السلام عليكم ورحمه الله وبركاته
ازيكم يا فتوكاتى
امبارح عملت فته بالكوارع وكانت طعمه شكلا وطعما لان جوزى اهم حاجه عنده فى الاكل بتاع المسمط ده الشكل وطبعا النظافه عليها عامل مهم اووى ان الاكل ده يطلع حلو
الاول هنجيب الكوارع متنظفه كويس اووى من الراجل بس اعذرونى نسيت اصورها قبل ما تستوى
ولازم تتغسل كويس اووى بالخل والملح والدقيق كذا مره لما تتاكدى انها ملهاش اى ريحه نهائى
وتنقيعيها شويه بمايه وخل او ليمون
نيجى للمرحله السلق
هنحتاج
مايه طبعا هههههههه اوعى تسلقيها من غير مايه يا فالحه
بصل جزره
ملح وفلفل وحبهان وورق لورا
والى هيخلى الريحه جنان وتقلب الشقه كام عود كرفس
الاول هنحط الكوارع فى الحله لوحدها ونشوحها من غير حاجه هتلاقى شويه مايه صغيريين نزلوا منها ترميها وتشطفيها تانى كويس
وبعدين تحطى فى الحله المايه بكل المكونات ما عدا الملح
واول ما تغلى تنزلى بالكوارع وتوطى عليها وعيشى بقى مع نفسك ساعتين او ساعتين ونص وطبعا حسب حجم الكوارع
ولو عندك حله برستو طبعا هتسهل اووى ومش هتاخد اى وقت
وفى الاخر لما تقرب انها تستوى تحطى الملح
وده شكلها لما استوت
ومعلومه على الماشى يا ريت اما تعملى كوارع متعملهاش فى حله المونيا لانها بتطوس اوتسود الالمونيا اووى وهتتعبك بعد كده فى الغسيل
اعمليها فى اى حاجه تانيه
نيجى للفته
اولا الارز
هتجيبى ارز حسب الكميه بتاعتك وتشوحييه فى معلقتيين سمنه او زيت لما تسمعى صوته فى الحله وتحطى عليه ملحه والشوربه بتاعه الكوارع ويستوى عادى زى اى ارز
العيش
هتقطعييه مكعبات وترشى عليه معلقه سمن وفلفل اسود وحبهان وتدلييه يتحمر فى الفرن ويتحمص
وده شكله بس انا رحت ارد على التليفون فتحمص منى شويه زياده بس متحرقش الحمد لله
الصلصه
هنحمر شويه توم حلوين فى الزين وننزل عليهم بالخل وبعدين الطماطم
ونحط ملح وفلفل وكمون وتبقى جاهزة
الطشه
هنحتاج زيت نحمر فيه شويه توم ونطفيهم بالخل وشويه شوربه
من بتاعه الكوارع وده هحتاجها للكوارع وللفته بس معلش نسيت اصورها
وكده نبتدى نطبق الفته عادى
نسقى الارز بالشوربه السخنه لما يطرى شويه
ونشكله انا حطيته فى القالب وقلبته علشان شكل الفته يبقى كويس
وحطيت الصلصه ونص كميه الطشه على الوش
وحطيت على الكوارع شويه صلصه ودخلتها تحت الشوايه تتحمر
واما طلعت رشيت عليها باقى الطشه الى قلتلكم عليها
وبجد شكلها حلو اووى وطعمها يجنن والله
والباقى سبيهم مسلوقين فى الشوربه مع الليمون
وطبعا معاها لازم مخلل قدمت ليمون مخلل
صوره اقرب لكوارع عجبت جوزى اووى وكلها كلها ما شاء الله
وقالى اديها عشره على عشره
وانا بقى استغليت الفرصه وقلتله عمرك قلت كوارع بالطعامه والشكل العسل ده ههههههههههه قالى لا
والفته من قريب
وده صوره لاكل كله
يا رب تكون عجبتكم يا فتوكات وصدقونى طعمها كان روعه ومتقرفش ولا حاجه
ريحتها ممتازة
شكلها زى ما شفتم اظن حلو اووى
جربوها وعلى ضمانتى
ومتنسوش التقييم والردود احبكم فى الله
سلام
مواضيع هذا القسم برعاية
شروق الشمس 2024 شروق الشمس 2024 282785_28.gif ربنا يشفيكى يا أمى Fatakat 282785 مع جوزى – فى بيتى