السلام عليم ورحمة الله وبركاته
ازيكم يا فتوكات
النهارده هقولكم على وصفه تخلى شعركم احمر بندقى وكمان شعرك مش هيبوظ ولا يقصف يعنى لون كلنا بنحبه و شعر كمان صحى وناعم
طبعا انا غلبت وتعبت وجربت كذا مرة حاجات كتير لكن هقولكم طبعا على الخلاصة بس بالله عليكم تدعولى ربنا يرزقنى بالذريه الصالحة
طبعا هنستخدم حنة ومش اي حنة حنة اصاله لون احمر حلوة جدا جدا ورخيصه ب 10 جنيه بس ومتحاوليش تجربي غيرها انا جربت كتير خالص دى احسن نوع ومتوفره عند العطارين
وتجيبى ب3 جنيه دم غزال هى حنه اصاله الحمرا فيها دم غزال بس احنا نحط عليهم شويه كمان لو عاوزة حمااااار جامد وظاهر وكده كده متخافوش عمره ماهيطلع احمر ناري
وكمان بجنيه كركديه
وتجيبى كمان علبتين زبادى لو شعرك طويل او علبه واحده لو شعرك قصير وطبعا معلقتين عسل ابيض علشان احنا كلنا عارفين الحنه بتقل الشعر وبتغذيه لكن بتقصفه عشان كده لازم الزبادى والعسل الابيض
نبدأ بقي باسم الله
الاول تجيبى كوبايتين ميه وتغلى فيها الكركديه بس سيبيه يغلى شويه ممكن ربع ساعه
وبعد مايغلى حطى عليه دم الغزال اللى تبع الحنه وكمان معلقتين كبار من دم الغزال اللى انتى جبتيه وتقلبيهم كويس
تجيبى بقي الطبق اللي هتعجنى فيه الحنه
وتحطى الحنه كلها لو شعرك طويل لو قصير ممكن تستخدمى نصها بس
وتحطى عليها كوبايتين الزبادى والعسل الابيض وتخلطيهم
وبعدين تحطى الكركديه اللى معاه دم الغزال وهو سخن طبعا متستنيش لما يبرد بس شويه شويه لحد ماتلاقى الحنه بقت زي العجينه ومش خفيفه ولا غليظه
طبعا تكونى غاسلة شعرك قبلها بيوم ومش حاطه فيه اى كريم او زيت وطبعا يكون شعرك نشف مش مبلول
وافردى بقي الحنه على كل شعرك والبسي البونيه اللى مع الحنه وسيبها على شعرك مش اقل من 6 ساعات ولو تقدرى نامى بيها واصحى اغسلي شعرك وهتدعيلى لما تشوفى النتيجه
بصي بقي عشان شعرك برضو ما يقصفش
تعملى تانى يوم على طول حمام زيت
معلقتين زيت زيتون + معلقتين زيت جوز هند +معلقتين زيت لوز + معلقتين زيت سمسم +معلقتين زيت نخاع+معلقتين عسل ابيض
وتلبسي بونيه اوكيس نايلون وتسيبه على شعرك 6 ساعات
وتغسلي شعرك بشامبو كويس واياكى تغسلى شعرك بصابون اي صابون وحش
وياريت بقي لو تعملى كمان حمام كريم فى حمام كريم حلو قوى اسمه هيربال سينسيشن بالتوم والنخاع ب 10 جنيه
رائع رائع رائع بيطرى الشعر جدا هتلاقيه فى محلات ادوات التجميل
ويارب اكون افدتكم ومتنسوش تدعولى امانه عليكم بالذرية الصالحة
imperfect angel imperfect angel 484813_3.gif فتكات متميزة Fatakat 484813 فى قلب جوزى – السعودية