يارب لك الحمد كماينبغى لجلال وجهك ولعظيم سلطانك
اللهم تقبله خالصا لوجهك الكريم
حبيبتى كل حامل الله يكملك حملك على خير وتقومى بالف سلامة
موضوعى حبيباتى بيتناول جانبين للحامل
اول جانب اللى حملها كمل على خير والحمدلله
تانى جانب اللى ربنا قدرلها الاجهاض او عدم اكتمال حملها الله يعوضها ويرزق كل مشتاقه بتوام
ودى تانى مرة اكتب الموضوع ربنا يتقبل مننا ويغفرلنا جميعا يارب
حبيبتى مفكرة ربك مش حاسس بالمك وبوجعك وبخوفك على حملك ازاى وهو اللى خلقك
بلاقى هنا موضوعات عن تعبك او عن خوفك لجنينك يجراله حاجة سواء وقعتى او اكلتى اكل وخايفة منه
حبيبتى اوعى تخافى وربك الى شايف جنينك وحافظة فى ظلمات وفى رحم احن علية منك
تعرفى انة العلماء قالو انة فايدة المشيمه انها اولا تفصل دم الام عن دم الجنين ولو اختلطوا لاقدر الله الطفل يموت
شوفتى رحمة ربك مانتى فصيلة دمك مختلفة عنه فربك لازم يفصل وكمان الوحم
بيكون حاجة الجنين محتاجها مثلا لو جسمه محتاج كالسيوم
ربك بيخليكى تتوحمى على السمك وتاكلية عشان يروح له سبحانه
الحاجة كمان الغريبة انة الجنين بيتغذى سواء انتى اكلتى او سواء اخدتى حبوب فيتامين او لا
ربك مهيالة مادة بتفتت العضم بتاع امة وبتبعت له الكالسيوم حتى من الاسنان عشان كدة الام اول حاجة بتوجعها هى سنانها وعظمها شوفتى رحمة ربك بالطفل بتاعك اكتر منك ازاى يبقى تسلمى امرك له
واول ماتعرفى بحملك تسجدى شكر وتطلعى صدقة ولو حاجة بسيطة
وتدعى لكل مشتاقه بتوام وفى كل صلاة تقولى ربى انى نذرت لك مافى بطنى محررا فتقبل منى انك انت السميع العليم
وتحاولى تقراى قران وجنينك يسمعه حتى لو كل يوم الفاتحة بصوت عالى وتحطى ايدك على بطنك
طبعا طول حملك بيكون تعب وربك قال وهنا على وهن
احتسبي عند ربك وكل حسنات فى ميزانك واعرفى انه تعبك دة كلله بيكى حسنات
وفيه حديث للرسول صل الله علية وسلم صلى عليه يافتوكة
قال ( وَالمَرْأَةُ تَمُوتُ بِجُمعٍ شَهِيدة ) شوفتى احسن من كدة شهادة ياحبي مش اى مكانه
ووقت الطلق دة ووجعك كله حسنات ليكى بتخرجى نضيفة زى البيبى اللى جنبك ودة كان فيه حديث بس قالو موضوع والاصح انة المؤمن كل شوكة يشاكها له بها حسنات ودة حديث اكيد فمابالك بوجع الولادة والطلق وحمل 9 شهور كلله ماشاء الله كم حسنات يخلى كل ست بريئة زى الطفل بتاعها
حبيبتى قبل ولادتك طبعا تدعى ربك ولو فية حاجة بسيطة فيها رحمة اعمليها
انا قبل ولادتى كنت ماشية وكانت الدنيا مطرت وفية ماية مطر اتجمعت فى حتة وجت قطة تشرب والله فضلت واقفة لحد ماشربت خفت امشى من جنبها تخاف منى ومتكملش شرب واهى حاجة بسييطة خاالص اهى
بس وانا بولد كنت بقول يارب ان كنت عالم انى رحمت ضعفها ابتغاء وجهك ارحم ضعفى
واخدت ده من موضوع عضوة كانت بتقول انها رحمت نمل ومرضيتش تموتهم فربنا يسرلها ولادتها
والله انا يعتبر ولدت بالبيت لانة دكتورى اتصلت وقت الطلق قالى دة من كشف النسا مش تيجى
فضلت ساكتة لحد ماالراس اتزنقت وكنت خلاص معيش الا 2 ستات وربنا يسرلى برحمتة لانة احن من امى الله يرحمها بموقف بسيط اوى اوعى تنسيه
ربك حنين اوى حنون عليكى وعلى طفلك دايما خليكى معاه هو اللى خلقك واللى خلق ادرى بمن خلقة
تانى جانب اللى حملت وفقدت جنينها
ودة مريت بيه 3 مرات مريت بوجع فقدان الجنين ومريت بفرحة مكملتش ومريت بناس لسانهم اصعب من الكرباج سواء معايرة او كلام دبش ومريت بوجع نفسي وبدنى وحاسة بيكى وانا زيك مابالك ولله المثل الاعلى باللى
خلقك وصورك واداكى مراكز الشعور دى فيكى؟!
مش حاسس بيكى مثلا استغفرالله ابدااوالله عالم وعارف وحاسس بيكى وبوجعك بس عارفه
مرة من مرات اجهاضى كنت بدعى ليل نهار ميزلش لانة مكنش فية نبض وفضلت محتفظة بية لحد اخر شهر رابع تقريبا
لحد مالى اخى دكتور نسا بس كان بالسعوديه وقتها قالى قدرى انة كمل وجة مشوهه تعملى ايه
دة من رحمة ربك لما نسبة التشوهات بتزيد بالجنين بيخلية ينزل عشان رحمة بالام وبيه
رحمة بيكى وبحزنك طول عمرك علية وبيه كجنين مسكين ملوش غير ربة
واتوكلت على الله وعملت اخر اشعة ثبت انة خلاص ميت ولازم انزلة وانى خلاص هدخل على تسمم حمل لو منزلتوش رحت للدكتور ونزلتة والله نزل صبر على قلبى وعملت تنضيف بدون بنج كمان لانة الكيس نزل وكان لسة باقى حاجات تانية دكتور قال مش محتاجة بنج استحملت ونزل واستحملت وجع بدنى والم صعب ووجع فقدان طفلى لتالت مرة
ووجع اية كمان؟ وجع معايرة ووجع عدم وقوف ناس كنت بموت فى تراب رجليهم جنبى بس كنت بدعى بحرقة
باخد كل الخناجر دى فى قلبى واقفل بابى واشكى لربى واعيط لحد مالاقيش دموع
وفجاة فتحت المصحف على اية تبشير سيدنا زكريا بسيدنا يحى عليهما السلام
حبيبتى هى مش سهله انا عارفه ومجربة بس صدقينى روحى لربنا قوليلة عاوزة الصبر نزل الصبر والرحمة على قلبى وعوضنى بجد يارب مليش غيرك محتاجة رحمتك واتكلمى وقولى وطلعى اللى فى قلبك
والله انا الحمدلله الله رزقنى بعدها ربنا يحمى ولادى وولاد المسلمين
طفلك راح للى احن علية منك بجد انتى شايفة انة خلاص فقدتة والموت صعب
وربك شايف انة الجنة وقعدتة يحفظ القران مع سيدنا ابراهيم عليه السلام احسن
وانة موتة مش صعب انتى شايفة انة اكيد عانى من الموت مين قالك انة اللى كان بيبعتله رزقة فى قلب ظلمات
واللى شايفة وبيطمن علية ومهيالة انة دمك ميختلطش بدمة هيعذبه؟!
اللى دخل امراة بغى الجنه لرحمتها بقطة هيعذب طفل لاحول له ولاقوة الا بربة
دة انا لما بضرب حد من ولادى والله بعدها ربنا بيسلط علية المشاكل وببقى عارفه انة بسبب انه ربنا بيقولى انا اقدر عليكى منك على ولادك حبيبتى دى رحمتة وااسعه اوى وحنون اوى مخلقكيش عشان يعذبك
حطى دى براسك خلقك عشان تدخلى الجنة وهو دخل طفلك الجنة لسة انتى بقا
ان شاء الله يقابلك طفلك دة يدخلك الجنه يوم القيامة
اصبرى وادعى وهتشوفى العجب
اسفة موضوعى طول ادعولى ربنا يجمعنى بيكم فى الجنه
احبكم فى الله
اميرة الاسلام فى قلبى اميرة الاسلام فى قلبى 757298_13.gif فتكات ست الكل Fatakat 757298 المنصورة – مصر