السلام عليكم
ازيكم ياحبايب قلبي يافتوكاااااااااااااااات
انا مش قادره اقولكم علي كميه الاستفاده اللي انا استفدتها منكم وفي القسم ده بالذات
وفي كل خطوه بعملها في جهازي وافكاركم ومشوراتكم اللي ساعدت بيها خطيبي وعملت نفس ادامه ولا عنتر زماني اللي بفهم في كل شيء
المهم
بصوا بقي انا بقالي شهرين عماله ادور وابحث معاكم واقري تجاربكم في شرا الاجهزه واستفدت منكم كتير واخيرا رسيت علي اللي عايزاه
وامبارح نزلت انا وبابا وخطيبي واخويا نشتري الاجهزه من شارع عبد العزيز ولفينا لفه محترمه عشان نعرف اسعار السوق ايه واخرهم في الفصال كام
بصوا بقي الحاجات اللي لازم تاخدو بالكم منها عشان مايحصلكوش زي اللي حصلنا
1- لفو علي كذا محل ومعاكم نوت بوك واكتبي اسم كل محل تدخلوه ف اول كل صفحه واساليه علي اسعار الاجهزه اللي انتي عايزاها واكتبي اسعاره في الصفحه دي وخشي علي اللي بعده وهكذا وقولوا للبياع الاسعار دي من الاخر ؟؟ احنا فلوسنا في جيبنا وهنشتري ههيقولك طبعا اه من الاخر
قولوه يعني الحاجه جاهزه احنا هنخدها النهارده ووننقلها مش هنستني لبكره ده طبعا لان فيه بياعين مابيبقاش عندهم الحاجه اللي انتي عايزاها بس بيقولوا اسعار يضربو بيها اسعار المحلات اللي جنبهم وخلاص ويخلوكي ماتشتريش
2- هتلاقي من ضمن المحلات اللي دخلتيها محل او اتنين اداكي اسعار في الارض يعني التلاجه اللي ب 3000 يقولك ب 2024
طبعا انتي هتعملي ادام الراجل كده
خليكي ناصحه وقوليله دي اسعار من الاخر واكرمنا احنا هنشتري وبتاع هيقولك تعالي بس ومالكيش دعوه
انتي بقي قوليله خلاص انا جييييييييييييييييييييييييييييييييت هاتلي بقي الحاجه دي من المخزن بسرعه
هتلافي البياع بقي هو اللي وشي جاب الوان وعمل كده هيقولك ثواني ويدخل المحل يعمل نفسه بيتكلم في التليفون او بيقلب في دفاتره ويخرج ويقولك بصي هيا التلاجه ب 2900 ( اللي قالك عليها ب 2024 وتعالي هكرمك )
المهم انتي لو لفيتي ولقيته السعر ده قريب من لااسعار اللي في السوق ساعتها ممكن تفاصلي معاه جامده وتخديها باقل سعر في السوق وانتي شطارتك
طبعا فيه فتوكه هتقولي طب والاهبل ده ليه قال من الاول 2024 مادام ده مش سعرها ؟؟؟؟
اقولك انا بقي وده اللي عرفته من واحد معرفه شغال هناك
ياستي البياعين ببساطه بيبعتوكي ويربطو دماغك
هتقوليلي ازاي ؟؟
اقولك
يعني طبعا عمر مافيه تلاجه ب 2024 جنيه فانتي هتفضلي تلفي في السوق تلفي تلفي لحد مارجلك تسيب من بعضها
وطبعا والدك يتعب بحكم سنه فماتلقيش بالسعر ده فترجعي للراجل ده ف اخر اليوم وتقوليله هات يقولك مافيش لو عايزه هيا سعرها كذا
طبعا هتضطري تفاصلي بالسعر الجديد اللي قاله ده وتاخديها في الاخر بالسعر المتعارف عليه في السوق بس يبقي اسمك في الاخر خدتيها منه لانه ربط دماغك ورجعتيله بعد ماتهريتي لف فعايزه تشتري بقي وتروحي وخلاص
شايفين تفكير اباليس والله بس بياعين نقول ايه
2- اشتري حاجتك كلها من محل واحد لان ساعتها البياع هيبقي ماسك في بيعتك بايده وسنانه وعايزه يكسب لان برضو البيع والشرا واقف مش شغال اوي فاعرفي ان البياع اللي هسيبك تمشي بغنيمتك دي يبقي فعلا جاب اخره في الفصال معاكي
لو عجبك السعر اشتري ماعجبكيش روحي لغيره بس ده طبعا بعد لفك للسوق وتشوفي ميتهم ايه زي ماقلت في الاول
3- افتحي حاجتك حاجه حاجه وشفيها وشوفي الضمان واتاكدي من الهيكل مايكونش مخبوط ولا متجرح
4- خلي صاحب المحل يشوفلك عربيه تنقلك حاجتك بس اتفقي انتي مع السواق والعامل اللي هيطلعلك الحاجه
بلاش تاخدي سعر النقل من صاحب المحل عشان هيسمسر عليكي مع السواق فانتي منك للسواق بقي
5- اخر حاجه بقي بعد الناس ما تطلعلك الحاجه قوليلهم يسلموكي الاجهزه تاني عشان لو اتخبطت يبقي مسئوليتهم ويرجعهوها للمجل
ودي بقي فايده انك قلتي لصاحب المحل هاتلي عربيه عشان لو اللي جابه دي رجعله بالحاجه يتعاملو هما بقي مع بعض بقي
انا عارفه اني رغيت كتير بس انا بجد عايزه الكل يستفاد ويبقوا ناصحين كده ومايضحكش عليهم لان في ناس بجد …….
ربنا يسامحهم بقي ويدي كل واحد علي قد نيته
بس كده يافتوكات دي خلاصه تجربتي في شرا الاجهزه
وطبعا ماينفعش مااخرج كده من غير مااقول اشتريت ايه وبكام احسن لاتقطع
بسم الله ماشاء الله والله اكبر
تلاجه ال جي 14 سيلفر ب 2650
غساله توشيبا فوق اتوماتيك 10 ك بالطلمبه 2225 ( جبتها باعجوبه ناقصه ومش موجوده واللي عنده عايزه يطلعها ب 2500 واعلي كمان )
بوتجاز كريازي القديم 4 شعله 1650
سخان اوليمبك 10 لتر غاز 630
وعلي فكره الاجهزه بتغلي يعني الاسبوع ده غير الاسبوع الجاي وهكذا
ادعولي بقي ربنا يتمم زواجي علي خير ويجمعني بخطيبي بقي في اقرب وقت
واي استفسار تاني انا في الخدمه
وماتنسوش التقييم يافتوكات عشان الموضوع يتثبت و الكل يستفاد
في رعايه الله
samar cleopatra samar cleopatra 619543_8.gif سوبر فتكات Fatakat 619543 القاهرة – مصر