربهم كلهم بالمضرب كويس
–الخطوة المهمة
-اننا نقلب الخليطين معا لكن بالراحة وتقليب فى اتجاه واحد من تحت لفوق بشكل دائرى وبهدوء حتى لا يخرج الهواء
تصب فى صينية مدهونة زيت اذا كانت تيفال
واذا كانت المونيوم تدهن زيت وترش دقيق خفيف
تدخل فرن 180 درجة لمدة نصف ساعة وبعدها تختبر المهم لا تخرج قبل النضج
وبالهنا والشفا
خلصنا الريجيم ندخل على إية
ثاني/ا الرياضة
هانبتدى الأسبوع دة بالمشى عشان نسخن
للأسف الفيديوهات مش راضية تفتح دلوقتى
أكيد هأنزلها لكم فى وقت قريب جدا
ثالثا/ العناية بجسمنا وبشرتنا وشعرنا
كل يوم مع بعض هانقول نصيحة ونحاول نعملها
يعنى إية المفيد لبشرتنا ولشعرنا
إية المنتجات اللى أستخدمناها للبشرة والشعر وطلعت ممتازة
صراحة المدونة هنا مش مخلى ماشاء الله وأحترت فى الوصفات
بس أكيد مع بعض كل حاجةهاتوضح
وهانتعلم نختار اللى يناسبنا
مسك الختام
رابعا /خطة التقرب من الله عز وجل
وأهمها
الصلاة على وقتها وخصوصا الفجر
أذكار الصباح والمساء
السنن والرواتب اليومية
قرأة جزء قرأن
وبأمر الله نتفق ونبتدى حفظ مع بعض
أم الجواهر أم الجواهر 195233_22.gif فتكات غالية قوي Fatakat 195233 مدينة أحلام اليقظة – الأمل