زيكم يااجمل فتوكات….يارب كلكم تكونوا بخير
طبعا الحياة بتلهينا عن اننا ندي نفسنا حقها بالاهتمام والدلع وكل حاجة حلوة
وعشان دماغ الواحدة فينا بقت فيها مليوووون حاجة وصعب اننا نوفق بين الحاجات دي كلها
بس لو رتبنا مسؤولياتنا وحياتنا هتبقا احسن بكتير من ان الواحدة فينا تبقا عايشة اليوم كدا وخلاص
وانا قريت مواضيع كتير هنا بتتكلم عن ازاي تبقي منظمة وان دي حاجة لازم تتعودي عليها بحيث انها تبقا روتينك اليومي
لو كل واحدة فينا عملت جدول لنفسها تمشي عليه ويبقى هوا دا روتينها اليومي اكيد ان شاء الله هتدي كل حاجة حقها
يبقا هنعمل جدول كدا بسيط للروتين اليومي
فترة من الصبح لحد الظهر:
طبعا تصحي قبل جوزك بنص ساعة على الاقل عشان لما يصحا يلاقيكي قمر ونظيفة وزي الفل
تدخلي تاخدي شاور سريع يعني بالشاورجل والمية بس ووشك تغسليه باي غسول بترتاحيله
وتحطي البدي لوشن وكريم النهار لوشك
وتعطري جسمك بقا بطريقتك سواء كانت بمكعب مسك او عود او فانيليا او اي زيت عطري او بالمخمرية تدهني جسمك وهوا سخن او تمرري المكعب على جسمك ويكون جسمك مندي شوية والمسام مفتوحة ن المية السخنة
وطبعا متنسيش تعطري شعرك بردو بنفس الطريقة او بالسيرم وتسرحيه
تغسلي سنانك وتعقميها طبعا بمعطر الفم
هتلبسي ايه بقا ياقمر؟؟؟
اكيد مش قميص النوم لا مينفعش تبقي قاعدة بالقميص كدا طول اليوم لازم القميص يبقا حاجة مميزة لها وقتها
يبقا احنا هنلبس بيجاما حلوة زينا كدا ونحط البرفيوم
وتصحي جوزك بقا هيلاقيكي حلوة كدا هيصحا على طول
وهوا بياخد الشاور بتاعه تكوني رتبتي السرير وحضرتي الفطار
تمام كدا ياحلوين؟؟؟هينزل شغله بقا وهتاخدي راحتك بس مش تروحي تنامي كدا هتبوضي النظام كله
هتعملي شوية رياضة مش اقل من نص ساعة او تشوفي البيت محتاج ايه وتكوني عاملة لسته فيها الطلبات وتنزلي تجيبي الطلبات واهو منك بتمشي بردو وبتعملي رياضة بس لو منزلتيش يبقا لازم تعملي الرياضة
هتبداي تطبخي وتكوني ضابطة وقتك على ميعاد وصول جوزك يعني كل حاجة تبقا خلصانه قبل مايجي البيت بنص ساعة
فالنص ساعة دي هتدخلي تاخدي شاور زي بتاع الصبح عشان انتي دخلتي المطبخ وبقا ريحتك اكل وعملتي رياضة واكيد ادبهدلتي بس الفرق بقا اننا مش هنلبس بيجاما لالالالالالا هنلبس حاجة بقا دلوعة كدا زينا بدي مثلا على جوب قصيرة او هوت شورت ولو فيه حد معاكو فالبيت مامته مثلا هتلبسي بنطلون جينز ونحط مكياج خفيف ونحط برفيوم تكون ريحته فواحة
وقبل مايوصل تكوني شغلتي بخور او رشيتي معطر جو
ولما يوصل تسخني الاكل وهوا بيغير هدومه وتحطي الاكل وتاكلوا بالهنا والشفا
واتعودي انك متناميش ابدا بعد الغدا وعوديه هوا كمان عشان تقريبا اغلب المصريين فيهم العادة الوحشة دي 
ولا تشربوا شاي حتا
ممكن تتفرجوا على التلفزيون شوية او تقعدوا مع بعض وبعد ساعة ممكن تشربوا شاي بس الفاكهة تكون افضل
كدا الفترة دي خلصت
الفترة مابين العصر الى العشا:
طبعا لو جوزك بيروح الشغل تاني بعد العصر او بيروح اي مشاوير هيبقا قدامك اكبر وقت تدلعي نفسك وتعملي حاجات كتييييييييير زي ايه بقا
هنختار يومين فالاسبوع يعني مثلا سبت وثلاثاء هنعمل فيهم حمام زيت للشعر وطبعا كلنا عارفين الطريقة وفيه وصفات كتير قريتها هنا فالمدونة في قسم العناية بالشعر وانا عموما بعمل حمام زيت عبارة عن (مقادير متساوية من زيت اللوز وجوز الهند والزيتون والصبار والخروع)وبيطري الشعر بطريقةرائعة ولو شعرك بيقع هتحطي على فروة شعرك بس(زيت الثوم وزيت الجرجير)واي حمام زيت بيتحط على الشعر اقل حاجة 3 ساعات يعني اول ماجوزك يطلع من البيت تعمليه على طول
هتعملي ايه فال 3 ساعات دول بقا؟؟هتغسلي مواعينك الاول ياشطورة وتنظفي البيت وتغسلي الهدوم وتنشري
بعد 3 ساعات هناخد بقا الشاور بتاعنا الثالث الي هيكون فيه الشغل كله بقا وانا بستغرب من البنات الي بيقولوا بناخد شاور كل يوم ياجماعة انا بتكلم ف 3 مرات شاور دا الطبيعي ودا الصح والي كلنا هنعمله ان شاء الله متخافيش والله مش هتبوشي وطبعا بالنسبة للعرايس الجداد ممكن يضطروا ياخدوا شاور فاي وقت
ايه بقا الشغل الي فالشاور دا؟؟؟؟
هنشغل المية السخنة ونعمل الحمام المغربي الي كلنا عارفينه بس بطريقة مختلفة شوية
هتجيبي معلقة صابون مغربي اصلي وتحطي عليها معلقة عسل عليهم كباية وربع مية لوز(يعني تجيبي شوية لوز وتسلقيهم وتاخدي المية بتاعتهم) ومعلقة زيت ورد او اي زيت عطري بتحبيه وتقلبيهم وتحطيهم فعلبة شاور جل فاضية ويبقا دا شاور جل بتاع الوقت دا
هتسيبيه على جسمك نص ساعة وتبداي تعملي ماسك سنفرة لوشك او طمي مغربي
بعد كدا هتفركي جسمك بالليفة المفربية باتجاه من تحت لفوق وتشطفي جسمك ووشك وتغسلي شعرك بالشامبو
هتحطي حمام كريم على شعرك وتحطي على جسمك اي ماسك ودي احسن فترة الجسم هيستقبل فيها اي ماسك عشان المسام مفتوحة وطبعا نظيفة وفالوقت دا اعملي بدي كير لظوافر ايدك ورجلك
هتشطفي جسمك وشعرك بالمية (هتعملي السويت بشكل دوري كل اسبوع بقا فالوقت الجميل دا بشرتك لسه دافيه وهتتقشر بسهوله جدا ومفيش الم زي مابتعمليها فاي وقت وبعد السويت هتعدي عليه بالبراون عشان الشعر الصغنن وبقيت الاسبوع هتحطي كريم السعد او منقوع الترمس على بشرتك عشان تعجزي نمو الشعر)
ترطبي جسمك بالكريم او اللوشن وتعطريه زي ماقولنا
كدا انتي بقيتي مزة بقا ومفيش زيك
الفترة المسائية:
هتجيبي المجموعة بتاعتك الجميلة الخاصة بالفترة دي الي هيا عبارة عن (البدي لوشن والبودر بتاع الجسم والبرفان من نفس النوع)
وتدخلي الحمام تطهري المناطق الحساسة بالمسك وتحطي اللوشن والبودر على كل جسمك
وتخرجي من الحمام تحطي مكياج خفيف وتلبسي قميص النوم وتحطي البرفيوم الخاص بيكي على الهدوم بس
وتعطري السرير بتاعك
طبعا جوزك هيجي يلاقي الدنيا جميلة كدا وكل حاجة متضبطة وميمسكش عليكي غلطة عشان يفكر انك حلوة كدا على طول من غير ماتعملي حاجة ميعرفش بقا انك طالع عينك طول اليوم عشان توصلي للنتيجة دي
بعد ماتقضوا اليوم الجميل دا وربنا يجعل ايامكم كلها جميلة جوزك حبيبك ينام وانتي تقومي تمسحي الميك اب اوعي تنامي بيه..وتحطي كريم ليل وكريم العين وكريم للرجلين وتنامي ….
انا عارفة ان الكلام كتير بس والله مافيش اسهل منه لو فعلا عودتي نفسك على كدا دايما كل يوم وهيبقا دا روتينك الطبيعي واكيد هتحسي دايما بالثقة فنفسك وانك راضية عن نفسك وجوزك كمان راضي عنك
يارب تكونوا استفدتوا من كلامي ولو الموضوع عجبك فعلا قيموا الوضوع وادعولي يابنات ان ربنا يفتحها فطريق خطيبي ويرزقه من حيث لايحتسب
Amira Orang Amira Orang فتكات نشيطة Fatakat 843552 المنصورة – مصر