ازايكم ياحلوين
طبعا انا بكتب الموضوع بالمدونة ده خصيصا لأني من المدونة ده أخذت نصيحه الأخت الورده الحمراء وعملت العملية عند الي المفروض انها دكتوره دولت ابراهيم
الحمدلله ربنا منٌ عليا بالصحه والعافيه دلوأتي وكتب لي عمر جديد
أنا ححكي حكايتي وربنا شاهد على كل كلمه بكتبها عشان تكون عظه وعبره لأي وحده من الأخوات انها متفكرش تاخذ النصيحه كده وتروح تعمل عملية خطيره زي دي عند اي حد بدون ماتسأل
انا طبعا عايشه بالسعودية وكنت مسافره على مصر واول ماوصلت اتصلت بالدكتورة واخذت موعد معاها بمركز عند جنينة مول اسمه مركز العائلة المهم
شافتني وحددت معايا موعد للعمليه واتفقت معايا العمليتين ب 16 ألف بعديها بكم يوم طلبت مني تحاليل للدم وطبعا أنا قلت لها اني حسافر بعد الموعد الي هي حددته للعمليه ب6 أيام
وسألتها في خطوره اني اسافر ولا أي مشاكل قالت لا صحتك حتكون كويسه ان شاءالله من بعد العمليه بيومين ومافيش مشاكل
المهم أكدت عليها اني عايزه تخدير موضعي للعمليه مش عايزه كامل في يوم الزياره الاول ويوم العمليه اكدت مره تانيه
المهم العمليه كانت شفط في الفخذين والذراعين مع شد للذراعين
رحت يوم العمليه ودخلت غرفة العمليات وبدأو وقالت لي احنا حنديكي حاجه تنيمك شويه على مانخدرك موضعي طبعا انا ماصحيتش الا وانا بالغرفه العاديه والعمليه كلها خالصه
طبعا الحمدلله انه ماحصليش حاجه بس انا كنت شارطه انه تخدير موضعي إلى أخر لحظه قبل العمليه وضحكت عليا وعملت لي كامل وكانت بالحقيقه بتستغفلني هي من الأساس كانت ناويه تعمل تخدير كامل بس كانت بتقول لي طيب عشان أوافق
المهم بعد العمليه بساعات حالتي بدأت بتتدهور الدوخه زادت وكل شوية برجع كل الي فبطني تاني يوم كلمناها وقولنالها اني مش قادره أكل ولا أشرب كله بيطلع على طول وماأدرش أوقف معايا دوخه فضيعه قالت لنا جيبو اي حد يشبك لي محلول جلوكوز وسلاين الي هو محلول ملح عشان تخف الدوخه لأنه مافيش أكل
المهم استمرت الحاله لمده اربع ايام وانا حالتي بتسوء بعد كده بقيت على محلول الجلوكوز لاني مش قادره أكل كويس ولا قادره أتحرك حتى الحمام بيشيلوني ويدخلوني انا ماأدرش امشي ولا أعمل اي حاجه كنت تقريبا شبه ميته
المهم في دكتور جانا البيت وشافني وقال لازم تنقلوها المستشفى بشكل سريع مش حينفع تعيش على الجلوكوز والمحاليل وتاني يوم رحت المستشفى
وشافني جراح التجميل الي عندهم وأول ماشافني قال انتي محتاجه نقل دم باين بوشك وسألني أول سؤال قال هي سحبت منك كم لتر قلت له 9 لتر ساعتها صرخ وقال ايه ازاي متأكده طبعا قلت له ايوه قال عشان كده انتي لازم يتنقل ليكي دم بسرعه اتسحب منك دهون كتيره اوي واتسحب معاها دم ولما حللت الهيموجلوبين لقيت الدم 6 وكان قبل العمليه 12 ونص وسألت الدكتور قلت له هو الي تسحب مني كتير على جسمي قال لي انا لايمكن مهما كان وزن المريضه اسحب بالعملية الوحده اكتر من أربعه ونص وسألته ممكن تعمل عملية شفط للفخذ والذراع بتخدير موضعي قال لا انا لو حعمل حعمل كامل ولو المريضه اصرت حعمل كل عملية لوحدها يعني واضح انها كانت بتنصب عليا
وطبعا مافيش يوم وحصلت المظاهرات وكان لازم ارجع السعودية
ورجعت وانا بعربيه مش قادره أمشي ومن المطار عالمستشفى وتنومت طبعا وعملولي تحاليل لقيو كل المعادن والفيتامين الي بالجسمي مافيش يعني كنت عايشه على ولا حاجه وطبعا كنت محتاجه نقل دم سريع ودلوأتي أنا بكتب بعد معاناة دامت شهر ونص وكنت فيها عالفراش زي الميته اقسم بالله ماما واهلي كانو تقريبا مودعيني ومتوقعين اني خلاص مش حعيش من الحاله الي شافوها فيها وانا دلوأتي باخذ كمية أدوية مش طبيعية بس عشان أقدر أرجع زي ماكنت وفي حاجات يمكن تستمر معايا أقل حاجه 6 أشهر مش حقول غير حسبي الله عليها والله ينتقم منها لأنها بس لو خافت ربنا وقالت من البدايه اني فقدت دم كتير ولا كتبت لي ابر حديد كان رحمتني من العذاب الي حصلي بس الحمدلله على كل حاجه
طبعا عملية الشد الي عملتها ليا بذراعي مشوهه جدا الجرح مش راضي يتقفل التهب بسبب مشاكلي بالدم وحاجات كتير ودلواتي الحمدلله بدأ يقفل شويه بس تخيلو جرح له شهر ونص وجرح كبير اوي فتحت لي باطي من أوله لاخره
وذراعي اليمين حصل فيها تشوه من الخياط فيه زي الكتله بارزه طبعا دلوأتي مش حعمل ولا حاجه بستنى أخف شويه بعد كده حسأل عن جراح ممتاز واشوف بعيني حد مجربه وحروح لأكتر من واحد اخد رأيهم واشوف اعمل ايه بالتشوه الي عملته ليا
انا كتبت قصتي عشان محدش يغلط غلطتي وربنا يستر على الجميع
مس جدة مس جدة فتكات حبوبة Fatakat 399059 jeddah – ksa