طبعا زى ما انتوا عارفين دا موسم اللفت فجبت شوية وخللتهم
فعجبنى ورقه اوووى ففكرت انى احشيه ايوه هاحشى ورق اللفت متستغربوش
زى ما بنحشى ورق الخس وورق السلق عادى جدا وعلى فكرة طعمه ميفرقش عنهم المهم
نخش فى الموضوع
ورق لفت
بصل كتيييير مفروم
فلفل رومى او حامى
طماطم معصورة او صلصة
ثوم مفروم
رز مصرى او بسمتى
بقدونس كتير وكسبرة وشبت
نعناع ناشف
قرنفل مطحون
ملح وفلفل
وسماق وبابريكا ( زعتر وروزمارى قليل)
او خلطة محشى جاهزة اللى يريحك
فحمة ومعلقة سمنة وقشرة بصلة
طبعا الورق هنغسله ونسقطه دقيقة فى مية مغلية ونشيله بسرعه
دا لو كان صابح وناشف اما لو كان دبلان ممكن تسويه شوية على البخار
الخلطة بأه باحط الزيت او السمن على النار وانزل عليها بالبصل لحد ما يدبل
وبعدين عصيرالطماطم او الصلصة
و بعدين الملح والفلفل والبابريكا و سماق وزعتر وروزمارى قليل
لان طعمهم قوى وبيبان فى الاكل و التوم النى والنعناع وقلبى كويس
وبعدين حطى الرز واديه تقليبة على الماشى كده
والخضرة الاخر علشان متدبلش منك
كده خلصنا بس فاضل تكة حلوة اوى هتخلى لك المحشى مميز
هتولعى الفحمة على النار وتجيبى طبق استانلس صغير فيه قشرة بصلةوتحطيه فى وسط الخلطة
و عليه الفحمة وبايدك غطا الحلة والايد التانية معلقة السمنة او الزيت و طفيها بالسمنة
واقفلى عليها بسرعة وسيبيها شوية لحد ما الرز يشرب الدخان كله وبعدين قلبيه كويس
و دوقى محشى بطعم الكباب انا باعمل كده مع البطاطس المقلية والفراخ واللحمة والكفتة
والحواوشى والشاورمة والسمك المشوى اى حاجة عاوزاها بريحة الكباب
واكيد هتلاقى الورقة كبيرة اقسميها نصين
واحشيها زى الكرنب ورصيها فى الحلة
وعلى النار على طول وتسقى المحشى بشوربة انا باحط معاه شوية صلصة من بتاعة المحشى
ولما يستوى باعصر عليه ليمون زى ورق العنب وبالف هنا وشفا
والله جميييييييييل جداااااااااااااااا ولا هتقدرى تفرقيه عن اى محشى تانى
وطبعا انا ما عملتوش لوحده كنت عاملة معاه كوكتيل محشى كوسة وبتنجان وفلفل وورق عنب وكرنب كمان
ولو عاوزة تضيفى للخلطة لحمة مفرومة مفيش مانع بس انا عملته من غيرها
ملحوظة الكلام اللى بالاحمر ده مهم وتكات هتفرق معاكى بس مش اساسية ممكن تستغنى عنها مفيش مشكلة
اى استفسار يا بنات عن اى موضوع انا تحت امركم واللى مستعجلة على الاجابة تبعت لى على الخاص
لان المشاركات بتبقى كتيرة واوقات مباخدش بالى من الاسئلة
مواضيع هذا القسم برعاية
ام عمرو خالد 2024 ام عمرو خالد 2024 81724_31.gif شيف فتكات Fatakat 81724 مدينة نصر – مصرام الدنيا