حبايبي كل الماميز الجداد وال ان شاء الله يحصلونا قبل اي كلام تعالو نردد
سبحان الله وبحمده سبحان الله العظيم – اللهم انك عفو كريم تحب العفو فاعف عنا – اللهم صل وسلم علي سيدنا محمد
استغفر الله العظيم عدد ماكان وعدد مايكون وعدد الحركات والسكون استغفر الله العظيم واتوب اليه
المشكلة ال بطرحها انهردة انا عانيت منها مع طفلي الاول وشايفة انها مؤلمة نفسيا جدا علي الام
مشكلة بتحصل لمعظمنا في صورة من 3 صور
-تشقق حلمات
-حلمات غائرة
-حلمات سايحة
بالنسبة لي قعدت اول 3 شهور من يوم ولادة ابني مش بيرضع مني
كنت اشفط اللبن بالشفاط واحطه ف ببرونة واديه لابني
لا تتخيلو المعاناة والتعب وطبعا اللبن بيسقع ويعمله مغص وكل شوية غسيل وتعقيم شفاطات وببرونات والم وقت شفط اللبن واللبن قليل عشان مفيش سحب مستمر الحمدلله كانت ايام صعبة – كل ده كوم وتعبي النفسي كوم تاني وانا شايفة ابني ياحبيبي نفسه يرضع ومش عارف ولا انا قادرة اعمل حاجة وعياط ليل مع نهار ونفسك مسدودة عن كل حاجة
سبحان الله العظيم الرضاعة الطبيعية دي نعمة كبيرة الواحد يحمد ربنا عليها لأخر لحظة فحياته
كفاية ان ابنك بياخد رزقه ال ربنا ارسله فثديك علي معدته مباشرة من غير ما حد يشوف
كتير امي وجوزي قالولي نديلة لبن خارجي لانك كدة مش مكفياه وانا صعبان عليا ومش هاين عليا يكون رزقه موجود وافيد واصح ليه واديله صناعي
طبعا كلنا عارفين اهمية لبن السرسوب وان الطفل الكبد بتاعه مش بيكون اكتمل وانه بيحصل علي انزيمات الكبد اللازمة له من خلال لبن الام وخصوصا لو عنده الصفرا بيكون علاجه الوحيد فالرضاعة
عارفين انا كنت بعمل ايه
كنت بجيب غطيان صغيرة واحطها علي الحلمة طول الليل صحيح كانت بتجرخني وتعورني بس كانت بتزود بروز الحلمة
كنت بعمل تدليك بكريم بانثينول حوالين الحلمة عشان التشققات واشدها للخارج كذا مرة
والله اوقات كنت بربط الحلمة بخيط لأن مع امتلاء الثدي بلبن الطفل بحس انها بتفرش او بتسيح وكنت بتعذب معاها فكل لحطة
ومنستش الدعاء ان ربنا ميحرمش ابني من الرزق ده وميحرمنيش من اجر ارضاعه
والبكاء فالسجود وطلب الدعاء من كل انسان احس انه يحب لي الخير
ويقدر ربنا بعد 3 شهور من المعاناة والانهيار النفسي وبعد المحاولات الشتي والالم ال حسيت بيه وفوق كل ده اصراري وعدم استسلامي للجوء للبن الصناعي
ابني رضع طبيعي جدا لحد ما اتفطم سنة و8 شهور (اللهم لك الحمد والشكر يارب)
انا بنصح اي ام متستلمش وتحاول واكيد كله فميزانها ان شاء الله
عليكي بتمرينات تدليك الحلمات من الشهر السابع هتزود المرونة وتعالج وتمنع اي تشققات عافاكم الله
ومتطنشيش وتستصعبيها مهما كان هتكون ارحم من ربط الخيط والم الشفاط
خصوصا طفلك الاول بعد مايرضع الحلمات حجمها بيكبر وده عن تجربة وهتساعدك ان شاء الله مع اخواته بعد كدة
اتمني الموضوع يثبت ولو شايفينه مهم متنسوش التقييم أد ايه اي واحدة مرت بتجربتي دي بتكون محتاجة امل ان تعبها مش هيضيع عشان تقدر تكمل علي نفس الاسلوب اول شهور الرضاعة
دي بجد الحاجة ال كانت نقصاني مكنش حد بيشجعني كله يقولي ارحمي نفسك طالما مخدوش من الاول مش هياخده خالص
بس الحمد لله الف حمد وشكر مليون ومليار ومالا نهاية
يمكن تقيمكم يساعدني اوصل تجربتي لاي واحدة محتاجة دعم نفسي عشان مش تيأس
اسألكم الدعاء اقوم بالسلامة ومجربش المعاناة دي مع المولود الجديد وربنا يجعل ولادته وسهلة ورضاعته سهلة وتربيته سهلة ويرزق كل مشتاق اللهم امين
جمالي ديني وأنوثتي جمالي ديني وأنوثتي 819555_2.gif فتكات متميزة Fatakat 819555 القاهرة – مصر
انا بقالي 20 يوم و المشكلة انى البنت خست منى وروحت لدكتور كتب لها لبن صناعى وللأسف خدتو هل ممكن اجرب معاها تانى انا بحاول معاها كل يوم بس بردو مش راضيه تمسكه وعماله اشفط عشان مقطعش رزقها ينفع اجرب تانى
بنتي عندها شهرين ورافضة تاخد صدري نهائي وتعبت معاها اوي وبرضو رافضة خالص واتعودت علي الببرونة وبتاخد لبن صناعي وامنية حياتي اني ارضعها طبيعي بس للاسف مفيش لبن في صدري خالص واول مانزل بعد الولادة كان بينزل نقط بسيطة خالص يعني حوالي 5 سم في كل مرة بعصره فيها لأن حالتي النفسية كانت سيئة جدا لأن اخويا اتوفي قبل مااولد بأسبوعين انا اسفة اني طولت عليكي بس يارب تقدري تساعديني لاني نفسي ارضعها طبيعي ونفسي في حاجة ترجع لبني تاني وربنا يباركلك ياااارب ويحققلك كل ماتتمنيه