بسم الله الرحمن الرحيم
وحشتوني وحشتوني يا أحلي صحبة و أجمل أخوات في الدنيا
أولا : شكرا لكل الناس اللي دعتلي ساعة ولادتي لأنه بجد حسيت بدعائهم ليا في تيسير ربنا ليا
ثانيا : أنا كنت وعدتكم أول ما أقوم بالسلامة و ربنا يقدرني هدخل و أحكيلكم بالتفصيل الممل قصة الولادة و أنا عند وعدي ليكم
أعتقد أغلب الناس هنا كانت متابعة حالة القلق الشديدة اللي كنت فيها في الشهر التاسع
كانت مريم واخدة وضع الولادة من أول التامن .. راسها تحت و رجليها فوق بس منزلتش الحوض
و كانت الدكتورة ربنا يباركلها يارب متفائلة بالولادة الطبيعي و شجعتني عليها و قالتلي هنستني لحد آخر لحظة ممكن تنزل الحوض
و كنت بتمشي كتييييييييير و بشرب القرفة و الحلبة و العسل و بآكل تمر كتير برضه
و جيت علي الأيام الأخيرة و جربت شربة الخروع
كل دا و ربنا مأردش إنها تنزل الحوض
المهم كنت خلال 3 أسابيع بعاني من تحجر البطن و ضغط رهيب علي أعصاب رجلي من فوق
كل دا كان طلق شغال بس مش قادر ينزلها للحوض
المهم في آخر زيارة ليا للدكتورة كان الشهر التاسع خلص خلاص و قالتلي آخرنا يوم 8 بس علي مسؤليتك إنتي لو عايزة تستني
أنا الحالة قدامي بتقول ولادة قيصرية عشان خلاص
الإنقباضات شغالة من 3 أسابيع و ممكن تضر النونة و تقلل نبضها
طبعا كان مستحيل أستني و قررنا نعمل العملية .. كان المفروض أروح المستشفي ساعتها بس أنا اللي طلبت نستني لحد الصبح عشان أقدر أرتب حالي
سهرت الليلة كلها طبعا .. مفيش نوم .. من القلق أولا .. و من خوفي علي مريم قعدت أراقب حركتها هل هي بتقل و لا إيه
و إستغليت السهر دا في إني رتبت حاجتي تاني .. و عملت حسابي بقي علي يومين تلاتة في المستشفي مش يوم واحد
و كنت مرتبة البيت من قبلها بس برضه لفيت فيه لفة تاني عشان أتأكد إني هسيب لجوزي الحاجات اللي هيحتاجها ميسرة قدامه
يوم الولادة بقي
كنت صايمة من الساعة 12 بالليل عن الأكل بس .. بس الشرب ميه فقط مش أي حاجة تانية
صلينا الفجر أنا و زوجي .. هو دخل يريح شوية و أنا كملت الترتيب و كانت الدكتورة كاتبالي علي حقنة شرجية أخدتها بنفسي قبل ما أطلع بنص ساعة
و الساعة 9 الصبح توكلنا علي الله و رحنا عالمستشفي
كان أهلي مستنيني هناك و صديقة مقربة جدا ليا
عملنا ورق الدخول للمستشفي و توكلنا علي الله .. طلعت الأوضة بتاعتي مع أهلي و زوجي
جت العاملة .. ظبطت لنا الأوضة .. فرشت الملايات و جابتلنا الكوفرتة و البطاطين و شغلت التلاجة و رتبت حاجتي في الدولاب
طلعتلهم غيار النونة اللي هتلبسه أول ما تتولد بإذن الله
جت الممرضة .. لبستني إسورة مكتوب عليها إسمي و تاريخ اليوم و رقم الأوضة و إسم الدكتورة بتاعتي
و جت دكتورة مقيمة .. جهزتني للعملية .. قاستلي الضغط و عملت تشيك آب سريع عليا
لبسوني مريلة العمليات الخضرا و طاقية علي شعري
( كنت جايبة معايا توب بحمالات لبسته تحت المريلة عشان مبقاش مكشوفة من فوق ..
و كمان لبست روب عالمريلة و طرحةسترت بيها شعري لحد ما أنزل العمليات )
الساعة كانت 11 و نص .. صليت ركعتين قضاء حاجة و طلبت من ربنا التيسير و المغفرة
ودعت كل الناس و كنت متخيلة إن جوزي هييجي معايا بس كان ممنوع حد ينزل مع الحالة ..
نزلت لوحدي في أسانسير العمليات و معايا الممرضة و فايل الحالة بتاعتي
في جناح العمليات لقيت الدكتورة بتاعتي مستنياني و كانت بتظبط نفسها .. بتلبس المريلة و تعقم إيديها .. و هكذا
في الوقت دا .. دعيت ربنا لكل الناس اللي وصتني بالدعاء و الحمد لله تذكرتكم كلكم واحدة واحدة و الله
و دعيت لإخواتي و لزوجي و لوالدي و لكل بنات المسلمين اللي ربنا لسه مرزقهمش و اللي حملوا و اللي منتظرين الولادة
الساعة 12 إلا ربع دخلت العمليات
نمت علي السرير .. جت ممرضة و طلبت مني – لا مؤاخذة – تركبلي القسطرة
( كنت قيت في موضوع هنا إن تركيبها مؤلم و الأفضل إنك تطلبي منهم يركبوها و إنت في البنج )
فطلبت منها تركبهالي و أنا في البنج
رفضت و بهدوء قالتلي : سيبي نفسك خاااااااااالص و هي مش هتوجعك دي حاجة
حاجة تانية الدكتورة بتاعتي لحظة بدة التخدير بتفتح علطووول و تطلع البيبي عشان ميوصلوش بنج و يتأثر بيه
فمش هتضيع الوقت في تركيب القسطرة
إستعنت بالله و توكلت عليه و فعلا .. سبت نفسي خالص و محسيتش غير بنغزة بسيطة
جت بعدها ممرضة تانية كشفت بطني و طهرتها بالبيتادين كويس و غطتها بالملايات الخضرا و كشفت بس مكان العملية و ثبتت الكليبسات في الأطراف
بعدها دخل دكتور التخدير .. راجل كبير قد والدي .. سلم عليا و قاس ضغطي و فردلي دراعي و ركبلي الكانيولا و سمي بالله و حطللي قناع التخدير
في نفس اللحظة دي كانت الدكتورة بتحط المشرط علي بطني و في نفس اللحظة اللي بدأت فيها .. مكنتش في الدنيا خلاص
بعدها بربع ساعة كانت مريم حبيبة قلبي طلعت للجماعة اللي مستنين في الأوضة فوق و إستلموها و قعدوا بقي يهيصولها شوية و يتأملوا فيها شوية يشوفوا هي شبه مين فينا .. أنا و لا باباها
و طبعا هي حتة من باباها .. من أول شعرهل لحد طرف صباع رجليها الثغنن
زوجي أذنلها في ودن و كبر في التانية و كان معانا تمر حنكها بيه
الساعة 3 كنت بحس بكلام حواليا .. و بحس بنفسي بتشال و أتحط علي سراير كتير كذا مرة ..
اللي حصل بقي إني إتشلت من علي سرير العملية و إتحطيت علي ترولي نقلوني بيه لأوضة جنب العمليات .. شطفوني فيها و لبسوني مريلة نضيفة و لفوني في بطانية و شالوني تاني
و حطوني علي ترولي تانيو طلعوني بيه في الأسانسير للأوضة بتاعتي
و شالوني آخر مرة بقي و حطوني علي سريري
كنت لسه بفوق من البنج و مدروخة و جوزي قاللي إني خرفت تخريف جاااااااااامد .. بس حلو أوي !!!!
كنت بقول إني بحبك يا ربنا جداا .. شكرا يا ربنا إنت إديتني كل حاجة حلوة .. مع إني مش عايزة حاجة من دي خالص
أنا عايزة بس أبقي معاك يارب .. عايزةأبقي عندك
و كنت بشد في إيد جوزي و هو قاعد جنبي عالسرير و أقوله يلا نروح نصلي أنا و إنت في المسجد
يلا نروح
و هو يا عيني قعد يعيط .. كان فاكر إني في سكرات الموت خلاص
المهم فقت بعدها بنص ساعة .. الوجع اللي كنت بحس بيه و مازلت بحس بيه لحد دلوقت هو بالظبط بالظبط زي وجع البريود بس جامد شويتين تلاتة
بعد أربع ساعات بالظبط من العملية .. نزلت رجلي من علي السرير و دلدلتها و حركتها رايح جاي عشان الدم يمشي فيها
و بعدين قوموني و دخلت الحمام و جت ممرضة و ساعدتني إني أتشطف كويس و غيرت المريلة و لبست هدوم قطن مريحة و مفتوحة من قدام عشان الرضاعة
و أخدت لبوسين بيطلعوا الريح علي شكل جل خفيف بدل لا مؤاخذة القرف و الأصوات اللي بتحصل دي
و إتمشيت في الأوضة علي قد ما أقدر
و كنت موصية جوزي إنه ميخليهمش يدوا مريومة أي حاجة خالص غير لما أرضعها الأول عشان متاخدش علي الحاجات التانية
و فعلا أخدتها و رضعتها
( كان في سوائل شفافة اللي هي السرسوب بتنزل من صدري من الشهر السابع )
و بعدين بدأت أديها ببرونة أعشاب اللي هي بيبي درينك .. 50 مللي 3 مرات في اليوم عشان يطلع الغازات اللي في بطنها و يغذيها شوية لحد ما اللبن ينزلها
أول يوم .. كل ساعة أكل معلقة عسل نحل معصور عليها لمونة كاملة .. كل ساعة
تاني يوم .. من الصبح للعصر .. سوائل دافية ( ينسون .. كراوية .. حلبة .. ميه دافية ) .. و بعد العصر زبادي و فاكهة
تالت يوم بقي .. أكل عادي بس مسلوق كله مفيهوش حاجة مسبكة .. أكلت نص فرخة مسلوقة و شوربة لسان عصفور
و لحد دلوقتي ماشية عالأكل دا مع السوائل الكتير عشان الرضاعة
طول الجرح بتاعي حوالي 8 سم .. و معمول تجميل بالليزر .. يعني مفيش خيط و لا حاجة
و غيرت عليه يوم الجمعة و هغير عليه تاني يوم الأربعاء بإذن الله
الوجع بالظبط زي ما قلتلكم .. وجع بريود بس جامد شويتين
و قت الرضاعة بحط مخدة علي رجلي و أحط عليها مريومة عشان متنيش ضهري
طلوع و نزول السرير و القومان من عليه متعب شوية بس مش أوي
الحركة فعلا حلوة و بتنسيكي الوجع و بتساعدك إن الموضوع يخلص بسرعة
الحمد لله .. أنا دلوقتي في بيتي .. و معايا أحلي مريومة في الدنيا و فرحتي بيها منسياني كل أوجاع الدنيا
هي نسبة الصفرا بتاعتها في تالت يوم للولادة 6.9 يعني تقريبا 7 و دكتور الأطفال قال إن دي صفرا فسيولوجية بتروح بالرضاعة مع البراز
و إداها نقط فيتامينات عشان تساعدها شوية علي التخلص من الصفرا
و قاللي أهويها شوية عشان الجو اليومين دول حر جدااااا
و فعلا لاحظت إنها لما بهويها شوية بتفرفش و تبقي حلوة مش مفرهدة
أنا مستنية ردودكم عليا و لو عايزين تسألوني في أي حاجة أنا تحت أمركم دا أقل واجب بعد وقفتكم كلكم جنبي
ربنا يخليكم ليا و ميحرمنيش منكم أبداااااا
Om-7ozifa Om-7ozifa 173516_2.gif فتكات هايلة Fatakat 173516 طنطا – مصر