فتوكاتى العزيزات
بعد السلام عليكم اليكن احلى تحيات
النهاردة اولادى اجازة علشان الامتحانات الاسبوع القادم الله طيب واحنا مالنا يا فتوكة انتِ
اصبروا بس اصل احنا ما بنتجمعش على فطار اثناء الدراسة غير يوم الجمعة والسبت فقط لاغير
فالنهاردة بقا غير عادى
روحت طلعت كيس طعمية من الفريزر اه ماانا كل فترة باجهزها واشيلها فى اكياس فى الفريزر وقولت يا بنت يا فتوكة
اديها طعمية وبيض بقا وهيصة
وبعدين قولت ما تفتكسي بقا هو البيض ياا مقلي يا مسلوق والطعمية كل مرة هى هى
روحت جايبة ايه من التلاجة المقادير اللى قدامكم دى وهى عبارة عن :_
المقادير :_
4 بيضات
شوية بقدونس
فلفل رومى اخضر ولو فى احمر واصفر يبقا قشطة عليكم
جبنة تركى
طماطم
وطبعا عجينة الطعمية
وربع معلقة فلفل و ربع معلقة قرفة وربع معلقة جنزبيل وربع معلقة ملح وربع معلقة بيكينج بودر
وبس
وادى المقادير كلها فى الصورة دى
هتروحى مقطعة الطماطم والفلفل والبقدونس وهتضيفى عليهم الملح والبهارات كلها وتقلبيهم حطى الجبنة بقا والبيض
وقلبيهم كويس وادى شكلهم بعد ما قلبتهم
وقسميهم فى القلاية على قد ما يبقا قرص فيها وارفعيها على النار دقيقتين بالظبط واقلبيها
ودقيقتين كمان يبقا كدة بالف هنا وشفا شايفين الجمال ولا الطعم ما اقلكمش عليه
وبالفين هنا وشفا يا قمرات وعلى فكرة عجبت ولادى جداااااااا
ادعولى بالله عليكم ان ربنا يفك كربي
يلا اشوفكم على خير فى افتكاسة جديدة
واللى تجربها وتعجبها ترجع الموضوع علشان تقييم انا قولت اهو وقد ااعذر من انذر
فى رعاية الله
مواضيع هذا القسم برعاية
cry of pain cry of pain 659746_4.gif ممنوعة من المشاركة Fatakat 659746 Alex – Egypt