فتوكاتي الأعزاء …. أنا زيكم كتير غيري عملت دايت و فشلت كذا مرة
لكن المرة دي قررت أنها حتكون غير كل مرة و الحمد لله أنا ماشية على الدايت بقالي 4 شهورخسيت فيهم 17 كيلو فرقوا في حياتي كتيييييييييييييير و لسة إن شاء الله مكملةحتى آخر كيلو زيادة.
خذتي قرار تعملي دايت, طب تعالي نخلي المرة دي غير كل مرة:
1. أولاً أخلصي النية لله تعالي, عشان تاخدي ثواب و انت بتعملي الدايت
2. أبدأي بقراءة قصص ناس عادية زيك نجحوا في إنقاص وزنهم بشكل كبير و خدي عندك المثال ده للسيد/ يوسف السيمان مؤسس موقع arab diet اللي خس 90 كيلو بحالهم في 3 سنين و آدي صورته و قصته :
https://arab-diet.net/?p=644
3. صوري نفسك بأي كاميرا أو بالموبايل و احتفظي بالصورة و داومي على تصوير نفسك مرة كل شهر.
4. دوري في صورتك و أنت في أحسن حالاتك و بأقل وزني شفتيه طول عمرك و علقيها على التلاجه أو في المطبخ أو حتى حطيها في شنطتك
عشان كل اما اليأس يشدك تبصي على الصورة و تقولي أنا حرجع أحسن مما كنت, لأني أن شاء الله أقدر.
5. أوزني نفسك و قيدي الوزن و تاريخ الوزن و ممكن تستعيني بالموقع ده اللي بتدوني فيه وزنك الحالي و الهدف اللي عايزة توصليله و هو يحسبلك نسبة الوزن اللي فقدتيه و الموقع هو:https://arab-diet.net/plan/
6.خلاص عرفتي وزنك جه دور أختيار النظام الغذائي اللي حتمشي عليه, أما تروحي لدكتور و تتابعي معاه أو تمشي على أي من أنظمة السعرات الحرارية لأنها تضم كل العناصر الغذائية اللي بيحتاجها الجسم و ممكن تاكلي فيها كل حاجه حتى الشيكولاه لكن المهم تكوني ضمن السعرات المخصصة ليكي خلال اليوم و يٌنصح باتباع نظام لا تقل عدد سعراته عن 1000 سعرة حتى لا يتضرر الجسم.
7. أعلمي أنك طبيبة نفسك و انك الوحيدة اللي عارفة ايه العادة السيئة اللي أكسبتك الوزن ده كله,
يعني مثلاً: أنا شخصياً أكتشفت بعد تفكير عميق أن سبب تخني هو التلقيط snacking لأني باخذ سناكس مش صحية من غير ما أحس, يعني أكل بواقي العيال أو أقعد أدوق و انا بأطبخ أو بفتح التلاجة و هكذا هي صحيح بضع قضمات لكن في الآخر بتجمع و احسن علاج للموضوع ده أني أكل لبان من غير سكر أو أشرب مياه أو مشروب بسكر دايت أو حتى أكل خيار و جزر أو فاكهة
8.حطي لنفسك هدف واقعي, يعني مثر من نصف كيلو الى كيلو واحد بالأسبوع على الأكثر, لأن أكتر من كدة حتلاقي نفسك أول ما تبيطلي الدايت أنك فتحتي في الأكل على الرابع و مش عارفه توقفي لأنك كنت محرومة من أصناف كتير.
9. عدلي أي دايت بحيث يتماشى مع الطعم اللي بتحبيه, يعني مثلا لو مش بتحبي السلطة ممكن تتبليها بحاجة بتحبيها زي معلقة مايونييز لايت أو كاتشب و قلليها بالتدريج لحد أما تتعودي على طعمها من غير إضافة و هكذا
10. أبعدي عن الناس المحبطة اللي حتكرهك في نفسك و انت طخينه و بعد ما تخسي و خلي ثقتك في نفسك أقوى من أي كلام مزعج.
11. حاولي تلاقي حد من عيلتك أو صحابك أو زوجك يعمل معاكي دايت عشان تتنافسوا و تشجعوا بعض.
12. مرتهقيش ميزانيتك زيادة عن اللزوم بأكل الدايت و خلافة عشان تقدري تكملي فترة طويلة, عدلي اكل البيت العادي عشان يتماشي مع الدايت بتاعك.
13. كل أما تيأسي و تحسي أنك مش قادرة تكملي , أقري على النت عن قصص و تجارب ناس نجحت في الوصول لأهدافها.
و أخيرأً حطي في دماغك أنك عايزة تخسي عشان نفسك أولاً
مش عشان حد, وده حيخليكي تكملي مش توقفي أول ما يزول السبب اللي كنت بتعملي دايت عشانه
أتمنى أكون مطولتش عليكوا و بالله عليكوا تدعولي أخس و تدعوا بالشفاء لولادي هم و اللي زيهم
3 ملايكة 3 ملايكة فتكات حبوبة Fatakat 1088541 القاهرة – مصر