السلام عليكم ورحمة الله وبركاته
ازيكم يا فتوكات يا قمرات يارب تكونوا بخير
المهم انا دايما بطبخ اكل خفيف ومش مسبك ومش مشطشط ومن غير سمنة ولا زيت وكمان من غير فلفل بس والله الحمد لله بيطلع جميل وكل اللى يدوقه بيشكر فيه الحمد لله رب العالمين على نعمه
المهم جاتلى فكرة وانا قاعدة وقلت طيب ما احط طريقتى هنا فى الاكل وهيستفاد منها كتير هنا ( يعنى اللى بتعمل رجيم – واللى عندها قولون – واللى عندها مشكلة فى الكبد – واللى عندها مشكلة فى الكلى -واللى عندها مشكلة فى القلب – واللى بتحب الاكل خفيف وسهل الهضم ) كله كله هيستفيد ان شاء الله
وطبعا كل اما اكون رايقة وانا بعمل اكلة هصورها وانزلها فى المدونة ان شاء الله – وكل اكلاتى هيبتدى عنوانها دايما بـ كل أكلاتى خفيفة – اسم الاكلة واتمنى تنول اعجابكم وتستفيدوا كلكم وتدعولى ربنا يشفينى
نبتدى بقى الاكلة
هنجيب الكبدة ونقطعها شرايح رفيعة كده
بعد كده يا قمر هاتى معلقة خل تفاح وعصير ليمونة ومعلقة زيت زيتون ونص او ربع معلقة كركم على الكبدة وقلبى كويس – وهاتى بصلتين وقطعيهم ترانشات رفيعة وحطيهم فى مصفاة على الكبدة وادعكى جامد علشان تنزل ماية البصل على الكبدة
بعد كده قلبى كويس وغطيها وعلى التلاجة لمدة ساعة
تعالى بقى هاتيها من التلاجة وعلى البوتاجاز وسيبيها لما تنشف مايتها مع التقليب المستمر من حين لآخر واوعى تغطيها لحد ما تنشف مايتها علشان ريحتها متبقاش وحشة – كده
بعد كده هتكونى محضرة فلفلة او اتنين ملونين او اى لون عندك حسب المتوافر وكمان 6 او7 فصوص توم وكله ترانشات
وتنزلى بيهم على الكبدة بعد اما تكون شربت مايتها وتقلبى كويس وتضيفى الملح وتهدى النار عليها وتغطيها حوالى 10 دقايق او 15 دقيقة – وبالهنا والشفااااااااااااااااا كده وبدون دسم ولا حموضة وتحدى
وياسلام لو عيش اسمر صابح وتعمليها ساندوتشات تقطعى الرغيف نصفين وتحطى نص جوه نص وتمليه كبده بس اوعوا تتخانقوا عليها
وده الشكل النهائى
وتنفع للفطار فى رمضان احنا فطرنا عليها النهاردة وكانت روعة الحمد لله ومتنسيش السلطات انتى وهى – والتقييم ليا مش فى الوجبة مواضيع هذا القسم برعاية
w_elreweny w_elreweny 176450_3.gif فتكات غالية قوي Fatakat 176450 كفرالشيخ وبحبها قوى – مصر