السلام عليكم
اتبعتلى كتير عالخاص اسئله كتيره جدا خاصه بالعنايه بالاسنان .. قررت اعمل موضوع يختص بكل شئ عن العنايه بالاسنان اتمنى الموضوع يغطى كل شئ واللى عنده اى استفسار انا تحت امركو
اولا غسيل الاسنان
اول و اهم حاجه لازم نتبعها للمحافظه على الاسنان بس المهم الطريقه السليمه
طب ايه هى الطريقه ؟
نبدا بالاسنان العلويه السطح الامامى نضع الفرشاه بزاويه 45 درجه بين اللثه و بدايه الاسنان و يكون اتجاه الفرشاه من فوق لتحت يعنى نتجه ناحيه اللسان
و بعدين السطح الخارجى للاسنان السفليه نفس الطريقه س اتجاه الفرشاه من تحت لفوق يعنى بردو نبدا من اللثه و نتجه للسان
و بعدين نفس الطريقه للسطح الداخلى و ده مهم جدا محدش ينساه
و بعدين السطه العلوى اللى بناكل عليه وده كلنا عارفين طريقه تنضيفه
و ياريت محدش ينسى تنضيف اللسان بنفس الفرشاه
قبل ما اوريكو الصوره حتقولولى نغسلها كام مره ؟
على الاقل 3 مرات يوميا واهمهم قبل النوم
ولو اكلنا اى حاجه فالنص لازم نغسلها لان البلاك بيبدا يتكون بعدها بساعه
ثانيا استخدام الخيط "dental flossing"
موضوع مهم و كتير بيتجاهلوه طريقه حوريهالكو فالصوره و له انواع كتير جدا على حسب ما كل واحد بيفضل ياريت نعمله حتى لو مره يوميا
انصح ان المره دى تكون قبل النوم و قبل غسيل الاسنان
وله انواع كتير
ولو النوع العادى يتمسك كده
ثالثا تبييض الاسنان
طبعا موضوع كله بيسال عنه بصو يا قمرات اللى نفسه اسنانه تبقى ناصعه البياض و بتلمع حقولكو حاجه قبل ما ندور على اجهزه الليزر و التبييض الغاليه و اللى مينفعش نستمر عليها لاسباب كتير فى طرق اسهل ايه هى بقى ؟
اولا تنضيف الجير و ده مهم جدا و بيتم عند الدكتور سواء بجهاز او بالادوات على حسب امكانيات العياده و احتياجك
بيتعمل كل 3 شهور او 6 شهور او سنه على حسب قابليه كل واحده و سرعه تكوين الجير عندها
طب بعد الجير لاحظتى ان لسه فى صبغات
اطلبى من الدكتور يعملك تلميع للاسنان و ده سهل جدا و مش غالى و بيشيل كل الصبغات الخارجيه و بركز على خارجيه دى اللى هى من شاى قهوه اكل …..
لان فى صبغات داخليه من ادويه او امراض
بعد التلميع حتلاحظى ان اسنانك بتلمع و ملمسها اختلف
طب و معجون تبييض الاسنان اللى محيركو كلكو
بصو يا قمرات ده مينفعش نستخدمه علطول يعنى وقت ما نحتاجه نستخدمه و بيكون مره فالاسبوع او يوم و يوم على حسب النوع بس منمشيش عليه باستمرار عشان ميشلش من طبقات الاسنان الاساسيه و الانواع كتير طبعا
كده فاضل
التهابات اللثه
استخدام المضمضه
الاكلات المفيده و الاكلات المضره للاسنان
الاعتناء باسنان الاطفال
حنزلكو موضوع تانى بيهم لو ده عجبكو و شجعتونى
ياريت الموضوع ميتنقلش منتديات تانيه لانى تعبت فيه
و مش حقولكو قيمو الا لو عجبكو و عايزين كله يستفيد
وانا تحت امركو فاى استفسارات
د_اسنان
بنوته اسنان بنوته اسنان 748229_3.gif فتكات هايلة Fatakat 748229 الاسكندريه – مصر