في الحلقة الاخيرة من الجزء الاول
^
^
^
المعلمة : الأخت بتقول إنها مخطوبة وخطيبها دايما بيقول لها كلام حب يعني وحشتيني والحاجات دي
فاهمين انتو طبعا
البنات ضحكوا كلهم
المعلمة : بس خلاص ما صدقتو 
– المهم بقى هو كمان بيطلب ……
===
عاطف:
تشرفونا و تنورونا يا أنس طبعا
بس ياترى في سبب معين للزياره
أنس:
في سبب طبعا يا عمو
يعني انا يشرفني ويسعدني جدا اني اطلب من حضرتك اجي اتقدم للانسه مروه
===
هناء :
انتي بتتكلمي ازاي يعني ايه تغيري هدومك وتشيلي الميكب طبعا مينفعش
مروه :
يا ماما انا قعدت مع طنط و اسماء بلبس عادي وبشعري وميكب
لكن …..
===
مجدي : اه شوفت بقى
بعرف اتعامل مع العيال ف المدرسه وابني بيضيع مني
انا تعبان يارمضان اوي – مش عارف الغلط فين
محتاج اتلكم مع حد
لقراءة الحلقة كاملة و الحلقات السابقة هنا …
فهــــــــــــــــرس حلقـــــــــــــــــات الجزء الاول
الجزء (2)
الحلقة الأولى
*****
المشهد الأول
أنس وباباه قاعدين مع بعض بالليل فى المكتب بتاع باباه بعد ما رجعو من عند الأستاذ عاطف
الحاج عبد الله (والد أنس): بس أنا مستبشر خير إن شاء الله يا أنس
باين عليهم ناس طيبين أوى والأستاذ عاطف راجل نحسبه صالحا ولا نزكيه على الله
أنس:أيوه والله يا بابا وأنا حبيته من أول ما شفته تحسه كده راجل طيب
الحاج عبد الله:طيب ده الأستاذ عاطف،مفيش كلمتين عن بنت الأستاذ عاطف؟
أنس: ممممم – ايه يا حج عبد الله ليه الاحراج ده ؟
عبد الله: ههههههه احراج ليه بس انت عقلك راح لبعيد شكلك كده
أنا قصدى ايه رأيك فيها لما اتكلمت معاها ؟ فيه قبول يعني ارتحتلها كده يعنى
أنس: و الله يا بابا انا ارتحتلها جدا حسيت إن عندها حياء كده مش زى البنات اللي بنسمع عنهم – و صوتها يا دوبك كنت بسمعه بالعافية و مع انها اتكلمت وسألت بس تحسها خجوله جدا مش بجحه – وعقليتها محترمه جدا تحس تفكيرها اكبر من سنها انسانه عاقله بجد – المشكله انا حاسس انها ما شافتنيش أصلا لاني كل مااكلمها وشها يحمر وتبص ف الارض وهي بترد
الحاج عبد الله:ما شاء الله كل ده لاحظته في القعده – هههههه – ربنا يجعلها من نصيبك ويجعلها زوجة صالحة – واطمن انا لاحظت انك لما بتدير وشك تكلم حد تاني كانت بتبصلك و برده وشها كان احمر
أنس:اللهم آمين
بس يا بابا مش شايف إن مهلة الأسبوع اللى طلبها الأستاذ عاطف عشان يرد علينا طويلة شوية؟
اظن كان كفاية 3 أيام
الحاج عبد الله: ايه يا ابنى هو سلق بيض،ده زواج والراجل من حقه يسأل عنك لحد ما يطمن إنك الراجل اللى يستاهل بنته وهيصون الأمانة و انت برده تستخير وهي تستخير
اتقل يا أنوس اتقل و كله خير باذن الله
الحاج عبد الله: لا ده انت باين عليك مستعجل أوى وقلقان كمان
ما تخافش،إن شاء الله ربنا يقدر لك الخير حيث كان
أنس : يارب
الحاج عبد الله:بس تعرف،لما حكتلى موضوع الأستاذ عاطف والظلم اللى اتعرض له بسب رفضه إنه يسكت ع الفساد اللى كان بيشوفه حبيته واتمنيت فلا إنه يشتغل معانا
لكن بعد ما شفته اتمسكت بيه أكتر واحترمته جدا،فعلا سيماهم على وجوههم
أنس:إن شاء الله بس ناخد الرد منه وسواء كان بالموافقة أو الرفض هفاتحه فى موضوع الشغل ولازم أقنعه لان الراجل ده كنز
الحاج عبد الله:إن شاء الله خير،واحد زى الراجل ده هيكون مكسب كبير جدا لينا فى الشركة – احنا فعلا محتاجين واحد باخلاقه
أنس:الله المستعان
أستأذن أنا بقى يا بابا عشان ألحق أناملى ساعة قبل القيام
الحاج عبد الله:اتفضل يا ابنى،وأنا قايم أنا كمان
المشهد الثانى
الأستاذ رمضان قابل الأستاذ مجدى فى المسجد وصلوا الظهر وقعدوا يتكلموا
رمضان:تقبل الله يا مجدى
مجدى:منا ومنكم إن شاء الله
رمضان: شكلك فعلا تعبان يا مجدي انا اول مره اشوفك كده
ايه الحكاية ؟؟؟
الاستاذ مجدي مقدرش يمسك نفسه ودموعه نزلت
مجدى: تعبان والله يا رمضان يا خويا حاسس إنى فشلت فى تربية ابنى
حاسس إن كل اللى بعمله وعملته راح ع الفاضى
رمضان: ايه يا مجدي للدرجادي – قلقتني
فهمني بس فيه ايه يمكن انت مكبر الموضوع
ده انت كل الإدارة مش المدرسة بس بيحكوا عن خبرتك فى التعامل مع الطلاب المشاغبين و عن قدرتك الكبيره في السيطره عليهم
ازاى بقى تقولى معرفتش تربى ابنك؟
مجدى: اهو ده اللي حصل يا رمضان – شفت بقى المصيبه ، ربيت ولاد الناس و معرفتش أربي ابني – للأسف شكلي اتشتغلت عنه و كنت فاكر ان ابني لازم يطلع محترم و عمري ما شكيت انه يكون منحرف – و ثقتي الزياده خلتني اسيبه منغير رقابه لاني اصلا مكنش عندي وقت اتابعه و النتيجة انه بقى فاشل ومستهتر
انا ضيعته يا رمضان – اتشغلت بلم الفلوس علشان مستقبله و اهملت تربيته
و امه طبعا مش حتقدر عليه لوحدها في سنه ده
الولد بيجي عليه وقت وبيحتاج لابوه يصاحبه وابني ملاقنيش جنبه
انا اللي ضيعته يا رمضان انا اللي ضيعته
رمضان : يا مجدى متجبش اللوم على نفس بالشكل ده – اهدى شويه متعملش ف نفسك كده – و انت شغال صبح وليل ليه ؟؟؟ – مش عشان توفر لولادك حياة كريمة محترمه – و بعدين انت لو الموضوع بالنسبالك طمع كنت اديت الدرس ب 200و 300 زي غيرك – لكن انت اللي بتاخده في الدروس محدش يصدقه انت ناقص تديها ببلاش – و عمرك ما طردت طالب علشان مدفعش – يا مجدي ده كل المدرسين حيتجننوا منك عشان الاولاد بتوع فصلك لما بيجوا يطلبو منك تديهم درس بترفض و تقولهم اللي مش فاهم حاجه يسألني في الحصه انا في الدرس مش حقول أزيد من اللي بقوله في المدرسه
يا مجدى واحد زيك يُقتدى بيه لا يمكن يكون مربى فاشل أبدا- وكمان لايمكن يكون اب فاشل
مجدى: يا رمضان بقولك الواد ضايع ضااااااايع
رمضان:طيب ما تقولى يا مجدى ايه اللى حصل يمكن أقدر أساعدك
مجدى : البيه جايب ملحق وبدل ما يتكسف و يعد يزاكر سهران طول الليل برا البيت وطول النهار نايم
والأدهى بقى أمه مسكته من كام يوم بيكلم بنت على التليفون وبدل ما يعتذر ويعترف بغلطه قعد يبجح في امه
رمضان:اممممممم _ بص يا مجدي هو دلوقتى فى سن حرج و للاسف كتير في سنه بقوا كده واكيد هو بيقلد – طبيعي يعني
مجدى: لأ مش طبيعى يا رمضان،إنه يخون ثقتنا فيه لما جبناله تليفون مش طبيعى
إنه يحسسنا إن كل اللى بنعمله أنا وأمه عشانه وعشان اخواته ملوش لازمة مش طبيعى
إنه يصلى فرض و 10 لا – وكل شويه زعيق وضرب علشان الصلاه مش طبيعى
إنه يعمل قدامنا صايم وأخته تشوفه بياكل فى الشارع وقدام الناس مش طبيعى
الواد كده كله على بعضه غلط – مش عارف ماله
رمضان: والله يا مجدى ما أنا عارف أقولك ايه_ ربنا يهديهولك ويصلح حاله
دى فترة وهتعدى صدقنى وبكره يبقى زى الفل
أب ومربى زيك يا مجدى إن شاء الله ربنا هيكافئه فى ولاده حتى لو تعبوه شوية فى الأول وبكره تقول رمضان قال – انت بس حاول تصاحبه انت نفسك قلت محتاج اب يصاحبه
اتكلم معاه كصديق و شوف ماله و حاول تمسك اعصابك وبلاش الضرب علطول كده
مش انا اللي حقولك يعني يا مجدي ولا باب النجار مخلع
مجدى: اه والله يا رمضان مخلع أوي كمان – الله المستعان
رمضان: لالالاخليك متفائل وادعيله – إن شاء الله هيبقى بخير،هو جايب ملحق فى ايه؟
مجدى:فى الفيزيا
رمضان:طيب خلاص،أوعدك يا سيدى إنى معاه لحد ما يمتحن الملحق ده وينجح فيه بتفوق كمان
مجدى:يا رمضان أنا مش عايز أتعبك معايا،الواد أيمن ابنى ده التعامل معاه صعب أوى
رمضان:لا تعب ولا حاجة يا مجدى احنا اخوات
و التعامل صعب على نفسه – انت عارفني – وفرصه كمان احاول اظبطهولك وانت من ناحية وانا من ناحيه و ادينا بناخد بالاسباب – بس ادينى انت الموافقة
مجدى: مش محتاج موافقه يا رمضان ده زى ابنك_وآسف من دلوقتى ع التعب اللى هتتعبه معاه
رمضان:ما تقولش كده،إن شاء الل هيبقى زى الفل
روء بس كده و توكل على الله ربنا قادر يصلح حال ابنك ف لحظه – صح ولا ايه ؟
مجدى:ونعم بالله
متشكر يا رمضان والله على القعده دي – انا كنت حاسس اني حنفجر والله – بس ارتحت أوى لما اتكلمت معاك
رمضان:لا شكر على واجب يا سيدى_ و لسه بقى حظبطك كمان علشان تفك خالص وتنسى همومك عازمك حتت عزومه انما ايييييه – قعدة حلوه ع البحر اللى هى ببلاش دى
مجدى: مفيش أحلى من عزومات رمضان ف النهار،ما بتغرمش فلوس
رمضان:يا ريت السنة كلها تبقى رمضان يا أخى وأنا أعزمك كل يوم
مجدى: ماشي يا ابو الكرم – يلا بينا …
هلال قاعد في الصالة بيشتغل على اللاب ومامته جالها تليفون
كريمة: عليكم السلام ورحمة الله
أهلاااا، ازيك يا ماجدة فييينك – عاش من سمع صوتك
ماجدة: ما انتِ اللي بطلتي تيجي النادي يا كريمه ومحدش بيشوفك خالص
كريمة: معلش انتي عارفه رمضان الوقت فيه قصير وبيعدي بسرعة – انتِ بقى متتصليش كده ولا تسألي يعني اذا مكنش النادي منعرفش بعض
ماجدة: ههههه – لا طبعا – آديني اتصلت آهو يا ستي
وحقولك حتت خبر قالب النادي كله
كريمة: خيييييير – خبر ايه ؟؟؟
ماجدة: سوزان جوزها اتجوز عليها
ماجدة:لا والله بتكلم جد
كريمة: يا نهااااار مش معقول، مش قادرة أصدق- سوزااان
ماجدة: اومال هتقولي ايه بقى لما تعرفي إنه متجوز عليها من سنة وهي نايمة على ودانها
كريمة: سنه !!!! – يا عيني عليكي يا سوزان
معقولة دي؟ بقى جوزها متجوز عليها بقاله سنة ومتعرفش!
طب ازاي ؟؟؟
ماجدة:آه والله، أنا استغربت زيك كده بس ده اللي حصل
وفي النادي الستات كلها ملهمش سيرة غير الموضوع ده
كريمة: أما راجل واطي صحيح
بقى بعد ما استحملت قرفه وبهدلته السنين دي كلها يروح يتجوز عليها !
ماجدة:على رأيك – همه الرجالة كده ملهمش أمان
حاسبي بقى على جوزك انتي كمان و راقبيه كويس
خلي عينك في وسط راسك
كريمة: لالالا – رمضان جوزي حاجه تانيه خالص يا ماجده
ماجدة: انتي حرة – أنا نصحتك وعملت اللي عليه
كريمة:بس بصراحه..سوزان تستاهل اللي جرالها
هي ديما مغروره و واخده ألم في نفسها – خلي مناخيرها اللي في السما دي تنزل شوية، فاكرة كانت طول مهي قاعده تتكلم ازاي عن نفسها وعن جوزها و تعد تتنطط علينا
خليها تشرب بقى
ماجدة:عندك حق والله – اهي اخدت جزاءها
طيب أستأذنك أنا بقى يا كريمة حقوم اشوف ورايا ايه
كريمة: مع السلامه يا حبيبتي
شكرا لاتصالك
وتقفل كريمة معاها وتروح المطبخ عشان تكمل تجهيز الفطار و هلال يدخل جري وراها
يا ترى هلال راح ورا مامته لييييييه؟
ده اللي هنعرفه الحلقة الجاية بإذن الله
انتظرونا يوم الثلاثاء مع الحلقة الثانية باذن الله
====
كتبت الحلقة: مشتاقة لقيام الليل
المراجعة والتعديل : دوني المسلمة
—-
دونى المسلمة دونى المسلمة 253431_2.gif اللهم استعملناولاتستبدلنا Fatakat 253431 الشارقة – اسكندريه – الامارات